Saloomɔn Laŋŋu 5

Unaacimpɔɔn

5

1 M kɔ́ m-kpaabun

m-niisal, m-bɔɔn.

M kītì m-subu bun bi yíì miiree

nì talaalu sufii iba mun.

M ŋmɔ́ m-sigbandi nì m-siiti,

ki nyùn̄ m-daam nì m-naabiim.

Bibɔɔtiibi

«M-bɔɔbi, jī kí nyɔ̀maan

kí gbímaan dineendi.

Waa pīitì-u kipunyɔkɔ malaa

Usapɔɔn

2 M dɔ̄ ki gèeǹ,

ama m-pɔbil kaa gèeǹ.

M gbìl̄ kuwoou kubɔ pu,

an sá un m néeńee di bíi fátí kipunyɔkɔ.

Unaacimpɔɔn

Pìitī-mi, m-niisal,

m-bɔɔn, m-beenanjil, unyaan.

Dimalindi tɔ́ ki sɔ̄ŋkì m-yil gbàtii,

ní kunyeeu sɔnsɔm sɔ̄ŋkì m-yikpiti.

Usapɔɔn

3 M pēetì m-bɔkutil,

maa là kí gíiǹ-dì kí pèen̄!

M fíntì m-taaŋi,

maa là kí kɔ́ǹ-ŋi tijɔkɔndi.»

4 Un m néeńee dū u-ŋal ki bɔ́

dikampiil buŋŋun

ní m-pɔbil máĺ.

5 M yíkì kí pìitī-u.

Talaalu kpam min bi yíì miiree

nìn gbí m-ŋaan

ní ŋkpamee mèetī m-ŋambiyaamu pu

ki tōontí dikampiil kpàlkaati pu.

6 M pīitì un m néeńee,

ama ní u fātì u-boon ki tīī-mi,

ki búntì.

M nyáń kí nyàab̀-u.

M nyàab̄-u ama kaa ká-u,

ki yíiń-u ama waa kíí-mi.

7 Ama m tú bijanjaliibi bin cí kitiŋ

ki màntī ki kpèé-kèe

kitiŋ gundi pu.

Bi cúú-mi ki gbáń ki ŋá-mi tiweendi,

bi cúú ŋŋaabu ŋun pá m-gbigbil puee ki fōō.

8 Jeerusaleem sapɔmbi

m gbāam̀-ni:

ni yaa ká un m néeńee,

ni làá tùkù-u yii ba dee?

Ní tùkù-u yii

m būǹ dineendi weeŋŋu.

Bisapɔmbi

9 Sii unimpunyaan,

ba pu ní a bàlifī-ti tin bí nee?

Un a néeńee, ba ní u cáá

ki jítiǹ bin kíǹee ní?

Ba ní u baasii cáá ki jítiǹ-bi ní?

Usapɔɔn

10 Un m néeńee yaa sáká bininjab

kutukub saalaa kansikin,

bi béetí-u ní.

Di sá yii u-wunti máǹ ní ki jìl̀.

11 U-yikpiti bí kii sindaariyee ní,

ní ki gɔ́liḿ gɔ́liḿ kii tikpakpatee,

ní ki bɔ̀ǹ kii kunaambɔŋŋuee.

12 U-nimbiliŋ jìl̀ kii dibeenanjil

di bí mbun caŋinee.

Di tɔ́kɔ́ kusampeeu nyɔɔgbandi

ki fùul̀ nnaabiim poon.

13 U-taŋkpuŋŋi bí kii

talaalu sufii kpaabuee ní.

U-nyunculiŋ bí kii nsupumpukum

min pu miiri kpam còol̀ee ní.

14 U-ŋalii bí kii sindaariya bɔmbiliŋ

ŋin bi dū ataŋkpanyaan ki nyáantèe.

U-wunti jɔ̀m̀ pɔ́lpɔl kii dikuntinyindi ní

bi dū ataŋkpanyaan ki nákáǹee.

15 U-taaŋi bí kii jaantalkub bin

bi dū ataŋkpee ŋin jɔ̀m̀ pɔ́lpɔl ki nákáǹ

an tɔ́kɔ́ sindaariya nyeel puee.

Un m néeńee ŋān̄ kii Leebanɔn jooŋŋee ní,

waa cáá juti kii seedir subuee.

16 U-nyɔkɔ mɔ̄ dimootil,

ní u-wunti kɔkɔ nín bí puee kóò-mi.

Jeerusaleem sapɔmbi,

un m néeńee nín bí puee dee!

M-bɔɔ nín bí puee dee!