Yeereemii 37

Ubɔti Seedeesiyasi tú binib Yeereemii cee

1 Babiloon bɔtiu Neebukadineesaar nìn dū Joosiyaasi jipɔɔn Seedeesiyasi ki kāaǹ Juuda beel pu ubɔti. Seedeesiyasi di nìn fōō Yooyakiim jipɔɔn Kooniya yil. 2 Ama bi-kansikin báà ubɔ kaa nìn pílifì tibɔti tin ti-Dindaan nìn dī Yeereemii pu ki kpáafì-bee. Ubɔti u-baaa, u-kàliŋkpilibaaa, Juuda yabaaa, ubɔ kaa nìn fōotì ki yīkiǹ.

3 Nì míǹ kɔkɔee, ubɔti Seedeesiyasi nìn tú Seeleemiya jipɔɔn Yukaal nì usaraaŋakpil Seefaniya, Maaseeyawuu jipɔɔn Yeereemii cee. Bi nìn bí-u yii: «Mèè ti-Dindaan ti-Nimbɔtiu ti-pu.»

4 Ŋyunti gbantee baa nìn dáá cúú Yeereemii ki pīiǹ kudii, an puee u nìn tɔ́ u-ba kí cù samaa cee kí gítiń. 5 Faaroo janjaliibi nìn nyáń Eejipiti tiŋkin. Babiloon yab bin nìn māntìi tú Jeerusaleem tiŋki kí já nì kèe nín gbìl̄ mimmee ní bi sútì ki wāatì-kì. 6 Niinee ní ti-Dindaan sòon̄ nì u-bɔnaatiliu Yeereemii yii: 7 «Ti-Dindaan, Isirayeel Nimbɔtiu nín sòon̄ puee sèé: <Ní cùú tùkù Juuda bɔtiu un túnní-ni ní dāan̄ kí bàlifèe yii: Faaroo janjaliibi bin nìn nyáń ki tútúǹ-nee fātìi nín gítí bi-tiŋkin Eejipiti. 8 Babiloon yab làá fàtīí gítiń kí dāá já nì kitiŋ nee. Bi làá fōō-kì kí wà-kì ŋŋmi. 9 Man ni-Dindaan nín sòon̄ puee sɔ̀. Ní taa mɔ̄ntì ni-ba kí lì yii Babiloon yab yíkì ti-cee ki búntì. Baa búntì. 10 Tí lì yii ni ŋúń ki jáń ki pɔ́ɔkiǹ Babiloon yab janjaliibi bin bí ki jáà nì nee kɔkɔ ní an kíǹ bin fōō tiweendee. Bíǹ gbanti làá nyānní bi-tantibin kí tūū kitiŋ nee ŋŋmi.>»

Bi cúú Yeereemii ki pīiǹ kudii

11 Ubɔti Faaroo janjaliibi pu ní Babiloon janjaliibi sútì ki wāatì Jeerusaleem tiŋki. 12 Yeereemii nìn là kí nyā Jeerusaleem tiŋkin kí cù Beenjameen tiŋkin kí fōō bi nín yākatì yākatì atinjan u-dicaŋkunee u-jandi. 13 Ama u nín bàn̄ Beenjameen tiŋki punyɔkɔpuee ní u ká bijanjaliibi bin cīití kipunyɔkɔee kpiliu ubɔ. Bi nìn yíì-u Yiiriya, u sá Seeleemiya jipɔɔn nì Ananiya naantiiu. Úǹ nìn cúú Unimbɔti bɔnaatiliu Yeereemii ní ki bí-u yii: «A cáǹ a-ba kí tīī Babiloon yabaa!» 14 Ní Yeereemii kíí-u yii: «Aayee, maa cáǹ m-ba kí tīī Babiloon yab.»

Ama Yiiriya kaa nìn pīlifiǹ-u. U nìn cúú-u ki cáa cūnnì u-kpilib cee. 15 Bíǹ nìn gíí Yeereemii pu diŋuul ŋkpitim pu ní ki gbáń-u ní ki dū-u ki pīiǹ kudii ugbaŋŋmal Joonatan diiku kun bi nìn dūu kpántì kusarkadiiyee poon. 16 Bi nìn dū Yeereemii ki tɔ́ dinyimbɔbil din poon an bɔ̀ǹ kpìmmee.

U nìn kāl̀ niin ki yúntì. 17 Dalbee ní ubɔti Seedeesiyasi tú unil ú cùú cáań-u. U nìn là kí bàlifì-u tiba dibalin u-beecindin. Ubɔti nìn bālifì-u yii: «Mimmee ti-Dindaan sòon̄ nì si tiba m-pu á tùkù-maaa?» Ní Yeereemii kíí yii: «Iiin! Bi làá dū-si kí ŋá Babiloon bɔtiu ŋaan.» 18 Ní Yeereemii gíti bí ubɔti Seedeesiyasi yii: «Ba ní m yīntiǹ sii nì a-kàliŋkpilib nì dinibul nee ní ni cúú-mi ki pīiǹ sarka ní? 19 Ni-bɔnaatiliibi nìn tùkū-ni yii Babiloon bɔtiu kaa làá dāan̄ kí já ni nì ni-tiŋki kujaau. Bibɔnaatiliibi gbanti bí la díǹ?»

20 Ní Yeereemii kútì ki lī yii: «Kɔŋkɔnnee, ti-baa ubɔti, pīlifiǹ-mi. Yàntī m-gbaamii ń kɔ́-si fíŋfiŋ. Taa ti gíiǹ-mi a-gbaŋŋmaliu Yoonatan dumpu, yaa sá fám m làá kpú.»

21 Niinee ní ubɔti Seedeesiyasi tīī mara yii bí dū Yeereemii kí pìin̄ bijanjaliibi bin cí ubɔtee dumpu kudii. Bí nīn tìì-u ŋwiin kamaa kikpɔnɔkatii. Bí nīn cāabìń kpɔnɔ gbanti kpɔnɔb bin bi kāntí bikpɔnɔpuliliibi daŋŋi puee kí tin sāā ŋyunti ŋun ní kpɔnɔ làá dóó kitiŋee nee. Míǹ ní Yeereemii nìn gbíntì bijanjaliibi bin cí ubɔtee dumpu.