Alaŋkpan Gbɔŋku 13

1 Kibiki kin cáá iciinee fòol̄ ki-baa dàkal, ama kin bèel̄ binibee kaa kíikí bí lìǹ-kì.

2 Tin nyēē unil nyɔkɔnee pu ní u kāntí njimmɔntiim, ama tipɔmbɔti ní biibiidambi jīǹ ki bí.

3 Unil un ŋūǹ ki ŋúb̀ u-nyɔkɔee wúń u-maŋfal pu ní, ama unil un sòoǹ pùsi pusi kaa dàkafēe nàantí u-ba ní.

4 Uwutijoodaan kpèé ní làm kaa kāntí, ama ufaŋgiidaan úǹ kāntí tin kamaa u yaa lèe ní.

5 Deedeedaan ná inyimɔn, unikpiti kɔ̄ntí binib icoo ní ki bíiĺ-bi.

6 Tibulcin wúǹ ubulcindaan pu, ama ikpiti nàantí unikpiti.

7 Binib biba yíì bi-ba bigaajab ní kaa cáá báà tiba, ní biba yíì bi-ba bisoodambi ama ní ki cáá tigaajakpaandi.

8 Ugaaja gaajati di fìil̄-u, ama ubɔ kaa wɔ́b̀ usoodaan.

9 Deedeedambi sá kii ŋwalifi ŋun wāĺ bɔ́iiyee ní, ama binikpitib bíǹ bí kii fitila un bíi kúùyee ní.

10 Dilambil di yàntī unil tákà tibɔti, ama unil un fòol̄ isaŋkee di sá uciŋfiti.

11 Tigaajati tin unil ká malaayee kaa yúntí, ama tigaajati tin unil ŋá soooo soooo ki kée kaa kúntí.

12 Unil yaa máká tiba pu ní kaa ká-tì malaayee, u-wunti yɔ̀tī ní, ama unil yaa ká tin fáatì u-pɔbilee, an bí kii busubu bun tìì dimaŋfalee ní.

13 Unil un kpèé ki sìŋkīǹ isaŋkee làá kɔ́ agìń poon, ama un tɔ́ marabee làá ká ipaati.

14 Uciŋfiti dàkatam sá dimaŋfal nyimbuliŋu ní. Ŋúǹ di yàntī unil ń gɔ́ntí ŋkúm talinti.

15 Un cáá dinyil tikpilee bɔti fáatiǹ binib ní. Ama biibiidambi saŋŋu cáǹ dinàandin ní.

16 Un nyí nì u-bee dàkafī ní kí nín ŋá tiba, ama ugbaan úǹ cáá u-gbaandi ki dàkà báà ŋma ní.

17 Ntuun ŋun kaa ŋān̄ee cāabìń mbusu ní, ama ntuun ŋun sá mmɔntee cāabìń diŋaŋkil ní.

18 Disool nì icoo dɔ̄ ki cí un kaa là bí dàkà-uee, ama un kíikí bí wòoǹ-uee làá fōō kupampakau.

19 An sá mmɔn ní unil ń ká kun fáatiǹ-uee, an pu ní ugbaan kaa là kí fá atuŋkpiti.

20 Unil un nōotí biciŋfitiibee kpántí uciŋfiti ní, ama un nōotí bigbaambee kɔ̄ntí u-ba agìńni.

21 Nnaabu kā bikpitiŋaliibi pu kàti kati, ama nnaam di sá deedeedambi bíǹ paati.

22 Unimɔnti naantiibi jīǹ u-gaajawanti difakal ní, ama unikpiti úǹ gaajatee, deedeedaan di jīǹ-tì.

23 Bisoodambi kpaaŋŋi lòoǹ tikpil, ama bin kaa bí deedeeyee kpaaŋŋi yɔ́l̀ ní.

24 Unil un kaa gbáà u-bikee ná-kì dee. Unil un néeń u-bikee dátí ki-tafal ní.

25 Deedeedaan cáá kí jī kí díkí, ama ní binikpitib pooŋi náká.