12
1 Unil un néeń ikpootee néeń dinyil ní. Ama unil un kaa là bí wòoǹ-uee sá ugbaan ní.2 Unimɔnti bɔti fáatiǹ ti-Dindaan ní, ama u kù ilandɔkɔkpiti daan bɔti.
3 Unikpiti kaa bá ki pɔ̄ɔ̄, ama deedeedaan úǹ yú atajal ali ní.
4 Unimpu tiŋman pu yɔu tìì u-cal tinyool ní, ama unimpu un kɔ̄ntí u-cal icooyee sá-u iween in ŋmóò ki bùkù akpabee ní.
5 Deedeedambi pée dàkafī kí ŋá tin bí deedeeyee, ama ní binikpitib dàkafī kí mùul̀.
6 Binikpitib nyɔɔbuŋŋi sá titalindi tin kùee ní, ama deedeedambi nyɔɔbuŋŋi cāabìń difiil.
7 Binikpitib yaa lítèe, bi-yindi kúntì dee, ama deedeedambi dicaŋku kpá kí kúntí jaanjaan.
8 Unil un cáá dinyilee, bi pàkà-u ní, ama bi kpèé un kaa nyí tibee fám.
9 An sɔ́ á nīn cáá utɔntɔnli ubɔ ja bí kpèè-si fám ki jítiǹ á nīn néeń a-ba timɔn kaa cáá kí jī.
10 Deedeedaan nyí kun lóò u-waŋkutee, ama unikpiti úǹ poon tū ní.
11 Unil un kù u-saakuee jīǹ ki díkì ní, ama unil un jòó ki pá tin kaa bí tibanee boonee sá ugbaan ní.
12 Unikpiti cáá bikpitiŋaliibi wanti pu nnimbitaataam, see deedeedambi pɔ́ɔǹdi baba di kèetī.
13 Unikpiti bɔkpitii sá-u kutaliŋŋu ní, ama deedeedaan úǹ nyēē tibɔtin ní.
14 Unil nyɔɔbuŋŋi ŋūǹ kí yàntī ú ká tiwammɔntiil kii unil tundi nín yàntī ú fōō tipaal puee ní.
15 Ugbaan dàkafī yii tin u ŋáańee di pée ŋān̄, ama un fòol̄ isaŋkee di sá uciŋfiti.
16 Ugbaan di yàntī bí béé dicilpu yii u gíí diŋuul, ama unil un nyí nì u-bee, báà bi yaa sīī-u waa gífí diŋuul.
17 Unil un sòoǹ ibaamɔnee nyāntí deedee mpaampiin pu, ama un lèekī inyimɔn seerabee nyāntí diyìntil ní mpaampiin pu.
18 Unil un sòoǹ kaa dàkafēe tìì tiweendi kii kitàataajikee ní, ama biciŋfitiibi bíǹ nyɔɔbuŋŋi cāabìń dicáaǹdi ní.
19 Ibaamɔn bɔti bí kí nīn cá jaanjaan, ama tinyimɔmbɔti kaa pée súŋkí ní kí wāŋkì.
20 Inyimɔn bí bin dàkafī kí ŋá ikpitee pɔbiliŋin, ama ní dipɔɔpindi bí bin nyàab̀ ŋgbansɔŋfee yaŋin.
21 Digìńdi báà diba kaa bàń deedeedaan, ama ní binikpitib bíǹ pée kāntí agìŋ́kpaan.
22 Ti-Dindaan ná binyimɔndambi, ama ní ki néeń ibaamɔndambi.
23 Unil un cáá iciinee bāal̀ tin u nyée ní, ama ugbaan úǹ bāakì u-gbaandi ki tùkù báà ŋma ní.
24 Unil un cáá difaŋgiilee làá dāá nīn cáá mpɔn bin kíǹee pu, ama unil un yaa cáá diwutijoolee làá dāá kpántí uyumbu.
25 Digìńdi yaa bàn̄ unilee, an nyìitī-u kí múĺ ní, ama dinyɔɔbummɔɔl di ŋūǹ kí sɔ̀ŋkì u-pɔbil.
26 Deedeedaan dàkà u-juti nsammɔnti ní, ama binikpitib saŋŋu cáǹ bíǹ bi-ba diyìntilin ní.
27 Ukpan un sá uwutijoodaanee kaa kāntí upeel kí púĺ, ama unil un cáá difaŋgiilee cáá tigaajati.
28 Deedee saŋŋun ní dimaŋfal bí, nsan gbanti ŋúǹ kaa cáǹ unil ŋkúmin.