Mpèé ŋun kaa fáatì Unimbɔtee
30
1 Ti-Dindaan di lī yii:«Mbusu dɔ̄ ki cí nimbi pɔɔgaatib.
Ni bɔ́ntí kí ŋá tin kaa nyánní m-ceeyee.
Ni ŋáań ipèé in kaa kā m-naŋki puee,
ní ki ŋáań ikpiti ki kútí ikpiti pu.
2 Ni nín cá Eejipiti tiŋkinee,
naa bālifì-mi ki wāatì.
Faaroo cee ní ni nyàab̀ diwundi,
ní ki sáń kí kɔ́ Eejipiti tiŋki booŋŋun.
3 Ama Faaroo wundee
làá dāá kɔ́ǹ-ni icoo ní,
Eejipiti tiŋki booŋŋuee
làá dāá yàntī ní fá ni-jilmau.
4 Ni-kàliŋkpilib bí Soowan tiŋkin léelee,
ni-tuuŋyi mun bàn̄ Aneesi tiŋkin.
5 Ama icoo làá cúú bi-kɔkɔ
dinibul din kaa ŋūǹ kí kèetī-bee pu.
Eejipiti yab kaa ŋūǹ kí tūtuǹ-bi,
kaa làá cáań-bi ipaati iba.
Kun bi pée ŋūǹ kí tīī-nee di sá bí kɔ́ǹ-ni icoo,
ní kí yàntī ní fá ni-jilmau.»
Bin cá kí dāń ditutundi Eejipiti tiŋkinee bɔti
6 Tiwaŋkuti tú tiwan ki còom̄ ki pùntī Neegeeb teeku.
Ku sá kunimbaau nì dinimbinaamandi tiŋki ní.
Igbikintinakpil nì ijaa,
ikoowaati nì tipeebilindi tin ŋàaǹee kóò niin ní.
Mmamu tú bi-gaajawanti mu-booŋyi
ní igutaamu tú bi-gaajati i-guliŋ pu,
ní bi cáǹ kí tīī dinibul din kaa làá kèetī-bee.
7 Eejipiti tiŋki jòońdi bí kii kubuŋuee ní,
dàa bí tiban.
An puee ní m páaǹ-kì diyindi yii:
«Rakaab un kaa ŋáań báà tibee».
Foolboon pu bɔkpaafikaati
8 Ní ti-Dindaan bí Yeesaya yii:
«Kɔŋkɔnnee, dū tibɔti nee
kí ŋmà kutaŋkpapiliŋu pu,
kí dū-tì kí ŋmà kugbɔŋu poon
Jeerusaleem yab nimbiin.
Án di làá nīn sá foolboon
seera kí nīn cá jaanjaan.»
9 Bi sá dinibul din
jáà nì ti-Dindaanee,
ki sá binyimɔndambi,
binib bin yíití kaa pílifí
ti-Dindaan dakalee.
10 Bi lì Unimbɔti bɔnaatiliibi yii:
«Ní taa ti ká aleedaka.
Ní taa nàatī-ti tin sá tibɔŋmanee!
Nín̄ sòom̀maan nì ti tin di mɔ̄ dipilifilee,
nín̄ nàatīmaan-ti tinyimɔmbɔti.
11 Ní sútímaan kí wàatī nsammɔnti,
ní fàtīmaan ni-boon kí tīī nsan ŋun tèen̄ee.
Ní taa ti sòoǹ nì ti Isirayeel Circir Nimbɔtiu pu!»
Isirayeel tiŋki làá pée wīī ní
12 An pu ní Isirayeel circir Nimbɔtiu lī yii:
«Ni dū m-nyɔɔbundi ki fá.
Ni máká bin ŋáań tipɔmbɔtee nì binyimɔndambi pu,
ní ki kíǹ ki báká bi-pu.
13 Diyìntil gbanti làá nīn sá ni-cee
kii diguŋfɔkɔl din di fáá ŋwèeńee ní.
Digul diba làá tɔ̄ digundee pu
ní dí wùtī dicilpu dicilpu.
14 Digundee làá wīī
kii uyɔɔmaati boolee ní.
Baa ti ŋūǹ kí ŋá mbamin.
Baa ti ŋūǹ kí ká kikalii
kí dūú mɔ́fí ŋŋmi ŋfannaaa,
kí dūú jōō nnyim nnyimbunni.»
Ní kàl̄maan soooo kí nīn máká m-pu
15 Di sá yii ti-Dindaan Mpɔŋkɔdaan,
Isirayeel Circir Nimbɔtiu bí yii:
«Ni yaa kaa fātìi gítìń m-cee
ki kāl̀ soooo,
ni pée kpá kí ká difiil.
Ni-pɔŋŋu kɔkɔ di sá yii
ní cúú ni-ba soooo
ní kí nīn máká man pu.
Ama ní naa là míǹ.
16 Ni lì yii:
<Aayee! Ti làá kàl̄ itaamu kí sāǹ.>
Tiŋman, ni làá lafun sāǹ.
Ni lì yii: <Ti-taamui yáb̀ ní.>
Too, bin làá dāá jà-nee mun dāa yáb̀ míǹ ní.
17 Bi-kansikin ubɔbɔ yaa láa kpìl̄
nimbi binib kutukuee,
ni-wunti dāa gbáà ní kpàkpakpa.
Binannanliibi binib biŋmoo ja di dāa kpìl̀-ni
ní ni-kɔkɔ ń sāǹ kí kátí.
Ni-kansikin bin làá dāá kíńee
dāa bí kii kudaaŋŋu ŋaabiki di cɔ́ dijool puee,
a lì kii kiŋaabiki di cɔ́ kigbantaŋ yilpuee.»
Difiil yuntiŋu
18 Nì míǹ kɔkɔee ti-Dindaan
cí ŋyunti ŋun ní u làá ŋá-ni tiŋanee ní.
U làá dāá yīkì kí sɔ̄ ni-saai,
di sá yii ti-Dindaan sá deedee Nimbɔtiu ní.
Binib bin máká u-puee
kɔkɔ bí mmɔnneeee!
19 Tiŋman, sii dinibul din kóò Siiyɔn jool puee,
sii dinibul din kóò Jeerusaleem tiŋkinee,
a kpá kí gíti sɔ̄ jaanjaan.
A yaa láa kúuǹ ki yíiń ti-Dindaanee,
u làá dāá pīlifiǹ-si,
u yaa láa gbìl̄ a yíiń-uee,
u làá dāá kíí-si.
20 A yaa láa bí dinimbinaamandinee,
ti-Dindaan làá dāá tīī-si tijin á jī.
U làá tīī-si nnyim
diwɔ́bil yuntiŋu á nyɔ̀.
Un sá a-dàkaliuee
kaa làá ti báĺ.
A làá dāá ká-u nì a-nimbibulii.
21 A làá dāá gbìl̄ nneel ŋubɔ sòoǹ nì si a-boon pú yii:
«Kpèè nsan ŋun a máaǹ kí dī
kí cù ŋŋaŋgan pú àá ŋŋaŋgiil púee sɔ̀.»
22 Awaa ŋin a kpítì ki dū animbil kúti ki nyūntèe,
nì ŋin a mɔ́ɔ́ ki dū sindaariya ki nyūntèe
làá dāá kpántí ni-cee tijɔkɔŋwan.
A làá dāá dū-ŋi kí fá kii titampummoolee
ní kí lì-ŋi yii: «Nyāmaan doo!»
23 U làá dāá yàntī utaa ń nì
iwambool in a búĺee pu.
Tijin tin làá lòoǹ a-tiŋki puee
làá dāá nīn wīikí tikpil kí nīn ŋān̄.
Ŋwiin gbantee, a-waŋkuti làá cù
kunaakpaapɔɔu kun wāāyee poon kí jī.
24 Inaa nì mmamu mun kù a-satee
dāa ŋmóò timool tin bi ŋmālim̀ ŋyaamee ní.
Bi làá dāá nīn cáá peela nì adɔpantampal
ní ki kàfī timool gbanti ki yàantí kitiŋ.
25 Ŋwiin ŋun bi làá dāá bɔ̀fì binibee,
sintil difɔŋfɔkɔŋi yaa láa lítèe,
mbùmbiyaamu làá dāá pùub̀ ajoon nì ŋgbantamu pu.
26 Ŋwiin ŋun ti-Dindaan
làá dāá póob́ u-nibul buuŋyi
kí cáaǹ tiweendi tin bi fōōyee,
uŋmal làá dāá nīn wāĺ kii ŋwìińee ní,
ní ŋwìiń walifiŋu ń dāá nīn pɔ̄ɔ̄ miluli pu
kii iwìiń iluli walifiŋuee.
Ti-Dindaan làá dāan̄ kí dáaĺ Asuur tiŋki tafal
27 Kpèè, ti-Dindaan di páaǹní ndanee.
U-ŋuul fòolìń lìblib ki pɔ̄ɔ̄ kpaŋkpam.
U yaa sòoǹee, diŋuul bí u-nyunculiŋ pu,
ní u-limbil bí kii ŋŋmi ŋun wù ki céetí tikɔkɔee.
28 U-fooku bí kii mbun ŋun gbí
ki sāā unil neenee.
U dòoń kí cìŋkì atimbun ŋkpitim pu.
U làá kpàl̄ anibul nyɔmmu tikúti
kí nīn cáá-bi ki yìiǹ laakin baa lèe.
29 Nimbi Jeerusaleem yab, ni làá nīn bí ki gà ilan kii ni bí jiŋaal poon kunyeeuee. Ni làá dāá nīn bí dipɔɔpindin kii bi búǹ awul ní ni còom̄ ki yìkintí ki cá ti-Dindaan jool pu, Isirayeel Taŋkpanaakooku ceeyee.
30 Ti-Dindaan làá yàntī bí gbìl̄
u-neel ŋun sá ŋkpaanee pu,
ní kí yàntī bí ká u-ŋal pɔŋŋu.
U làá dàkà u-ŋuukpaandi
aŋmilimbil ŋin wù ki céetí tikɔkɔee poon,
ní kí yàntī utaa ń tɔ̄, utaaja ń nì
ní ataanyiŋkumbil ń lítí.
31 Ti-Dindaan neel làá yàntī
dinyoondi ń kɔ́ Asuur yab,
u làá dāá dū u-dɔŋu kí fáá-bi.
32 Ti-Dindaan yaa láa fáá-bi ndɔee, ní bí dāá bɔ̀ɔ̀ ŋgaŋgamu nì tibati. U làá dāá yòon̄ u-ŋal yilpu ní kí já nì bi.
33 Bi pée bɔ́ntì ŋŋmi dooooyee,
ŋŋmi gbanti sá ki tīī ubɔti mun.
Mbòó ŋun wāā ki nyóòyee poonee,
bi dū idɔ tikpil ki bíl̀ dikuŋkundi kí kpāā ŋŋmi.
Ti-Dindaan fooku kun bí kii farwata ŋmiŋuee
di làá dāá fōō idɔee
kii farwata di kpáatìi sītì di-puee.