Alaŋkpan Gbɔŋku 24

Uciŋfiti nì unikpiti bɔti

1 Taa nín̄ cáá bikpitiŋaliibi pu nnimbitaataam, taa nyàab̀ si nì bi ń nīn bɔ́ɔtí. 2 Di sá yii bi pée dàkafī kí ŋá tipɔmbɔti ŋma ní, ní ki sòoǹ tikpitil tin bi làá ŋée ŋma pu.

3 Nì iciin ní bi māā kudii, nì dinyil ní bi dùú tīī-ku mpɔn. 4 Nì nlandɔkɔ ní bi gbēentí kudii tigaajawammɔntiil nì tin cáá kunyampoouee.

5 Uciŋfiti cáá mpɔn ní. Unil un cáá dinyilee cáá mpɔn mili pu ní. 6 A yaa làá cù kujaauee, a bɔ́ntí tiŋan ní, di sá yii bisaŋkiliibi wíiŋŋu di yì dijajil.

7 Iciin bɔti pɔ̄ɔ̄ ki tīī ugbaan ń ŋmā kí gbìl̄ taapu. Bi yaa kpáfì kí sòoǹ kitiŋ pu bɔtee, u kā ki ŋmí ní.

8 Unil un pée dàkafī kí ŋá tikpitilee, bi yíì-u uŋmatinli ní. 9 Ugbaan pée dàkafī kí ŋá tin kaa ŋān̄ee, ní binib ná un bèel̄ binibee.

10 A-wunti yaa yɔ̄tì dinimbinaamandi dalee, á nīn nyí yii a-pɔŋŋu kaa náaǹ dee.

11 Fīī bin bi dàtī ki cáǹ ŋkúminee, bin bi dàtī ki cáǹ kí kpɔ̀ee, ŋá tiba kí fīī-bi. 12 Án yaa yíì a làá lì yii: «Taa nìn béè míǹ!» Un di nyí tin kā unil pɔbilinee gbìl̀ taapu. Un kpèé-see pée nyí-tì, ní ki làá pà báà ŋma u-tuuŋŋi nín sá puee paati.

13 Ŋmɔ́ tisiil, m-biki, kun puee an ŋān̄ ní. Kisikampiŋ mɔ̄ kinyɔkɔn ní. 14 Ama á nīn nyí yii míǹ ní iciin ŋān̄ ki tīī-si. A yaa cáá-iee, a-foolbooŋwu làá nīn ŋān̄ ní dimákal din a cááyee kaa làá gbíntí fám.

15 Unikpiti, taa nákań deedeedaan diiku boon kí fūkul̀ u-wanti kɔkɔ u-dumpu. 16 Di sá yii deedeedaan yaa lítì miluli pu, u làá fàtīí yīkì, ama digìńdi di làá jēetí binikpitib pu.

17 A-nannanliu yaa lítèe, án taa nín̄ mɔ̄ǹ-si, u yaa gbéetèe, á taa nín̄ fàal̀. 18 An yaa kaa sá míǹ, ti-Dindaan làá ká ní án kaa làá mɔ̄ɔkiǹ-u, ní ú páatí u-ŋuul u-pu.

19 Taa gíí binikpitib pu diŋuul, taa nín̄ cáá bikpitiŋaliibi pu nnimbitaataam. 20 Di sá yii binikpitib foolbooŋwu kaa làá nīn ŋān̄, ní bikpitiŋaliibi bí kii fitila un bíi kúùyee.

21 M-biki, fàŋkì ti-Dindaan nì ubɔti. Á taa nín nōotí binib bin là tikɔkɔ ń kpántée. 22 Di sá yii nnaabu làá jēetí bi-pu dicilpu dicilpu, ní ŋma nyí ditafadaaldi din bi-liitil bɔ́ntì bi-puee?

Biciŋfitiibi saŋkii iba mun

23 Biciŋfitiibi saŋkii iba mun gíti sɔ̀.

An kaa ŋān̄ unil ń sòoǹ kí pɔ̀ digàndi. 24 Ubɔsoonli yaa tùkū unikpiti yii: «A-bɔti ŋān̄ee», diniwul tòó-u mbusu, ní samaa kɔkɔ kíǹ ki ná-u. 25 Ama bin yaa kūū unikpiti bɔtee bí mmɔnni. Binib làá nīn mèé tiŋan ki bìintí bi-pu.

26 Unil yaa kíí tibɔti nì ibaamɔnee, u dàkā kubɔɔtiiu kumɔntiiu dee.

27 Tɔ̄ mmɔŋki tuuŋŋi kí dóó, kí bɔ́ntí asaatuun kí wàatī ní kí nín mā kudii.

28 Taa túń a-juti pu dibɔgabil fám. A là kí sòoǹ kí mɔ̄ntàaa? 29 Taa lì yii: «U nín ŋá-mi puee, míǹ ní m làá ŋá-u. M làá téeǹ-u tin u ŋée pu.»

Uwutijoodaan bimbim

30 M cōom̀ ki kpākaǹ uwutijoodaan ubɔ saaku, m kpākaǹ unil un kaa cáá dinyilee fiinyi sufii kpaabu. 31 M kpēēyee ikuŋkum di pée múkú an kɔkɔee, kumoou di nyáń ki jíń mpaan bukpaa kɔkɔnee, ataŋkpee gundi din māntìi tú-buee di dɔ̄ kitiŋee. 32 M nín ká mimmee ní m dākafì an pu, m kpēēyee ní an dàkā-mi tibɔti nee. 33 A là kí gèeǹ fiii, a là kí dáb́ fiii, a là kí dòon̄ fiii kí kpàl̄ iŋal. 34 A dɔ̄ mimmee ní disool ń cíliń a-pu kii unaayuuyee, ní falaa ń cúú-si kii bin fúkuĺ binibee.