Yeereemii 30

Unimbɔti pōoǹ Isirayeel nì Juuda yab ipoon

1 Ti-Dindaan sòon̄ nì Yeereemii yii: 2 «Man ni-Dindaan, Isirayeel Nimbɔtiu nín sòon̄ puee sɔ̀. Ŋmà tibɔti tin kɔkɔ m tùkū-see kí ŋá kugbɔŋun. 3 Man ni-Dindaan di sòon̄ yii iwiin bí ki dòoń, m làá fàtīí gíiǹní m-nibul Isirayeel nì Juuda yab bin bi cúú ki cūnnì kuyuŋuee, man ni-Dindaan di lī míǹ. M làá gíiǹní-bi kitiŋ kin m nìn dūu tīī bi-naanjabee poon bí fōō kí nīn kíǹ ki kóò.»

4 Ti-Dindaan nín sòon̄ Isirayeel nì Juuda yab pu tiŋyee sɔ̀. 5 Ti-Dindaan sòon̄ yii:

«Bi gbìl̀ dipɔɔbiildi biilii pu,

an sá dinyoondi ní, kaa sá ŋgbansɔŋfi.

6 Ní bàlifì binib kí kpèèmaan,

uninja màal̀ kibikaaa?

Ama m wāĺ bininjab kɔkɔ

yú ki nyīī bi-cammu kii

unimpu di kā imatiŋween puee.

Ba pu ní binib kpèé fáaa míǹ?

7 Mbusu! Díǹ wiiŋŋu nee sá ŋwiŋkpaan ní,

ŋwiin nee ŋúǹ kaa cáá juti.

An sá dinimbinaamandi wiiŋŋu

ní ki tīī Jaakɔb naantiibi,

ama bi làá dāá ŋmátí.»

8 «Ti-Dindaan Mpɔŋkɔdaan nín sòon̄ puee sɔ̀. Ŋyunti yaa láa bàn̄ee, m làá dāá léetí bi-neen kpancikiliu. Niinee baa dāa gíti sá binicambi yumbui. 9 Ama bi làá dāá nīn sá man bi-Dindaan bi-Nimbɔtiu nì Daafiidi un m làá dāá dūú kàan̄ bi-pu ubɔtee tɔntɔnliibi.»

10 Ti-Dindaan nín sòon̄ puee sèé:

«M-tɔntɔnliu Isirayeel, taa fàŋkì.

Sii un naanja sá Jaakɔbee, taa kɔ́ dinyoondin!

Di sá yii m làá nyāntí-si ntindandatimu nee ni kí fīī-si,

ní kí gíiǹní a-biyaamu mun bíń kuyuŋuee.

Isirayeel, a làá fàtīí gítiń

ní kí nīn bí dipɔɔsɔŋkilin.

Ubɔ kaa dāa gíti bí kí páb́-si.

11 M bí a-cee kí fīī-si,

ti-Dindaan di lī míǹ.

M làá kúntí anibul ŋin cee

m nìn jìn̄-si ki kɔ́ǹee kɔkɔ.

Ama siiyee, maa làá kúntí-si.

An sá mbaamɔn yii m dáaĺ a-tafal,

ama nì deedee poon ní m ŋá míǹ.

Di sá yii maa bàà ŋūǹ kí yàntī-si

kii a sá maanyiibee.»

12 Ti-Dindaan nín sòon̄ puee sèé:

«Tiweendi tin a fōōyee kaa cáá dicáaǹdi,

baa ŋūǹ kí cáaǹ a-buuŋŋu.

13 Ubɔ kaa bí ki mɔ́tí a-pu.

Unil yaa fōō tiweendee, bi cāantí-u ní,

ama sii ceeyee, an kaa cáá nnyɔkɔ.

14 A-bɔmbi kɔkɔ súntì a-pu,

ubɔ kaa ti dàkafī a-pu.

Jeerusaleem, m fáá-si kii a sá m-nannanliuee.

M dáaĺ a-tafal ŋkpitim pu,

kun puee a-kpitii wīikí

ní a-yìntitam náaǹ.

15 Ba pu ní a gbáà ibiil tiweendi tin a fōōyee pu.

A-buuŋŋu kaa cáá dicáaǹdi.

An sá a-kpitii in wīikí

nì a-yìntitam min náaǹee pu

ní m ŋá-si míǹ.

16 Bin kɔkɔ cátikì-see,

bi làá cātikì bi mun.

Bi làá cúú a-nannanliibi kɔkɔ pái

kí cùnnì kuyuŋu.

Bin yùn̄-see, bi làá dāá yɔ̀ bi mun,

bin fúkúl̀-see, bi làá dāá fūkul̀-bi.

17 Bi yíì-si yii <un bi jìn̄ee>,

<Siiyɔn un bɔti kaa ti ká ubɔee>.

Ama mama ni-Dindaan, m bí yii:

M làá cáaǹ tiweendi tin a fōōyee,

m làá yàntī a-buuŋyi ń kpú.

18 Ti-Dindaan nín sòon̄ puee sèé:

<M làá fàtīí mā Jaakɔb diiŋŋi,

m làá sɔ̄ bi-kɔŋkooŋyi saai.

Bi làá fàtīí mā ntimu mun bi nìn nāaǹee

kí tɔ́kɔń mu-digbuŋŋi pu,

ní adinyaan ń fàtīí ká ipaan in pu ŋi nìn yúee.

19 Bi làá dāá gbìl̄ ilan

nì ifaal kuŋkuuntii pu bi-kansikin.

M làá dāá yàntī bí bùtī,

bi-wíiŋŋu kaa làá dāá bàtī.

Baa làá dāá gíti kpèè-bi fám,

di sá yii m làá dāá tīī-bi tinyool.

20 Jaakɔb naantiibi làá dāá nīn bí kii

bi nín nìn bí pu njaminee ní.

Bi làá dāá fàtīí tí kóoǹ kí kpāfì m-nimbiin,

ní ḿ dāá jáǹ bi-wɔ́biliibi kɔkɔ.

21 Ni-kansikin ubɔ di làá dāá nīn sá ni-kpiliu,

tiŋman ni-kansikin ubɔ di làá dāá kpòotī-ni.

M làá dāá pɔ̄ udaan diyimɔɔl ú sútí kí pìl̄-mi.

Di sá yii ŋma di sá-u kí sútí kí pìl̄-mi?

Ti-Dindaan di sòon̄ míǹ.

22 Niinee ní ní dāá nīn sá m-nibul,

ní man ń nīn sá ni-Nimbɔtiu.>»

23 Ti-Dindaan buŋkpaaŋku dòoń,

u-ŋuul di pōō.

Kunaakpaabuŋkpaaŋŋu bíi jītí ki fīintí

kí dāá lítí binikpitib pu,

ku bí binikpitib yiliŋ pu ki màntī.

24 Ti-Dindaan yaa kaa ŋá u nín lēē kí ŋá puee,

u-ŋuul kpá kí sɔ̀ŋkì.

Boon kpataaayee, ni làá dāá gbìl̄ taapu.