11
1 Ti-Dindaan ná saniyab bin kaa ŋmàntī tiwan deedeeyee, ama tiwaŋŋmantikaal tin bí deedeeyee di fáatì ti-Dindaan pɔbila.2 Dilambil di cāabìń icoo, ama binib bin sīntiǹ bi-ba taapuee di cáá iciin.
3 Deedeedambi bulcinti di kpòotī-bi, ama biibiidambi saŋkiŋkpitiŋ di nàantí-bi.
4 Ti-Dindaan ŋuul dalee, tigaajati kaa dāa kèetī, ama deedee saŋŋu di dāa nyāntí unil ŋkúmin.
5 Bibulcinnib deedeeu di tàntī bi-saŋŋu, ama ní binikpitib bíǹ lítí bi-tuŋkpitiŋ pu.
6 Deedeedambi deedeeu di fìil̄-bi, ama biibiidambi nimbitaataam di fàtīi sàtī-bi kii kutaliŋŋuee.
7 Unikpiti yaa kpíìyee, u-mákal mun kúntì dee, ní dimákal din u cáá u-gaajati puee mun ń ŋá fám.
8 Deedeedaan làá nyā dinimbinaamandin, ní unikpiti ń fōō u-yil kí kɔ́ di-ni.
9 Unyimɔndaan nyɔkɔ ní u cáa kù u-juti, ama deedeedambi nyil pu ní bi kāntí difiil.
10 An yaa bútì deedeedambee, ifaal bí kitiŋin ní, ama binikpitib yaa kpíìyee, bi kūuntí ní ki fàal̀.
11 Deedeedambi biindi di yì-tì ní an bútí bi-tiŋki, ama binikpitib nyɔɔbuŋŋi di nàantí-kì.
12 Unil un kpèé u-juti fámee kaa nyí tiba, ama unil un cáá dinyilee ŋmí ní.
13 Unil un cāab̀ u-juti disambiilee kaa bāal̀ tibɔti, ama unil un pu bi mákée kaa sòoǹ.
14 Dinibul din baa kpòotī tiŋanee lítí ní, din cáá bisaŋkiliibi kupaauee di ŋmátí.
15 A yaa fáá ubɔ ŋaan ki pōoǹ kí pà a-juti pɔndee, án píl̀-si ní, ama a yaa yíì kaa dū a-ba ki kɔ́ǹ an bɔtinee, a làá ŋùŋfì.
16 Unimpu un cáá kunyaaŋŋuee, bi pàkà-u ní, ama uninja un cáá difaŋgiilee kāntí tigaajati.
17 Unil un ŋáań binib tinitee ŋáań ki tìì u-ba ní, ama unil un cáá ntoomee kɔ̄ntí u-ba ní digìńdi.
18 Unikpiti tundi kaa cáá tipaal, ama tipaal dɔ̄ ki cí un tūǹ deedee tundee.
19 Deedee saŋŋu cáǹ unil dimaŋfalin, ama unil un yaa nóó ikpiti saŋŋuee cá ŋkúmin ní.
20 Ti-Dindaan ná milimilidambi, ama bibulcinnib bɔti fáatiǹ-u ní.
21 Kí sɔ̄ kí lā, unikpiti kaa làá lóó ditafadaaldi, ama tiba kaa làá gbēē deedeedambi maaliŋun yab.
22 Unimpunyaan un kaa nyí tibee sá kii ugbeeti un túuń sindaariya bɔmbil u-maŋfalee ní.
23 Tin deedeedambi nyàab̀ee di sá tiŋan, ama tin binikpitib pée ŋūǹ kí nīn kā ki cée di sá ti-Dindaan ŋuul.
24 Unil un ŋal tàntēe mɔ̀tīi kpántí ugaaja ní, ama un kpáafí tigaajati tikpilee kpántí usoodaan ní.
25 Án làá dāá bútí unil un di cáá tinitee, ní bí dāá pɔ̄ un pūǹ bin kíǹee bi nyùee ú nyɔ̀.
26 Binib tòó bin kpáafí bi-kpaajinti kí dāá nyāfì boonee mbusu, ama ní ki mèé ki bìintí bin nyáfí-tì malaa malaayee pu.
27 Binib pàkà unil un nyàab̀ kí nīn ŋáań tin ŋān̄ee ní, ama un nyàab̀ kí ŋá tikpitilee, tikpitil ní udaan làá ká.
28 Unil un máká u-gaajati puee làá lítí, ama án làá bútí deedeedambi kii busubu bun túkú tifaapɔnee ní.
29 Unil un cāabìń fikil fikil u-dicaŋkunee dāa yáatí nì iŋaŋkulim ní. Ugbaan làá dāá kpántí uciŋfiti yumbuu.
30 Atuun ŋin deedeedaan tūǹee sá kii busubu bun tìì dimaŋfalee ní. Uciŋfiti fìil̄ binib.
31 Deedeedaan fòol̄ u-paati kitiŋ pu doo ní, míǹ mbaantiim ní unikpiti nì ukpitiŋal mun fòol̄ bi-paati kitiŋ pu doo.