Yeereemii 38

Bi dū Yeereemii ki tɔ́ dinyimbɔbilin

1 Matan jipɔɔn Seefatiyawuu nì Geedaliyawuu jipɔɔn Paseewuur nì Seeleemiyawuu jipɔɔn Yukaal nì Maalkiya jipɔɔn Paseewuur nìn gbìl̄ tibɔti tin Yeereemii sòon̄ ki tùkū samaa kɔkɔ yii: 2 «Ti-Dindaan nín sòon̄ puee sèé: <Un làá gbíntí kitiŋ nee poonee, kujaau nì ŋkùm nì bìlbil kúm di làá kpɔ̀-u. Ama un yaa nyáń kí cáá u-ba ki tīī Babiloon yabee làá ŋmátí. Tin an niliuee páatèe di sá u nín kaa kpíìyee.>»

3 Ti-Dindaan nín sòon̄ puee sèé: «M làá dū kitiŋ nee kí ŋá Babiloon janjaliibi ŋaan ní bí fōō-kì.»

4 Niinee ní bikàliŋkpilib bí ubɔti yii: «Bí kpɔ̀ kijapaai nee, di sá yii tin u sòon̄ee yɔ̀tī bijanjaliibi nì bin kíǹ ki bí kitiŋ nee poonee wunti. Waa nyàab̀ samaa ŋanti, ama u-naabuŋu ní u nyàab̀.»

5 Ní ubɔti Seedeesiyasi kíí yii: «U bí ni-ŋaan, m sá ubɔti, ama maa cáá mpɔn kí pìin̄-ni nsan ni ŋá ni nín là puee.»

6 Bikàliŋkpilibee nìn cúú Yeereemii ki cáá-u ki tɔ́ ubɔti jipɔɔn Maalkiya nyimbɔbilin. Bi nìn dū iŋmii ní ki cúú Yeereemii ki cáa sīntì dinyimbɔbilin. Dinyimbɔbil gbanti nìn bí bijanjaliibi bin cí ubɔtee dumpu ní, ama nnyim nìn kpá di-poon, asee tikpati. An puee bi nín nìn dū Yeereemii ki tɔ́ee, u nìn nín sìntī tikpatin ní.

7 Too, ueetiiyoopiija ubɔ nìn bí bi yíì-u Eebeedi-Meeleeki. U nìn sá ukàliŋkpil ní ki nìn bí ubɔti cindin. U nìn gbìl̄ yii bi dū Yeereemii ki tɔ́ dinyimbɔbilin. Ubɔti mun nìn kā Beenjameen punyɔkɔki nyɔkɔpu. 8 Niinee ní Eebeedi-Meeleeki nyáń dibeecindin ki cūtìi ká ubɔti ki bí-u yii: 9 «Ti-baa ubɔti, binib nee nín ŋá Unimbɔti bɔnaatiliu Yeereemii puee kaa ŋān̄. Bi dū-u ki tɔ́ dinyimbɔbilin. U làá kpú ŋkùm dinyimbɔbil gbantin, di sá yii tijin kaa ti bí kitiŋin.»

10 Niinee ní ubɔti tīī ueetiiyoopiija Eebeedi-Meeleeki mara yii: «Si nì bininjab mmuŋku nì saalaa ń cù kí nyāntiń Unimbɔti bɔnaatiliu Yeereemii dinyimbɔbilin ú taa kpú.»

11 Eebeedi-Meeleeki nìn yōoǹ bininjab mmuŋku nì saalaa. U nìn kɔ́ dibeecindin kudii kun bí kunimbikpaafidii taapuee. Niinee ní u yōoǹ ticaliŋkpun. U nìn dūu kúĺ iŋmii pu ki cáa lāaǹ Yeereemii dinyimbɔbilin. 12 Ní ueetiiyoopiija Eebeedi-Meeleeki bí Yeereemii yii: «Á dū ticaliŋkpunee kí fìn̄ a-ŋmɔŋŋmɔnti ní kí dū iŋmii kí cúú.»

Ní Yeereemii ŋá míǹ. 13 Ní bi dáaĺ iŋmiiyee ki nyántìń-u dinyimbɔbilin. Míǹ boonee ní Yeereemii gbíntì bijanjaliibi bin cí ubɔtee cee.

Ubɔti bíi sòoǹ nì Yeereemii dibalin

14 Ubɔti Seedeesiyasi nìn tú bi yíiń Unimbɔti bɔnaatiliu Yeereemii, ní u cáá-u ki cūnnì kunimbɔtidii punyɔkɔki kitataatii poon. U nìn bí-u yii: «M làá bàlifì-si tibɔti, á taa báĺ-mi báà tiba.»

15 Ní Yeereemii kíí Seedeesiyasi yii: «M yaa tùkū-si ibaamɔn, a làá yàntī bí kpɔ̀-mi. M yaa tí tīī-si isaŋkaaa, aa làá dū-i kí tɔ̄ ditundi.»

16 Niinee ní ubɔti Seedeesiyasi pūtì ki pōoǹ Yeereemii dibalin yii: «Nì ti-Dindaan un bí dimaŋfalin nee, m pūtì yii maa làá kpɔ̀-si, kaa làá tí dū-si kí tīī bin nyàab̀ kí kpɔ̀-see.»

17 Ní Yeereemii bí Seedeesiyasi yii: «Ti-Dindaan Unimbɔti Mpɔŋkɔdaan, Isirayeel Nimbɔtiu nín sòon̄ puee sèé: <A yaa nyáń ki dū a-ba ki tīī Babiloon bɔtiu janjakpilibee, si nì a-dicaŋkun yab làá ŋmátí, ní baa làá wà Jeerusaleem tiŋki ŋŋmi. 18 Ama a yaa kaa nyáń ki dū a-ba ki tīī Babiloon bɔtiu janjakpilibee, Jeerusaleem tiŋki làá kɔ́ Babiloon yab ŋaan. Bi làá sēē-kì ŋŋmi, ní siiyee, aa làá ŋmátí bi-ŋaan.>» 19 Ubɔti Seedeesiyasi bí Yeereemii yii: «M fàŋkí Juuda yab bin kɔ́ Babiloon yab ŋaanee. Babiloon yab ŋūǹ kí dū-mi kí ŋá bi-ŋaan bíǹ ń sàaǹ-mi.»

20 Ama ní Yeereemii kíí-u yii: «Baa làá dū-si kí ŋá bi-ŋaan. Pīlifì tin ti-Dindaan dī m-pu ki sòon̄ nì see. A yaa ŋá míǹ, án làá nīn ŋān̄ ki tīī-si ní á ŋmátí. 21 Ama a yaa yíì kaa cáá a-ba ki tīīyee, ti-Dindaan nín lēē tin làá bàń a-pu ki dàkā-mee sɔ̀. 22 Binimpoobi bin kɔkɔ kíǹ ki bí a-beecindinee, bi làá cúú-bi kí cùnnì kí tīī Babiloon bɔtiu janjakpilib. Bi làá dāá gāā-si nlan yii:

«<A-bɔɔmɔmmɔntiibi

baasii kíil̀-si ní!

A cáá a-taaŋi ki múĺ tikpatin,

ní bíǹ sáǹ ki fá-si!>

23 Bi làá dāá cúú a-nimpoobi nì a-jipɔmbi kí cùnnì kí tīī Babiloon yab. Sii a-ba kaa làá dāá ŋmátí kí nyā bi-ŋaan. Di sá yii Babiloon bɔtiu làá dāá cúú-si ní kí sēē a-tiŋki ŋŋmi.»

24 Ní ubɔti Seedeesiyasi bí Yeereemii yii: «Ubɔ yaa pée gbìl̄ tibɔti nee, see m kūū-si. 25 Bikàlinjakpilib yaa gbìl̄ yii m sòon̄ nì si, ní ki dɔ́miń a-cee kí bí-si yii: <Tùkù-ti tin a sòon̄ nì ubɔtee! Á taa báĺ-ti báà tiba, an yaa sá fám ti làá kpɔ̀-si. Ubɔti bí-si yii ba ní?> 26 Á kíí-bi yii: <M gbāam̀ ubɔti yii ú taa gíiǹ-mi Joonatan dumpu ḿ tin kpú niin.>»

27 Míǹ ní bikàliŋkpilib kɔkɔ lafun dɔ́miń Yeereemii cee ki bālifì-u tibɔti. Ama Yeereemii kíí-bi kii ubɔti nín tīī-u mara yii ú kíí puee ní. Niinee ní bi yāntì-u soooo kaa ŋá-u tiba, kun puee báà ubɔ kaa gbìl̄ tin u nì ubɔti sòon̄ee. 28 Niinee Yeereemii gbíntì bijanjaliibi bin cí ubɔtee dumpu ki tin sāā ŋyunti ŋun bi jáń ki fōō Jeerusaleem tiŋkee^a.

Babiloon yab jáń ki fōō Jeerusaleem tiŋki

(Kpèè 52.4-16, 2 Bib 25.1-12)

Bi nín jáń ki fōō Jeerusaleem tiŋkee, tin jítèe sèé: