Yeereemii 29

Yeereemii ŋmàn̄ kugbɔŋu ki tīī bin bí kuyuŋunee

1 Unimbɔti bɔnaatiliu Yeereemii kāl̀ Jeerusaleem ki ŋmàn̄ kugbɔŋu ki tīī bitindaŋkpilib nì bisaraaŋaliibi nì Unimbɔti bɔnaatiliibi nì binib bin kɔkɔ Neebukadineesaar nìn cúú Jeerusaleem ki cūnnì kuyuŋu Babiloon tiŋkinee. 2 Bíǹ di sá ubɔti Yeekooniya nì ubɔti na nì ubɔti kàliŋkpaambi nì Juuda nì Jeerusaleem kpilib nì bicaabi nì ŋŋal pu tɔntɔnliibi. 3 Yeereemii nìn dū kugbɔŋuee ki ŋúbiǹ Safan jipɔɔn Eeleeyasa nì Ilikiya jipɔɔn Geemariya. Di sá yii Juuda bɔtiu Seedeesiyasi nìn tú-bi Babiloon bɔtiu Neebukadineesaar cee. Tin bi nìn ŋmàn̄ kugbɔŋu gbanti poonee sèé: 4 «Ti-Dindaan Mpɔŋkɔdaan, Isirayeel Nimbɔtiu di bíi sòoǹ nì bin kɔkɔ u yāntì bi cúú Jeerusaleem ki cūnnì Babiloon tiŋkin kuyuŋuee. 5 Māmaan adiin kí nīn kóò. Kpɔ̀maan akpaan kí lēē tijikaal kí jī. 6 Ní cáá binimpoobi kí màal̀ mbininjabiyaamu nì nnimpubiyaamu. Ní cáá binimpoobi kí tīī ni-jipɔmbi, kí dū ni-bisalib kí pɔ̄ ticati bí màal̀ mbiyaamu. Ní màal̀ kí bùtī niin, ni-wíiŋŋu ń taa bàtī. 7 Ní nyàab̀maan kitiŋ kin poon ti-Dindaan jìn̄-ni ki kɔ́ǹee nyɔkɔpu cùtam, di sá yii kitiŋ gbanti yaa bí ŋgbansɔŋfinee, ni mun làá nīn bí ŋgbansɔŋfin.

8 «Ti-Dindaan Mpɔŋkɔdaan, Isirayeel yab Nimbɔtiu gíti bí yii: <Ní taa yàntī Unimbɔti bɔnaatiliibi bin bí ni-kansikinee ń kīil̀-ni, kí taa pīlifiǹ ni-bɔɔbi nì bin lèekī ni-damintiiti taapu ki tùkù-nee. 9 Bi lì yii bi nàatī m-bɔti ní, ama an sá nnyimɔn ní. Maa tú-bi.> Ti-Dindaan di sòon̄ míǹ.

10 «Ti-Dindaan nín sòon̄ puee sèé: <Babiloon beel yaa láa ŋá abin imuŋku ita nì saalaayee, m làá dāá sɔ̄ ni-saai. M nín nìn pōoǹ-ni dipoommɔntiil diŋyee, m làá dāá ŋá míǹ. M làá dāá fàtīí gíiǹní-ni Jeerusaleem doo. 11 Man ni-Dindaan nín sòon̄ puee sɔ̀. M nyí tin m bɔ́ntì kí ŋá kí tīī-nee. Maa bɔ́ntì nnaabu kí tīī-ni, ama an sá nnaam ní m bɔ́ntì kí tīī-ni. M bɔ́ntì ni-foolbooŋwu ń nīn ŋān̄ nì dimákal poon. 12 Niinee, ni làá dāá dāan̄ kí yíiń-mi kí mèè-mi, ní ḿ dāá pīlifiǹ-ni. 13 Ni làá dāá nyàab̄-mi ní kí dāá ká-mi, di sá yii ni làá dāá nyàab̀-mi nì ni-pɔbil kɔkɔ ní. 14 M làá dāá yàntī ní ká-mi, ti-Dindaan di lī míǹ. M làá dāá gíiǹní bin bi cúú ki cūnnì kuyuŋuee ní kí dāá kóoǹ-ni kí kpāfì atimbun nì ipaan in kɔkɔ pu m jìn̄-ni ki kɔ́ǹee, ti-Dindaan di lī míǹ. M làá fàtīí gíiǹní-ni mpaan ŋun pu m nìn jìn̄-ni ki cūnnì kuyuŋu nee.>

15 «Ti-Dindaan bíi sòoǹ nì ni míǹ, di sá yii ni lì yii: <Ti-Dindaan tīī-ti Unimbɔti bɔnaatiliibi Babiloon tiŋkin doo.>

16 «Ti-Dindaan nín sòon̄ tin ubɔti un kā Daafiidi beejal pu puee sɔ̀. U nìn sòon̄ tibɔbaantiil gbanti bin kɔkɔ dáá gbíntìi kóò Jeerusaleem, ni-nabiyaamu mun baa cúú ki cūnnì kuyuŋu kii nimbee pu. 17 Ti-Dindaan Mpɔŋkɔdaan nín sòon̄ puee sèé: <M làá cáań kujaau nì ŋkùm nì bìlbil kúm kí tɔ̄ bi-pu. M làá yàntī bí kpántí kii fiigi biliŋ ŋin sūū ki bíil̀ unil kaa ti ŋūǹ kí ŋmɔ́ee ní. 18 M làá dāá dū kujaau nì ŋkùm nì bìlbil kúm ní kí jà-bi. Kitiŋ pu beeŋi nib yaa láa ká-bee, bi làá dāá kɔ́ dinyoondin ní. Ntimu mun kɔkɔ poon m làá dāá jà-bi kí kɔ́ǹee, bi yaa làá dāá tɔ̄ ubɔ mbusu àá kí sòoǹ kubɔbiiu kubɔ pu àá tibɔti tin cáá tifaandee pu àá kí kɔ́ǹ ubɔ icooyee, bíǹ ní bi làá dāá yòon̄ ŋabika. 19 Kun pu tíǹ làá bàń-bee di sá yii baa pílifì m-bɔti, man bi-Dindaan di lī míǹ. Nì min kɔkɔ m tú m-tɔntɔnliibi m-bɔnaatiliibi kaa gbēeǹee, baa pílifiǹ-bi, man bi-Dindaan di sòon̄ míǹ.>

20 «Nimbi bin m jìn̄ Jeerusaleem ki tɔ́ Babiloon tiŋkin kuyuŋuee, ní pīlifì man ni-Dindaan nyɔɔbundi.

21 «Ti-Dindaan Mpɔŋkɔdaan, Isirayeel Nimbɔtiu nín sòon̄ tin Koolaya jipɔɔn Akaab nì Maaseeyawuu jipɔɔn Seedeesiyasi pu puee sɔ̀. Bi-liitil lì yii bi nàatī ti-Dindaan bɔti ní, ama an kaa sá míǹ. Míǹ puee, m làá dū-bi kí ŋá Babiloon bɔtiu Neebukadineesaar ŋaan ú yàntī bí kpɔ̀-bi ni-nimbilaaliyin. 22 Juuda yab bin kɔkɔ bi cúú ki cūnnì Babiloon tiŋkin kuyuŋuee yaa làá dāá tɔ̄ ubɔ mbusuee, binib bili gbanti yiŋŋi ní bi làá nīn cáa tòó mbusu. Bi làá dāá nīn lì yii: <Ti-Dindaan ń ŋá-si kii u nín nìn ŋá Seedeesiyasi nì Akaab pu ki yāntì bi wùn̄-bi ŋŋmee!> 23 Tíǹ bāań-bi kun puee bi ŋá ntimbiil tuuŋŋi Isirayeel tiŋkin ki dōoǹ nì bi-jutiibi nimpoobi. Bi nìn lì yii bi nàatī m-bɔti ama ní an kaa sá míǹ, di sá yii maa nìn tīī-bi mara bí ŋá míǹ. M nyí tíǹ gbanti kɔkɔ ní ki sá useeradaan», man ni-Dindaan di lī míǹ.

Kugbɔŋu kun Seemayawuu ŋmàn̄ee

24 Á sòoǹ nì Seemayawuu un sá Neelam tiŋkinee mun yii 25 ti-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. A gāā a-bindi ki ŋmàn̄ kugbɔŋu ki tīī Jeerusaleem yab kɔkɔ nì usaraaŋakpil Seefaniya, Maaseeyawuu jipɔɔn nì bisaraaŋaliibi bin kɔkɔ kíǹee yii: 26 «Ti-Dindaan di lēē-si á nīn sá usaraaŋakpil kí fōō Yooyadaa yil. Á nīn kpèé kunimbɔtidii poon biwaatiibi bin yíì bi-ba Unimbɔti bɔnaatiliibee. Á bóob́-bi ikusaka ní kí bā-bi abaa. 27 Ba pu ní aa wòon̄ Yeereemii uanatootija un bí ni-kansikin ki nàatī-ni Unimbɔti bɔtee? 28 U ŋmàn̄-ti kugbɔŋu ki tīiń-ti Babiloon doo yii: Ni làá kàl̄ niin kí yúntí. An puee, māmaan adiin kí nīn kóò, kí kpɔ̀maan akpaan kí lēē tijikaal kí jī.»

29 Ama usaraaŋakpil Seefaniya kàan̄ kugbɔŋu gbanti ki tùkū Yeereemii. 30 Niinee ní ti-Dindaan sòon̄ nì Yeereemii yii: 31 «Á tɔ̄ bí cùú tùkù bin kɔkɔ bi cúú ki cūnnì kuyuŋuee yii: <Ti-Dindaan nín sòon̄ Seemayawuu uneelamja puee sɔ̀. Seemayawuu nāatì-ni m-bɔti, ama maa túnní-u ni-cee. U dū tinyimɔmbɔti ní ki sɔ̄ŋkì ni-pɔbil. 32 Too man ni-Dindaan nín sòon̄ puee sɔ̀. M làá dáaĺ Seemayawuu uneelamja nì u-biyaamu nì u-naantiibi tafal. U-dicaŋkun yab ubɔ kpá kí ká tiŋan tin m làá ŋá m-nibulee. Di sá Seemayawuu lūkutì m-nibul yab bí já nì mi. Ti-Dindaan nín sòon̄ puee dee.>»