Uciŋfiti Gbɔŋku 5

1 Á dàkafì tiŋan kí wàatī kí nín sòoǹ, kí taa jìkì kí pòon̄ Unimbɔti ipoon. Di sá yii Unimbɔti bí yilpu ní sii bí kitiŋ pu. An puee á taa nín̄ sòoǹ tikpil. 2 Unil yaa dàkafī tikpilee, u dámintí tidamintiil ní, ní un sòoǹ tikpilee sòoǹ tibɔfan^a. 3 A yaa pōoǹ Unimbɔti ipoonee, taa tàan̄ kí ŋá tin a pōoǹ-uee. Di sá yii Unimbɔti kaa gèetíǹ bin ŋáań tibɔti kaa dàkafēe. An puee a yaa pōoǹ-u puee, á ŋá míǹ. 4 An sɔ́ á taa pōoǹ Unimbɔti ipoon ki jítiǹ á pòon̄-u ní kí taa ŋmā kí ŋá tin a pōoǹee. 5 Taa yàntī a-nyɔkɔ ń ŋmátí-si á ŋá ikpiti ki dāa gíti cá ki tùkù usaraaŋal yii: «M sòon̄ ki yīntì ní.» An yaa sá fám, Unimbɔti làá gíí a-pu diŋuul tin a sòon̄ee pu, ní kí nàan̄ a-tuuŋŋi kɔkɔ. 6 Unil yaa dámintí tikpilee, u sòoǹ tikpil ní an kaa cáá taapu. Míǹ puee fàŋkì Unimbɔti.

Biyidambi cáá bi-pɔŋŋu ki tūǹ atummɔnti

7 A yaa ká kitiŋ kiban bi bí ki wɔ́b̀ unandaan, kaa nóó marab nì ibaamɔn saŋŋuee, án taa ŋá-si bitii. Di sá yii ukàlinjakpaan ubɔ yaa bí yilpuee, ukpil ubɔ di bí ki wúń u-pu, ní bi-liitil cáá bikpikpaambi bin mun wúń bi mun puee. 8 Ama kitiŋ kíǹ kèetī báà ŋma ní. Tikpaal kèetī ki kpáaǹ ubɔti.

Tigaajati kaa sá tiba

9 Unil un néeń animbilee kaa díkì animbil, míǹ ní un néeń tigaajatee, tin u cááyee kaa fáatiǹ-u. Tinee mun sá kii bi nín jì kubuŋu puee ní. 10 Unil yaa cáá tigaajati tikpilee, binib bin jīǹ-tèe mun wīikí ní. Mimmee ipaati ilai ní udaan cáá, an yaa kaa sá ú nīn cáa kɔ̀ntī u-nimbiliŋ? 11 Utɔntɔnli yaa cáá tikpil kí jāaa, u yaa cáá fiii kí jāaa, u gèeǹ mmɔntiim ní. Ama ugaaja úǹ kaa ŋūǹ kí gèeǹ, kun puee u cáá tigaajawan tikpil. 12 M dáań ki ká dinimbinaamandi bɔti tiba kitiŋ pu doo. Kijapaai kiba di kpáafì tigaajati ki yóoǹ, ní tigaajatee dāa cáań-u nnaabu. 13 U dū tigaajatee ki túń ditundi diba ní ki lítì. U dāa màl̄ kibininjabikee, waa ti cáá báà tiba nì tiba. 14 Kii u nín nyánní u-na poon dicancaŋgbeel puee, míǹ ní u làá fàtīí gítí. Waa pée páatì u-tundi pu, kaa làá ŋmā kí kpáaǹ báà tiba. 15 An sá nnaabukpaan ní ki tīī-u. U làá yīkì kitiŋ nee pu kii u nín dɔ́miń puee. U túń ditundi ki tīī kubuŋu dee^b. 16 Kí kūtèe, u-maŋfal wiiŋyi poonee, u ká agìń tikpil nì kunimbaau nì diŋuul nì diwuŋyɔtil. 17 An puee man nín dàkafī puee di sá yii tin ŋān̄ ki tīī unilee di sá ú jī, kí nyɔ̀ ní kí jī u-tundi pu u-maŋfal wiiŋyi in Unimbɔti tīī-uee. Unil gìńdi paatii dee. 18 Unimbɔti yaa pú unil diyimɔɔl ú nīn cáá animbil nì tigaajawanee, ú jī tin Unimbɔti tīī-uee pu, an dàkà yii u-tundi paati. Unimbɔti di pú-u. 19 Niinee ní ú súntí yii u-maŋfal wiiŋyi kaa náaǹ, kun puee Unimbɔti tīī-u dipɔɔpindi.