Yeereemii 2

Isirayeel yab dū bi-Nimbɔtiu ki fá

1 Ti-Dindaan sòon̄ nì mi yii: 2 «Cù kí sòoǹ nì Jeerusaleem yab án kɔ́ bi-tafaliŋin.

Man bi-Dindaan nín lī puee sɔ̀.

M téetí a-pɔntinee, a nín nìn cáá

m-pu dineeŋkpaandi diŋyee.

Dineendi gbanti nìn bí kii

unil nín néeń u-bɔɔn puee ní.

A nìn nóó-mi kuteeun

laakin tiba nì tiba nìn kpée.

3 Di sá yii sii Isirayeel,

a nìn sá ki tīī man a-Dindaan baba ní,

a lì kii tijincɔ̀fikaalee.

Bin yaa nìn lámintì ki gbēē-see nìn kóò m-bɔtin

ní ḿ yàntī nnaabu ń jēetí bi-pu.»

Ti-Dindaan di lī míǹ.

4 «Nimbi Jaakɔb naantiibi,

nimbi Isirayeel maaliŋun yab kɔkɔ,

pīlifìmaan ti-Dindaan bɔti nee.

5 Ti-Dindaan nín sòon̄ puee sɔ̀.

Diyìntil dilal ní ni-naanjab ká m-pu,

ní ki sáǹ ki wāatì-mi ní?

Bi sáǹ ki jòó ki pá tin kaa bí tibanee boon,

ní bíǹ bi-ba kpántì tin kaa bí tibanee.

6 Baa bālifì yii:

<Ti-Dindaan un nyántìń-ti

Eejipiti tiŋkinee,

úǹ un kpōotì-ti kuteeun

laakin kūń ki sá mbuŋgalimuee,

ŋweel nì dibɔmbɔndi tiŋkee,

kitiŋ kin báà ubɔ kaa kóòyee bí la?>

7 M nìn cáá-ni ki kɔ́ǹ kitiŋ kin cáá ntiŋkpamee poon,

ní ŋmɔ́ ki-subiliŋ kí jī ki-gaajawanti.

Ama ni bàn̄ee ní ki kɔ́ǹ m-tiŋkee tijɔkɔndi,

ní ki dū m-gaajawammɔntiiti ki kpántì ntimbiil wanti.

8 Bisaraaŋaliibi kaa bālifì yii:

<Ti-Dindaan bí la?>

Bimaradakaliibi kaa nyí-mi,

ní bikpootiliibi jáà nì mi.

M-bɔnaatiliibi bí ki nàatī diwaal Baal bɔti,

bi jòó ki pá tin kaa bí tibanee boon.

9 An pu ní m làá cùnnì-ni ibɔsoon,

ní kí cùnnì ni-naantiibi mun ibɔsoon.»

Man ni-Dindaan di lī míǹ.

10 «Dùtīmaan Kitiim buŋyi kí cùú kpèè!

Tɔ̄maan binib bí cù Keedaar tiŋkin kí bàlifì kí béé tiŋan.

Ni làá ká yii baa ŋáań tin ni ŋáań nee niin.

11 Dinibul diba kpántì di-waaŋi ni káaa?

Nì min kɔkɔ awaa gbanti kaa kpáàa sá Unimbɔtee!

Ama m-nibul díǹ dū di-nyooti

ki kpántì tin kaa bí tibanee.

12 An puee, kutagbɔŋu, yàntī án ŋá-si bitii,

kí kɔ́ǹ-si dinyoondi nì tifaandi.

Man ni-Dindaan di lī míǹ.

13 M-nibul ŋá ikpiti mili pu:

bi dū man un sá nnyimbul

ŋun tìì dimaŋfalee ki fá,

ki cūtìi gbìn̄ anyimbɔbil ŋin tátì

nnyim kaa ŋūǹ kí dòon̄ poonee.»

Unil yaa fá Unimbɔtee, an kpántí ntuntun ní

14 Isirayeel yab kpántì iyumbu naaa,

bi màl̄-bi kuyuŋun ní?

Kin ba pu ní bi fúkúl̀-bi míǹ?

15 Bíǹ pu ní gbikintib mùuǹ ki tátée.

Bi yāntì bi-tiŋki kpántì adigbun.

Bi sēē bi-timmu ŋŋmi

ní báà ubɔ kaa ti kóò mu-ni.

16 Áli gba Meemifiisi yab nì Dafinee yab

kōol̀-bi diyibaakpandi.

17 Isirayeel, tíǹ gbanti kɔkɔ kaa nyánní a-ceeee?

Man a-Dindaan a-Nimbɔtiu nìn ŋúb́-si ní ti còom̄,

ama ní a dū-mi ki fá.

18 Kɔŋkɔnnee, a yaa cūtì Eejipiti tiŋkin

ki nyùn̄ Niil nyimee, án làá kūtì-si ba?

A yaa cūtì Asuur tiŋkin

ki nyùn̄ Eefiraati nyimee, a làá páatí ba?

19 Fōō ikpiti in a ŋée tafadaaldi!

A nín kaa yúl̀ nì mi deedeeyee kpuulool ń gítí a-pu!

Ŋyunti gbantee, a làá wāl̀ kí béé yii

unil yaa dū man u-Dindaan u-Nimbɔtiu ki fée,

u jīǹ falaa ní án píĺ-u fíŋfiŋfiŋ.

Tiŋman, aa ti kpáàa fàŋkí-mi.

Isirayeel yab sá kii unimpu un nyáń u-cal boonee

20 Ti-Dindaan bí yii:

«Isirayeel, dooooyee ní a yíkì kaa kíí a-ba pu.

A kpītì mpèé ŋun nìn bí man nì si kansikinee

ní ki bí yii: <Maa ti là kí nīn sá uyumbu>.

Di sá yii ŋgbantamu mun fɔ̀kɔ̀ee kɔkɔ pu

nì isufi in cáá tifaasɔnee taapu

ní sii dɔ̀ ki ŋáań a-laakpaatuuŋŋi.

21 M nìn cóoǹ-si á nīn sá bufiinyisumɔntiibu

bun pu bi ŋūǹ kí nīn mákée ní.

Kpèè a kpántì difiinyileendi din biliŋ gàm̀ee,

an ŋá mana ní ki ŋá míǹ?

22 Báà a yaa dū njeem ki fíntì a-ba,

ní ki dū fɔfɔb tikpil tikpil ki fùl̄,

a-yìntitam daaŋku làá nīn gbíntìi dɔ̄ m-nimbiin ní.»

Man a-Dindaan a-Nimbɔtiu di lī míǹ.

23 Mana ní a ŋūǹ kí lì yii:

<Maa kɔ́ tijɔkɔndi,

maa tōotì diwaal Baal>?

Kpèè kun a ŋá ditantakalinee!

Béé tin a ŋée.

A náań nì ugutansal un sáń ajan kɔkɔ puee ní.

24 A bí kii kumooun maŋki

kin mántiǹ kuteeun laakin wāā pàaayee ní.

Kì yaa nyàab̀ uja ń jɔ̄m̀-kèe, kì tíkì bijab num,

ŋyunti gbantee, tiba kaa ti ŋūǹ kí cúú-kì.

Ijaa in nyàab̀ kí jɔ̄m̀-kèe kaa ti gì.

I pée kāntí-kì sɔkɔmii ní.

25 <Isirayeel yab, kpèèmaan tiŋan!

Ni làá gbéetí kí fōō tiweendi

ní ni-neen ń kpā.>

Ama ní ni kíí yii: <Taa ti ŋūǹ kí gítí boon!

M néeń awaa ní ki làá nīn jòó ki pá ŋi-boon.>

26 Kii bi nín cútí unaayuu icoo ń cúú-u puee,

míǹ ní icoo làá dāá cúú nimbi Isirayeel yab,

ni nì ni-bɔtiibi nì ni-kàliŋkpilib nì ni-saraaŋaliibi

nì ni-bɔnaatiliibi.

27 Ni tùkù ndɔ ŋun ni dūu kpítì diwaalee yii:

Ní kí bí ditaŋkpal yii:

An nín bàà sá ní fàtī ni-nimbiin kí túĺ-mee,

ní ni fātì ni-boon ki tīī-mi.

Ama ni yaa kɔ́ dinimbinaamandi poonee

ní ní bí-mi yii:

<Yīkì malaa kí dāá fīī-ti.>

28 Awaa ŋin ni kpítèe bi la?

Ŋí yīkì tí kpèè ŋi yaa ŋūǹ kí fīī-ni

kí nyāntí-ni ni-nimbinaamandi poon!

Di sá yii nimbi Juuda yab

waaŋi wīikí ki jítiǹ ni-timmu nyɔkɔm.

29 Ba pu ní ni bí ki wòoǹ-mi?

Ni-kɔkɔ yíkì ki jáń nì mi.

Ti-Dindaan di lī míǹ.

30 M fáá-ni ama an kaa ŋá-ni tiba,

kaa cíikì-ni,

ní gbìl̄ kí béé tin m ŋée taapu.

Ni dū ntàataajimu ki kūū ni-bɔnaatiliibi

kii gbikinti nín bìliŋkī ipeel puee.

31 «Nimbi waanee nib,

ní pīlifìmaan tin ti-Dindaan sòon̄ nee tiŋan.

M kpántì kuteeu ní ki tīī Isirayeel yabaaa,

dibɔmbɔndi tiŋki ní?

Kin ba pu ní m-nibul yab lì yii:

<Ti làá cù laakin ti yaa lèe,

taa làá fàtīí gítiń a-cee?>

32 Usapɔɔn ŋūǹ kí súntí u-wanléeŋkaati puɔɔɔ?

Unimpucaan ŋūǹ kí súntí u-nimpucambɔkutil puɔɔɔ?

Ama nimbi man nibul súntì man pu

an yúntì tikpil tikpil.»

33 «Óooo! A nyí bi nín dì pu

kí nyàab̀ kí ká dineendi pueeyeeee!

An yāntì a mántiǹ ikpiti diŋál.

34 Bi kāntí a-wampeeŋkaati pu

bisoodambi nì maanyiibab fatikuu.

Ama aa cúú-bi bi bíi wìil̄ a-diiku punyɔkɔki.

Nì míǹ kɔkɔee,

35 ní a lì yii: <Maa ŋá tiba.

Báà an ŋá pu, ti-Dindaan làá páatí u-ŋuul m-pu.>

Ama a nín lì yii:

<Maa ŋá tikpitil tibee puee>,

m làá sòoǹ a-bɔti.

36 A kpántì ubɔɔti sɔkɔmii!

Ama á béé yii Eejipiti tiŋki làá kɔ́ǹ-si icoo

kii Asuur tiŋki nín kɔ́ǹ-si icoo puee ní.

37 A làá dāá nyānní niin mun

ki tú a-ŋalii a-yilpu nì icoo.

Di sá yii ti-Dindaan dū

bin pu a mákée ki fá.

An kaa sá bíǹ pu ní

a làá dī kí ŋá tiba.»