Unaacimpɔɔn
4
1 A ŋān̄ kunyaaŋŋu, m-bɔɔn,a ŋān̄ kunyaaŋŋu!
A yaa dū a-ŋaabiiŋkaaŋu ki bīiǹee,
a-nimbiliŋ ŋān̄ kii dibeenanjilee ní.
A-yikpiti nín dɔ̄ puee bí kii
kuŋɔcaŋkpuŋu di kpákatiń
Galaadi jool puee.
2 A-nyiŋŋi pīiǹ káŋkaŋ kii ipii in
bi dáá cáń i-kuti ki fùl̄-iee.
Dinyindi kamaa cáá di-ŋaliŋu ní,
báà dibaba kaa fúkutì.
3 A-nyunculiŋ ŋān̄ kii kiŋaamaŋee,
ní a-nyɔkɔ cáá kunyaaŋŋu.
A yaa dū a-ŋaabiiŋkaaŋu ki bīiǹee,
a-taŋkpunti bí kii kpakpaapu
un bi búkutì milee poon nín bí puee ní.
4 A-sil bí kii Daafiidi difɔkɔku
kun bi máń ku yú ki pɔ̄ɔ̄ jìbuee ní.
Niin ní agbampɔɔ kutuku sàkā.
Bibaatandambi kɔkɔ janjawanti dee.
5 A-biiŋi bí kii aŋɔbil alee,
a lì kii ipeeman in bi màl̄ ŋwimbaanti,
i yú nsupumpukum kansikin ki jīǹee.
6 Kí wàatī kutaa ń ŋàatī,
ní mboon ń lítí kitiŋ puee,
m làá cù miiri jool pu,
ní kí cù talaalu tūukaa gbantaŋki pu.
7 M-bɔɔn, a baasii ŋān̄ kunyaaŋŋu ní,
a-laaba kaa pée wɔ̀b̄.
8 M-bɔɔn, nyānní Leebanɔn jooŋŋi pu kí dāan̄ m-cee,
dāan̄ m-cee.
Kpákatiń Arimina nì Seeniir
nì Eermɔn jooŋŋi pu.
Nyā gbikintib kɔŋkooŋyin
nì igbii jooŋŋi pu.
9 A yāntì maa ti yì m-ba
m-niisal, m-bɔɔn,
a yaa pée fātìi kpēē-mi yéè
ní m yaa ká a-leeŋkaati dimbil diba jee,
maa ti yì m-ba.
10 A-neendi tìì-mi mmɔn,
m-niisal, m-bɔɔn!
Dì mɔ̄ m-cee ki jítiǹ ndaam pu gba!
A-talaalub sɔ́fì ki jítiǹ
talaalumɔntiibi kɔkɔ.
11 M-bɔɔn, m yaa móotí a-nyunculiŋee,
an mɔ̄ kii tisiilee ní.
Tisiil nì nnaabiim bál̀
ki kā a-limbil pu.
A-wampeeŋkaati sɔ́fì kii
Leebanɔn bambaŋku sɔnsɔfiŋuee ní.
12 M-niisal, m-bɔɔn,
a sá bukpaa bun man baba yèe ní,
man baba nyimbulnimbil,
nnyimbul ŋun m pīiǹ ki kpàl̄ kpálkpalee.
13 A sɔ̀m̀ fílfil kii yilpu beel sufii
in biliŋ mɔ̄ cɔ́ncɔŋee.
Niin ní isufi in sɔ́fèe nyēē.
Íǹ di sá eenee nì naar,
14 nì safran nì looriyee nì kanneel
nì isufi in kɔkɔ bi cáa ŋáań talaalu tūukaayee,
nì miiri nì disaaweendi
nì talaalub bin sɔ́fì tiŋan tiŋanee.
15 A sá nnyimbul ŋun dɔ̄
bukpaa kansikinee ní,
dinyimbunimbil din nyim wāĺ kílkil
ki pùubìń Leebanɔn jooŋŋi puee.
Usapɔɔn
16 Fìntim̄, ŋgan pú buŋku!
Dāan̄ malaa ŋgiil pú buŋku!
Dāá jītí m-kpaabu pu
bú gbìtī bu-sɔnsɔfiŋu!
Sii un m néeńee,
kɔ́ a-kpaabun
kí ŋmɔ́ bu-subimɔntiŋ!