Uciŋfiti Gbɔŋku 4

Ŋkúm sɔ́ǹ dimaŋfal

1 M gíti dáań ki ká mun yii diwɔ́bil bí kitiŋ pu doo tikpil. Bin bi wɔ́b̀ee bí ki gbòoǹ pɔ̀ɔɔɔ, ama ní báà ubɔ kaa bí kí ŋméeǹ-bi. Mpɔn kā bin sàantí-bee ŋaan, ní ubɔ kaa bí kí ŋméeǹ-bi. 2 Niinee m ká yii bin kpíìyee bí mmɔnni ki jítiǹ binifoobi. 3 Ama un baa láá màl̄ee úǹ gíti bí mmɔnni ki jítiǹ bitaŋkpiibi nì binifoobi. Di sá yii úǹ kaa ká atuŋkpiti ŋin bi tūǹ kitiŋ nee puee^a.

4 M ká mun yii unil gì ki là án bútí-u u-tuuŋŋi poon, kun puee u là kí jītíǹ u-juti ní. An mun kaa cáá taapu, an bí kii unil nín jì kubuŋu puee ní. 5 Ugbaan di kā ki kpàl̄ iŋal ní ŋkùm ń kpɔ̀-u. 6 Ama unil ń ká diŋuŋfil fiii sɔ́ ki jítiǹ á tɔ̄ ditundi din di sá kii bi nín jì kubuŋu puee kí gīī kí tin kpáàa lákatí a-ba puee.

7 M gíti dáań ki ká yii tibɔti tiba bí kitiŋ pu doo ki sá kii unil nín jì kubuŋu puee: 8 Unil di bí u-baba nì u-baba, kaa cáá ubɔɔtaaa, kaa cáá kibikaaa, kaa cáá kinabiki mun. An niliuee tūǹ ditundi kaa gbèentí kí mɔ̀tīí ká tigaajati. Ama ní u bàlifī u-ba yii: «Ŋma ní m tūǹ ditundi ki tìì ní? Ŋma pu ní m ŋmìntī m-ba mmɔn ní?» An mun bí kii unil nín jì kubuŋu puee ní. An sá dituŋfandi ní. 9 An sɔ́ binib ń nīn bí bili ki jítiǹ unil ń nīn bí u-baba, kun puee binib bili tundi nyēē nnyim ki jítiǹ unibaanti. 10 Di sá yii bi-kansikin ubɔ yaa lítèe, un kíǹee làá yòon̄-u. Ama unil un bí u-babee bɔti gbí isaa, kun puee úǹ yaa lítèe, ubɔ kaa bí kí yòon̄-u. 11 Míǹ mbaantiim, binib bili yaa kpáfì ki dɔ̄ee, an tùm̀ bi-pu ní, ama unil yaa dɔ̄ u-babee, u làá ŋá mana ní án nīn tùm̀ u-pu? 12 Bi ŋūǹ kí já kí pɔ̄ɔkiǹ unibaanti sɔkɔmii, ama an yaa sá binib bilee, an pɔ̄ɔ̄. Dipal din bi dū iŋmii ita ki pàal̄ee kaa tìfī sɔkɔmii.

13 Campɔnti un sá usoodaan ki cáá iciinee sɔ́ǹ ubɔtigbaan un púĺ kaa ti kíikí bí sāŋkì-uee. 14 Báà campɔnti gbanti yaa nyánní sarkan ki kpántì ubɔti àá u yaa mèé u-beelin ki kāntí ki jīǹ, 15 m ká yii kitiŋ nee puee, binib kɔkɔ làá nīn bí campɔnti gbanti jaaŋŋu pú ní ú dāá fōō ubɔtikpikee yil kí kàl̄ dibeel. 16 U làá kpántí dinibukpaandi bɔtiu ní. Ama bin làá dāá páań u-boonee kaa dāa gíti bí dipɔɔpindin u-pu. Di sá yii tíǹ gbanti kɔkɔ sá fám ní ki bí kii bi nín jì kubuŋu puee.

Taa nín sòoǹ ki bùsī anyɔɔbun Unimbɔti nimbiin

17 A yaa cá Unimbɔti diikunee, á nīn nyí nì a-ba. Á nīn cáá nlandɔkɔ yii a cá niin kí pīlifì ní. Míǹ sɔ́ǹ á cù niin kí ŋá bigbaambi saraau. Di sá yii bíǹ kaa nyí yii bi bíi ŋáań tin kaa ŋān̄ee^b.