Yeesaya 7

Yeesaya dū ti-Dindaan bɔti ki tùkū ubɔti Akaasi

1 An nìn sá ŋyunti ŋun ní Akaasi, Yootam jipɔɔn, Oosiyasi naantiiu nìn sá Juuda bɔtiuee ní. Aram bɔtiu Reesiin nì Reemaliyawuu jipɔɔn Peekaa un nìn sá Isirayeel bɔtiuee nìn cūtì kí já nì Jeerusaleem tiŋki, ama baa nìn ŋúń ki jáń ki fōō-kì^a. 2 Bi tùkū Akaasi un sá Daafiidi naantiiuee yii: «Aram yab bāań ki bí Eefiraayiim tiŋki pu.» Ubɔti nì u-yab nín gbìl̄ mimmee ní an cīŋkì-bi kii kubuŋu nín cìŋkī kubambaŋŋun sufii puee.

3 Niinee ní ti-Dindaan tùkū Yeesaya yii: «Sii nì a-jipɔɔn Seeyaar-Yasuub ń nóó á cù kí ká ubɔti Akaasi. U bíń kunyiŋfuŋu kun bi cátì nnyim dì ki kóò dinyimbɔbil din bí yilpu púee kúntilaŋki, didandi din cá biwaŋfintiliibi kpaabunee watil pú. 4 Á tùkù-u yii: <Kàl̄ soooo, taa fàŋkì báà tiba. Taa yàntī diŋuul din uaranja Reesiin nì Reemaliyawuu jipɔɔn gííyee ń bīil̀ a-pɔbil. Bi sá kii aŋmisaatee ali ŋin bí ki dùkù ŋŋminyiimee ní. 5 An sá tiŋman yii Aram yab nì Eefiraayiim yab nì Reemaliyawuu jipɔɔn pūtì a-pu ki lī yii 6 'Tí cù kí já nì Juuda beel yab kí fàaǹ-bi. Tí páb́-bi bí kūtì ti-pu, ní tí dū Taabeel jipɔɔn kí kàan̄ dibeel bi-tiŋki pu.' 7 Ama ti-Dindaan Unimbɔti di lī yii:

'Án kpá kí ŋá míǹ jaanjaan!

8 Di sá yii Aram tiŋyil di sá Damaasi,

ní Reesiin sá Damaasi bɔtiu.

An kíǹ abin imuŋku ita nì aŋmoo,

Eefiraayiim nibul làá kúntí kitiŋ pu'.

9 Eefiraayiim tiŋyil di sá Samaarii,

ní Peekaa sá Samaarii bɔtiu.

Ni yaa kaa máká ti-Dindaan pu, naa làá ŋmā kí yūĺ.>»

Eemanuyeel daaŋku

10 Ti-Dindaan gíti bí Akaasi yii: 11 «Bàlifì ti-Dindaan a-Nimbɔtiu ú tīī-si kudaaŋŋu kubɔ. Kú nyānní taapu ditaŋkpiilin àá kutagbɔŋu yilpu.» 12 Ama ní Akaasi kíí yii: «Aayee, maa làá bàlifì kudaaŋŋu kubɔ pu ní kaa nín cɔ́ŋkì ti-Dindaan.»

13 Niinee ní Yeesaya bí-u yii: «Pīlifìmaan, Daafiidi dicaŋkun yab. Kéè ni nyántì binib naŋki an kaa ŋmāntiǹ-ni ní ni là kí nyāntí man Nimbɔtiu mun naŋkaa! 14 Too, ti-Dindaan u-ba làá tīī-ni kudaaŋŋu kubɔ. Usapɔɔnee làá dāá cáá dipool kí màal̀ kibininjabiki ní kí dāá pɔ̄-kì diyindi yii Eemanuyeel, taapu di sá yii <Unimbɔti bí ti-cee>^b. 15 An bikee jikaati di dāa sá nnaabiim nì tisiil kí cáá sāā ŋyunti ŋun ní kì làá béé kí gàntī tin kaa ŋān̄ee nì tin ŋān̄ee. 16 Kí wàatī kibiki gbanti ń béé kí gàntī tin kaa ŋān̄ee nì tin ŋān̄eeyee, bibɔtiibi bili bin a fàŋkí nee nib làá dāá yīkì kí fá bi-timmu. 17 Ama ti-Dindaan làá tɔ̄ sii nì a-nibul nì a-dicaŋkun yab pu nnaabu ŋun naa láá ká ki ká doooo ŋyunti ŋun ní Eefiraayiim beel cúu yākatì nì Juuda beelee. Asuur bɔtiu di làá dāá ŋá míǹ.»

Binannanliibi làá lúuń-ni kí jī ni-tiŋki

18 Ŋyunti gbantee, ti-Dindaan

làá dāá búń kiwulii kí yíiń

isii in bíń laakin Niil mɔɔl cá ki kóò tiŋkunee,

nì inaŋgbansii in bíń Asuur tiŋkinee.

19 I-kɔkɔ làá dāan̄ kí nákań nákań

atantaka bɔbiliŋ poon,

nì itaŋkpalɔkɔ poon,

nì nsugboomu kɔkɔ pu,

nì anyimbɔbil kɔkɔ poon.

20 Ŋyunti gbantee, ti-Dindaan

làá dāá fōoń bɔlfi

Eefiraati mɔɔgbandi lapu pu yal cee.

Asuur bɔtiu dee.

U làá dāá kòol̀-ni abaakpan

nì ni-wunti kɔkɔ kuti

ki kpáaǹ ni-nyimpuliŋ.

21 Ŋyunti gbantee, báà ŋma

làá dāá pée kpàà

unasal ubɔ nì iŋɔsal ili ja ní.

22 I làá dāá tīī nnaabiim tikpil

unil ń ká kí nyɔ̀.

Bin kɔkɔ làá dāá kíń kitiŋ nee puee,

nnaabiim nì tisiil ní bi dāa jīǹ.

23 Ŋyunti gbantee, bukpaa bun poon

ní bi yaa láa cóoǹ fiinyi sufii kutuku,

ní i-daaku sá animbil jitɔmbi kutukuee,

ikuŋkum nì abɔjanaakun di dāa jīǹ bu-kɔkɔ.

24 Bi dāa ŋúbiń butɔbu nì ipiin

ní kí dāá kɔ́ bu-poon kí kpāŋkì,

di sá yii kitiŋ nee kɔkɔ

dāa kpántí ikuŋkum nì abɔjanaakun ŋma ní.

25 Ikuŋkum nì abɔjanaakun puee,

ubɔ kaa dāa gíti cá ŋgbantamu

mun pu bi nìn kù nì akooyee.

Mu làá dāá kpántí laakin bi dāa

gbìntī inaa kí líí, ní ipii tɔ́ i-ba ki yìiǹee ní.