Yeereemii 1

kugbɔŋu kun sòoǹ

Yeereemii

puee

1 Tibɔti tin Ilikiyawuu jipɔɔn Yeereemii sòon̄ee sɔ̀. Yeereemii nìn sá bisaraaŋaliibi bin kóò Anatooti tiŋkin, Beenjameen naakookun yab tinjandinee dicaŋkun ní. 2 Amoon jipɔɔn Joosiyaasi nín kāl̀ dibeel^a Juuda tiŋki pu abin saalaa nì ditataatiil poonee ní ti-Dindaan sòon̄ nì Yeereemii tibɔti nee. 3 U nìn gíti sòon̄ nì u ŋyunti ŋun Joosiyaasi jipɔɔn Yooyakiim nìn kāl̀ Juuda tiŋki pu dibeelee. U nìn gíti tí sòon̄ nì u njoolkaam Joosiyaasi jipɔɔn Seedeesiyasi nín kāl̀ dibeel abin saalaa nì dipeepeekaal poon ŋmaluluutiu poonee. Ŋyunti gbanti ní bi cúú Jeerusaleem yab ki cūnnì kuyuŋu^b.

Unimbɔti yíiń Yeereemii ú nīn sá u-bɔnaatiliu

4 Ti-Dindaan nín sòon̄ nì mi tibɔti tiŋyee sèé yii:

5 «Kí wàatī ḿ mā-si kí tàkan̄ a-na poonee,

m nìn pée nyí-si ní.

Kí wàatī á nyā a-na poonee,

m nìn gāntì-si ki síiǹ á nīn bí m-tundin^c.

M dū-si ki kpántì m-bɔnaatiliu atimbun cee.»

6 Ní m kíí yii: «Too, ti-Dindaan Unimbɔti, m dáá sá campɔnti ní, maa nyí isoon.»

7 Ní ti-Dindaan kíí-mi yii:

«Taa lì yii: <M sá campɔnti.>

Laakin m yaa pée tú-see, á cù.

M yaa pée tīī-si mara á sòoǹ puee, á sòoǹ míǹ.

8 Á taa fàŋkì binib gbanti nimbiin,

di sá yii m làá nīn bí a-cee kí fīī-si.»

Ti-Dindaan nín sòon̄ nì mi puee dee. 9 Niinee ní ti-Dindaan tāntì u-ŋal ki gbēē m-nyɔkɔ ní ki bí-mi yii:

«Kpèè, m dū m-bɔti ki ŋá a-nyɔkɔn.

10 Á béé díǹ yii m tīī-si mpɔn

atimbun nì abee pu.

A làá kpìkitī kí lábití kí cìb̄,

kí bīil̀ kí kpēelikì,

ní kí fàtīí mā kí cóoń.»

Amandi supandi nì dikumbool din nùuǹee bɔti

11 Ti-Dindaan gíti sòoǹ nì mi yii: «Yeereemii, ba ní a wāĺ?» Ní m kíí-u yii: «Amandi supandi ní m wāĺ.» 12 Ní ti-Dindaan bí-mi yii: «A lafun wál̀-dì tiŋman. Di sá yii m cí kí ŋá tin m sòon̄ee.»

13 Ní ti-Dindaan gíti sòon̄ nì mi nliliitiim yii: «Ba ní a gíti wāĺ?» Ní m kíí yii: «M wāĺ dikumbool tɔ́kɔ́ ki nùuǹ di-nyɔkɔ túĺ ŋgan pú.»

14 Ti-Dindaan bí-mi yii:

«Ŋgan pú ní nnaabu làá nyānní

kí dūú pɔ̀l̄ kitiŋ kɔkɔ nib pu.

15 Di sá m nín lī puee sèé.

M làá yíiń adican nì abee ŋin kɔkɔ bí ŋgan púee nib.

Bi làá dāá dāan̄,

ní báà ŋma bɔtiu ń dū u-beejal kí síiń

Jeerusaleem punyɔmmu nyɔkɔpu.

Bi làá dāá màntīí tū ki-gundi,

ní kí dāá já nì Juuda timmu kɔkɔ nib.

16 Míǹ ní m làá ŋá kí sòoǹ bi-bɔti

ikpiti in kɔkɔ bi ŋée pu.

Di sá yii bi dū-mi ki fá,

ki cūtìi bíi tòotī awaa,

ki gbàantí awaa ŋin bíǹ bi-ba kpítèe taapu.

17 Siiyee, yòon̄ a-gbajau kí gbìn̄.

Yīkìí yūĺ kí cùú sòoǹ nì bi

tin kɔkɔ m tīī-si mara á sòoǹ nì bee.

Á taa fàŋkì-bi,

yaa sá fám, man m-ba di làá fàaǹ-si bi-nimbiin.

18 Kí yòon̄ díǹ kí nīn cée,

m làá dū-si kí kpántí kii

kitiŋ kin bi máń digundi ki túee.

A làá nīn bí kii tikúti jaantalkuee,

àá tasa kúti gundee kitiŋee kɔkɔ nimbiin,

nì Juuda tiŋki bɔtiibi nì ki-bɔtibiliŋ

nì ki-saraaŋaliibi nì kitiŋee nibul kɔkɔ nimbiin.

19 Bi làá já nì si,

ama baa làá ŋmā kí ŋá-si tiba.

Di sá yii m bí a-cee kí fīī-si.

Man a-Dindaan di lī míǹ.»