Alaŋkpan Gbɔŋku 23

1 Sii nì unikpaan yaa kāl̀ kí jī tijinee, á nīn nyíǹ a-ba nì un kā a-nimbiinee. 2 A yaa kpàà jīǹ tikpilee, á bàtī a-pool pu. 3 Taa yàntī u-jinti gbanti ń cúú-si nnimbitaataam. Tì ŋūǹ kí nīn sá-si kutaliŋŋu.

4 Taa bìǹ kí nyàab̀ tigaajati, pée lēē a-landɔkɔŋu an pu. 5 A tin lì yii a-nimbil pāantí tigaajati puee, tì wáŋkì. Di sá yii tì túkù ifeen kii ukaalunee ní kí kɔ́ kutaa.

6 Á taa jī ukummunti jinti, ní kí taa yàntī u-jimmɔntiiti ń cúú-si nnimbitaataam. 7 Di sá yii waa sá un ní ni dàkafī yii u sée. U làá pée tùkù-si yii: <Jī kí nyɔ̀>, ama waa sòoǹ nì míǹ nì dipɔbil diba. 8 A làá wùliŋkì tijin tin a jíńee kɔkɔ kí fá, ní anyɔɔbummɔnti ŋin a sòon̄-uee ń kúntíǹ fám.

9 Taa sàaǹ a-ba yii a bíi kútí ugbaan tibɔti, kun puee u làá kpèè iciin nyɔɔbuŋŋi ŋin a sòoǹee fám ní.

10 Taa cóotí ditaŋkpal din bi cóoǹ kikpaanyɔkɔee kí nìkī^a, kí kɔ́ kí fōō ataŋkpiibil kpaatanti. 11 Di sá yii Unimbɔti un mɔ́tí bi-puee sá mpɔndaan ní. Úǹ di làá yūĺ bi-boon kí sòoǹ kí pɔ̀-bi ní kí kpɔ̀ a-bɔti.

12 Pìitī a-pɔbil kí fōō tin ní bi dàkà-see, ní kí ŋátí a-tafaliŋ kí pīlifì tin bi bíi bífí-see.

13 Taa gùkufì kí dáaĺ kibiki tafal. A yaa dū mbambaan ki gbáń-kì, kàa làá kpú. 14 A yaa gbáń-kì nì mbambaanee gba ní a làá fīī-kì kí nyāntí ditaŋkpiilin.

Isaŋki in ubaati tìì u-jipɔɔnee

15 M-biki, a-pɔbilin a yaa cáá iciinee, ma mun pɔbil làá nīn pīiǹ ní. 16 Án làá nīn baasii mɔ̄ǹ-mi tikpil, a yaa bíi sòoǹ deedee bɔtee.

17 Taa nín cáá bikpitiŋaliibi pu nnimbitaataam a-pɔbilin, ama kutaa kamaayee, á nīn fàŋkí ti-Dindaan. 18 Niinee a-foolbooŋwu làá nīn ŋān̄, ní dimákal din a cááyee kaa làá gbíntí fám.

19 M-biki, pīlifiǹ-mi kí kpántí uciŋfiti, ní kí nīn nóó deedee saŋŋu. 20 Taa nín̄ tāatí binib bin nyù ndaam tikpilee, àá binib bin néeń ki sàfī tinanee. 21 Di sá yii disool cútí udanyɔgbil nì unaŋŋmɔl, ní unil un néeń ŋgeemee dāa pèentí ikpalcati.

22 Pīlifiǹ a-baa un di màl̄-see, kí taa kpèè a-na fám yii u nín púĺee pu. 23 Nyàab̀ kí ká ibaamɔn nì iciin nì nlandɔkɔmɔnti nì dinyil. A yaa ká tiwan gbantee, á ŋúb́-tì tiŋan. 24 An mɔ̄ǹ deedeedaan baa ki tin lákatì, ní unil un màl̄ uciŋfitee fàal̀. 25 Yàntī a-baa nì a-na ń nīn fàal̀, ní kí yàntī a-na un màl̄-see ń nīn bí dipɔɔpindin.

26 M-biki, dū a-pɔbil kí tīī-mi, ní kí yàntī m-bimbim ń nīn sá-si ŋabika. 27 Á nīn nyí yii kinimpulaakpaai sá kpaalaa, ní ubɔ nimpuu sá lɔkɔ un nyɔkɔ kaa wāāyee. 28 Bi mun nākantí ki cí kii digaŋgandambee. Aa ŋūǹ kí kàaǹ bininjab bin an nimpoobee yāntì bi nyáń bi-nimpoobi boonee.

Udanyɔgbil bítam

29 Ŋma bí falaa poon? Ŋma bí iyaliŋki poon? Ŋma néeń kujaau? Ŋma bí ki gbáà diniindi an kaa kúntí? Ŋma fòol̄ tiweendi fám? Ŋma nimbiliŋ máǹ cínciŋee? 30 An sá bin kàal̀ ndaam taapu ki yúntée, an sá bin ŋmàlintí idafi in pɔ̄ɔ̄yee ki nyùee. 31 Á taa kpèè ndaam nyaaŋku nì mì nín tòó cábcab pu kuyuunee. A yaa nyù-mèe, mì sìntī ní soooo a-neen. 32 Án dāa kúntée, mì dāa júntí-si kii ukoobuee ní, a lì kii ukoowaati nín júntí puee. 33 A-nimbiliŋ dāa kíǹ ki kpèé ki wāĺ maamaaci wanti, ní a kíǹ ki sòoǹ fám fám. 34 Án dāa bí-si kii unil un dɔ̄ tiŋku kansikinee, àá unil un lúń ndɔ ŋun pu bi sàkantí meela satau yilpu kúnti kuntee ní. 35 A làá lì yii: «Bi gbáń-mi, ama an kaa píĺ-mi! Bi tāfì-mi tiŋan, ama maa gbìl̄ tiba! Ŋyunti ŋulɔŋu ní m làá fìntī ní kí gíti bàlifì bí cáań-mi ní?»