Yeereemii 34

Ti-Dindaan sòon̄ ubɔti Seedeesiyasi pu

1 Babiloon bɔtiu Neebukadineesaar nìn bíi jáà nì Jeerusaleem tiŋki nì Juuda timmu mun kíǹee^a. U-janjakitil kɔkɔ nì kitiŋ pu beeŋi janjaliibi kɔkɔ nì anibul ŋin kɔkɔ bí u-taapuee janjaliibi nìn kútì u-pu. Ŋyunti gbanti ní ti-Dindaan sòon̄ nì Yeereemii yii: 2 «Man ni-Dindaan Isirayeel Nimbɔtiu nín sòon̄ puee sɔ̀. Cùú ká Juuda bɔtiu Seedeesiyasi kí tùkù-u yii man ni-Dindaan bí yii m làá dū kitiŋ nee kí ŋá Babiloon bɔtiu ŋaan ú wà-kì ŋŋmi. 3 Sisee, aa làá ŋmátí kí nyā u-ŋaan. Bi làá cúú-si kí dū-si kí ŋá u-ŋaan. A làá cùú yūĺ u-nimbiin ní ní nīn sòoǹ ki kpèé tɔb. Míǹ boonee ní ú cáá-si kí cùnnì Babiloon tiŋkin.

4 «Ama sii Juuda bɔtiu Seedeesiyasi, a yaa pílifì m-bɔtee, aa làá kpú kujaaun. Man a-Dindaan di sòon̄ nì si míǹ. 5 A làá kpú ŋgbansɔŋfin ní. Bi làá ŋá a-kpool kii bi nín ŋá a-naanjab bin nìn sá bibɔtiibi ki wāatì ní sii nín kpántì ubɔtee puee ní. Bi làá dāá tūū talaalub kí tīī-si jilma ní kí gāā-si icaalan yii: <Áù, ti-baa ubɔti kpíì!> Man a-Dindaan di sòon̄ míǹ.»

6 Unimbɔti bɔnaatiliu Yeereemii nìn dū an bɔtee ki nāatì Juuda bɔtiu Seedeesiyasi Jeerusaleem tiŋkin. 7 Ŋyunti gbantee Babiloon bɔtiu nì u-janjakitil nìn bíi jáà nì Jeerusaleem nì u-timmu nì Juuda timmu mun bi nìn máń agun ki túee, múǹ di sá Lakiisi nì Aseeka timmu, ntimu muli gbanti di nìn pɔ̄ɔ̄.

Juuda yab tīī iyumbu dibatɔl ki fātìi cúú-i

8 Tíǹ gbanti kɔkɔ boonee, ti-Dindaan gíti sòon̄ nì Yeereemii. Ubɔti Seedeesiyasi nìn ŋá mpèé nì Jeerusaleem yab kɔkɔ yii bí tīī iyumbu dibatɔl. 9 An nìn sá yii un sá kamaa ń tīī u-yumbuu, uninja àá unimpu un sá eebru niliuee dibatɔl. Ubɔ kaa ti cáá nsan kí dū u-nabiki ujudanil kí kpántí uyumbu. 10 Niinee ní biyidambi kɔkɔ nì samaa kɔkɔ ŋá mpèé yii bi làá tīī bi-yumbui bininjab nì binimpoobi dibatɔl, kí taa ti yàntī bí tɔ̄ ditundi kii iyumbuee. 11 Ama míǹ boonee ní bi kpántì nlandɔkɔ ki fātìi fōō iyumbu bininjab nì binimpoobi bin bi nìn tīī dibatɔlee, ki fātìi yāntì bi kpántì iyumbu.

12 Niinee ní ti-Dindaan sòon̄ nì Yeereemii yii: 13 «Man ni-Dindaan Isirayeel Nimbɔtiu nín sòon̄ puee sɔ̀. M nìn ŋá mpèé ŋubɔ nì ni-naanjab ŋyunti ŋun m nìn nyántìń-bi Eejipiti tiŋkin laakin bi nìn bí ki sá iyumbuee. 14 M nìn tùkū-bi yii: <Abin aluli yaa sāāyee, báà ŋma ń gíiǹ u-nabiki eebru yɔu un cáań u-ba ki nyáfiǹ-uee kí líí ú tɔ̄ u-ba. U làá nīn sá u-yumbuu kí tɔ̄ u-tuuŋŋi abin aluu, dibinluluútiilee ú gíiǹ-u kí líí ú tɔ̄ u-ba^b. Ama ni-naanjab kaa nìn pílifì tibɔti gbanti kaa nìn tí dūu túń nì ditundi. 15 Ama nimbee, ni bàà kpántì mbimbim ki ŋá tin kítì m-ceeyee. Di sá yii báà ŋma bàà lī u-juti cee yii u tɔ́ u-ba. Áli gba ni ŋá mpèé nì man kudii kun bi dūu sú-mee poon. 16 Ama míǹ boonee ní ni kpántì nlandɔkɔ ki kpēē-mi fám. Báà ŋma fātìi cūtìi gíiǹní u-yumbuu uninja àá unimpu un u tīī dibatɔlee. Ni ŋá-bi mpɔn bí fàtīí kpántí ni-yumbui.»

17 Ní Yeereemii gíti kútì ki lī yii: «Too, ti-Dindaan nín sòon̄ puee sɔ̀. An bàà sá yii báà ŋma ń tīī u-yumbuu eebru niliu un sá u-nabiki nì u-jutee dibatɔl ní. Ama naa ŋá kii m nín bí yii ní ŋá puee. An pu ní man ni-Dindaan sòon̄ yii m làá cáań kujaau nì bìlbil kúm nì ŋkùm kí tɔ̄ ni-pu. Niinee kitiŋ pu beeŋi nib yaa láa ká mimmee, bi làá dāá kɔ́ dinyoondin.

18 «Binib gbanti nyáń mpèé ŋun bi ŋée boon. Baa ŋá kii bi nín yúl̀ m-nimbiin ki pōoǹ puee. M làá ŋá-bi kii dinabil din bi gíí ki nābitì mili ki cōom̀ ki jítì ajan alee kansikinee ní. 19 Juuda yidambi nì Jeerusaleem yab nì bikàliŋkpilib bigaakaabi nì bisaraaŋaliibi nì bitindaŋkpilib kɔkɔ, an dàkà yii bin kɔkɔ pée cōom̀ ki jítì dinabil din bi gíí ki nābitì milee kansikinee, 20 m làá dū-bi kí ŋá bi-nannanliibi nì bin nyàab̀ kí kpɔ̀-bee ŋaan. Bi-nikpiliŋ làá kpántí inoon nì ipeel jikaati. 21 Míǹ mbaantiim ní m làá dū Juuda bɔtiu nì u-kàliŋkpilib kí ŋá bi-nannanliibi nì bin nyàab̀ kí kpɔ̀-bee ŋaan. M làá dū-bi kí ŋá Babiloon bɔtiu janjaliibi ŋaan. Bijanjaliibi gbanti dá láá búntì ki wāatì-ni. 22 Ama m làá tīī-bi mara bí gítiń kí jáǹ Jeerusaleem tiŋki. Bi làá fōō kitiŋ nee ní kí wà-kì ŋŋmi. M làá yàntī Juuda timmu ń kpántí kii kuteeuee ubɔ ń taa ti nín̄ kóò mu-ni.» Ti-Dindaan di lī míǹ.