Yeereemii 35

Reekaab yab bɔŋmantikaati

1 Ŋyunti ŋun Joosiyaasi jipɔɔn Yooyakiim sá Juuda bɔtiuee ní ti-Dindaan sòon̄ nì Yeereemii yii: 2 «Cùú ká Reekaab maaliŋun yab^a, kí sòoǹ nì bi, kí cáań-bi kunimbɔtidii dibiyaamu kiba poon. Niinee á tīī-bi ndaam bí nyɔ̀.»

3 Niinee ní m cūtìi nyàab̄ Yaasaniya, Irimeeya jipɔɔn Abasiniya naantiu nì u-nabiyaamu kɔkɔ nì u-jipɔmbi, an dàkà yii Reekaab maaliŋun yab kɔkɔ. 4 M nìn cáá-bi ki kɔ́ǹ kunimbɔtidiin, Igidaliya jipɔɔn Anan, Unimbɔti niliu dibikin. Kidibiki gbanti nìn bí ki kɔ́ĺ abɔtibil dibiki, Saluum jipɔɔn Maaseeyawuu un sá usaraaŋal ki kpèé kunimbɔtidii punyɔkɔkee yaka yilpu pú ní. 5 M nìn dū aboon ŋin poon ndaam gbée nì tidayuti ki yóoǹ Reekaab maaliŋun yab nimbiin ní ki bí-bi yii: «Bàtīmaan ndaam kí nyɔ̀.»

6 Ama ní bi kíí yii: «Taa nyù ndaam. Ti-naanja Yoonadaab, Reekaab jipɔɔn yóoǹ-ti mara yii:

<Nimbi nì ni-naantiibi, ní taa pée nyɔ̀ ndaam dalba dalba.

7 Ní taa mā adiin,

kí taa kpɔ̀ tikpaal,

kí taa cóoń fiinyi sufii,

ní kí taa nín̄ cáá an wanti báà tiba.

Ama ní nīn kóò tantibin

ni-maŋfal wiiŋyi kɔkɔ poon,

ní kí ŋmā kí kàl̄ kitiŋ kin ni kóò

kii binicambi nee pu kí yúntí.>»

8 «Ti ŋúb́ Reekaab jipɔɔn Yoonadaab, ti-naanja marau un u yóoǹ-tee tiŋan, an puee ti nì ti-nimpoobi nì ti-jipɔmbi nì ti-bisalib kaa nyù ndaam jaanjaan. 9 Taa māā adiin ki kóò, kaa cáá fiinyi kpaaŋŋi, kaa tí cáá tisati ki kù. 10 Ti kóò tantibin ní. Ti-naanja Yoonadaab nín tīī-ti mara puee, míǹ ní ti ŋúb́. 11 Ama ŋyunti ŋun Babiloon bɔtiu Neebukadineesaar bíi jáà nì kitiŋ neeyee ní ti dākafì yii: <An sɔ́ tí sāǹ kí kɔ́ Jeerusaleem tiŋkin Babiloon janjakitil nì Siirii janjakitil ń taa cúú-ti. Ŋyunti gbantee ní ti dɔ́miń ki kíǹ ki kóò kitiŋin doo.>»

12 Niinee ní ti-Dindaan sòon̄ nì Yeereemii yii: 13 «Man ni-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. Cùú tùkù Juuda yab nì Jeerusaleem yab yii: <Naa bàà máaǹ kí fōō m-bɔkpaafikaati kí pīlifì tin m sòoǹeeee?> Ti-Dindaan di lī míǹ. 14 Reekaab jipɔɔn Yoonadaab tīī u-naantiibi mara yii bí taa pée nyɔ̀ ndaam, ní baa lafun nyùn̄ ndaam ki dāa sāā díǹ, kun puee bi tɔ́ bi-naanja marau. Ama man sòon̄ nì ni ki gíti sòon̄ nì ni ní naa pílifiǹ-mi. 15 M túnní m-tɔntɔnliibi bibɔnaatiliibi ni-cee ŋfunyɔm kupaau kaa gbēeǹ bí tùkù-ni yii: <Báà ŋma ń dū u-saŋkiŋkpitil kí fá, kí ŋá min kítèe. Taa nín̄ jòó ki pámaan awaa boon ki tòotī-ŋi. Niinee ni làá ŋmā kí kàl̄ kitiŋ kin m tīī ni nì ni-naanjabee poon.> Ama naa kpōoǹ ni-tafal ní kaa nín pílifì. 16 Reekaab jipɔɔn Yoonadaab naantiibi ŋúb́ marab bin bi-naanja nìn yóoǹ-bee, ama ní man nibul kaa pílifiǹ man.

17 «An puee ti-Dindaan, Unimbɔti Mpɔŋkɔdaan, Isirayeel Nimbɔtiu nín sòon̄ puee sèé: <M làá cáań inaabu in bɔti m nìn sòon̄ee kí tɔ̄ Juuda yab nì Jeerusaleem yab pu. Di sá yii m sòon̄ nì bi, ama ní baa pílifiǹ-mi. M yíiń-bi, ama ní baa kíí-mi.>»

18 Míǹ boonee ní Yeereemii bí Reekaab maaliŋun yab yii: «Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <Ni tɔ́ ni-naanja Yoonadaab marau, ki ŋúb́ tin kɔkɔ u tīī-ni mara ní ŋée. 19 An puee Reekaab jipɔɔn Yoonadaab maaliŋun yab pée kpá kí lóó unil un làá nīn yú m-nimbiin ki tūǹ m-tundee.>

«Ti-Dindaan Mpɔŋkɔdaan, Isirayeel Nimbɔtiu nín sòon̄ puee dee.»