Yeereemii 50

Bi làá nàan̄ Babiloon tiŋki ní kí fīī Isirayeel

1 Ti-Dindaan nín sòon̄ nì u-bɔnaatiliu Yeereemii Babiloon tiŋki, an dàkà yii Kaldee yab tiŋki pu puee sèé:

2 «Bāakìmaan tibɔti nee kí tùkù atimbun kɔkɔ,

ní cóoḿmaan tidaandi kí yàntī bí béé-tì.

Yàntīmaan bí béé-tì, ní taa báĺ tiba.

Lìmaan yii:

<Bi jáń ki fōō Babiloon tiŋki,

icoo cúú diwaal Beeli,

diwaal Maarduuki lítì.

Icoo cúú u-waaŋi gbanti,

bi kúntì u-jɔkɔŋwanti gbanti.

3 Di sá yii ditimbundi diba nyánní ŋgan pú

ki dòoń kí já nì kì

kí yàntī kí kpántí kunimbaau teeku.

Ubɔ kaa ti làá kɔ́ ki-pu.

Binibaaa, tiwaŋkutaaa,

bi-kɔkɔ làá sāǹ kí wāŋkì.>»

4 Ti-Dindaan bí yii:

«Ŋyunti gbantee,

Isirayeel yab nì Juuda yab

làá dāá nóoń dicilpu kí dāan̄.

Bi làá dāá nīn còom̄ ki sūǹ

ki nyàab̀ man bi-Dindaan bi-Nimbɔtiu.

5 Bi làá dāá bàlifì kí béé nsan

ŋun bi dì ki cá Siiyɔn tiŋkinee.

Bi làá dāá fàtī bi-nimbiin kí túĺ kitiŋee pú.

Bi làá dāá dāan̄ ní bi nì man

ń ŋá mpèé ŋun làá nīn bí ki cá jaanjaanee.

Bi dāa pée kpá kí súntí ŋu-pu.

6 M-nibul yab nìn bí kii ipii in wáŋkèe ní.

Bi-kpàaliibi nìn yāntì bi wáŋkì

ní ki yāntì bi tú ki yìiǹ ajoon pu.

Bi nìn yìiǹ ajoon pu

ki póotí ŋgbantamu pu,

ní ki súntì bi-naabakati pu.

7 Bin kɔkɔ yaa nìn ká-bee

nìn cútí-bi ní kí tɔ̀ntī

ní bi-nannanliibi lì yii:

<Taa bíi ŋáań tikpitil tibaa!

Tiŋman puee, binib gbanti

yīntiǹ ti-Dindaan

un di sá difiil kɔŋkooŋŋu,

ní bi-naanjab nìn máká u-puee.>»

8 Sām̀maan kí nyā Babiloon tiŋki^a,

yīkìmaan Kaldee yab tiŋki!

Lìntīmaan kupicaŋkpuŋu nyɔkɔpu kii iŋɔjaayee.

9 Di sá yii m làá lùkutī atimbuŋkpaan dikitil

ní kí tɔ̄-ŋi ŋí já nì Babiloon tiŋki.

Atimbun gbanti làá nyānní ŋgan pú ní

kí tàtīí gbàan̄ dikɔ̀ndi pu

kí já kí fōō kitiŋ gbanti.

Bi-piiŋyi bí kii ubaatandaan

un kaa fàtīi gítí mmɔŋki iŋaŋkulimee ní.

10 Bi làá fūkul̀ Kaldee yab tiŋki,

ní bin kɔkɔ làá fūkul̀-bee làá kóoǹ tigaajawan kí báĺ,

ti-Dindaan di lī míǹ.

11 Nín̄ fàal̀maan kí nīn bí dipɔɔpindin,

nimbi bin dɔ́miń ki fúkúl̀ man gaajawantee.

Nín̄ yùkufīmaan kii dinabil di yú kumɔsɔŋunee.

Nín̄ sūm̀maan kii itaamuee!

12 Icoo cúú ni-tiŋki kin sá kii ni-nee,

un di màl̄-nee fá u-jilmau.

Kɔŋkɔnnee, ni-tiŋki di sá

kin lúŋkèe ntimu kɔkɔ kansikin.

Kì kpántì kuteeu, kitiŋkuliŋŋi.

13 Diŋuul din ti-Dindaan fōōyee puee,

binib kaa ti kóò ni-tiŋkin,

kì kpántì kuteekpaaŋŋu ní.

An ŋáań bin kɔkɔ jītí Babiloon tiŋkinee bitii.

Bi yaa ká nnaabu ŋun jéetì kitiŋee puee,

bi fátí dipɔɔbiildi biilii ní.

14 Nimbi bipintɔliibi kɔkɔ,

màntīí tūmaan Babiloon tiŋki kí já nì kì.

Ní tɔ̄maan ni-piiŋyi, ní taa mɔ̄tì i-pu,

di sá yii kì yīntiǹ ti-Dindaan.

15 Ijaan kɔkɔ puee,

nín̄ kūuntímaan ki-pu ijanjakuŋkuunti!

Bi yōoǹ bi-ŋalii yilpu ki sáǹ ki kɔ́ bi-nannanliibi.

Digundi din bi máń ki tú kitiŋee lítì.

Ti-Dindaan di bíi tɔ̀ ipɔntoon!

Tɔ̀maan Babiloon tiŋki ipɔntoon,

ŋámaan-kì kii kì nín ŋá bin kíǹee puee.

16 Ní kúntímaan Babiloon tiŋkin,

bin būul̀ee nì bin cēēyee.

Báà ŋma ń sāǹ kujaau kun nàantí nee

kí gítí u-nibul cee,

báà ŋma ń sāǹ kí gítí u-tiŋkin.

17 Isirayeel yab nìn bí kii dipibil din wáŋkì

ní gbikintib sáń ki jèe ní.

Gbikintipeepeekaa un cúú-bi ki ŋmɔ́ee di sá Asuur bɔtiu. Míǹ boonee ní Babiloon bɔtiu Neebukadineesaar mun dɔ́miń ki kɔ́fì bi-kpabiŋ. 18 An pu ní ti-Dindaan Mpɔŋkɔdaan, Isirayeel Nimbɔtiu bí yii: «M làá jáǹ Babiloon bɔtiu nì u-tiŋki, kii m nín jáń nì Asuur bɔtiu puee ní.

19 «M làá fàtīí gíiǹní Isirayeel yab

bi-pikpaapɔɔkun.

Bi làá ká kí jī Kaarmeel jool pu

nì Baasan timpiliŋki pu,

nì Eefiraayiim jooŋŋi pu

nì Galaadi tiŋkin kí díkí.

20 Man ni-Dindaan di bíi sòoǹ yii

ŋyunti gbantee,

bi làá dāá nyàab̀ Isirayeel yìntitam

ama baa làá dāá ká.

Bi làá dāá nyàab̀ Juuda kpitii

kaa làá dāá ká.

Di sá yii m làá dāá dū bin kíǹ

kaa kpíìyee kpitii kí pɔ̄-bi.

21 «Bóob́maan dikɔ̀ndi kí cùú jáǹ

Maratiim tiŋki.

Ní cùú já kì nì Peekoodi yab!

Ní pɔ̀fì-bi kí kpɔ̀ kí céetí bi-kɔkɔ múb.

Man ni-Dindaan di lī míǹ.

Á ŋá m nín tīī-si mara á ŋá puee deedee.

22 Ti gbìl̄ dikɔ̀ndi wooku

nì dibintiŋkpaandi pu kitiŋee ni!

23 Babiloon tiŋki nìn bí kii

dikújal din gbáà ki mátí kitiŋ kɔkɔee ní.

Kin an dī mana ní bi gbáń ki wīil̀-kì

kì kíǹ ki dɔ̄ akati akati míǹ?

Babiloon tiŋki kpántì dinyoondi paaŋŋu

atimbun kansikin.

24 Babiloon, m píĺ-si kutaliŋŋu

ní a sàl̄ kaa kpáàa béè.

Bi bīitì a-pu ki cúú-si,

kun puee a jáń nì man ni-Dindaan»

25 Ti-Dindaan pīitì u-janjawanti diiku

ní ki lēeń u-ŋuul janjawanti.

Di sá yii ti-Dindaan Unimbɔti Mpɔŋkɔdaan

cáá ditundi kí tɔ̄ Kaaldee yab tiŋkin.

26 Nyānnímaan ajan kɔkɔ pu kí dāan̄ kitiŋ nee ni!

Ní pìitī ki-cakalaabi

kí kóoǹ ki-gaajawanti kí kpúkuń

ní kí nàan̄-kì.

Tiba nì tiba kaa máaǹ kí kíń.

27 Kpɔ̀maan ki-janjaliibi bimɔntiibi kɔkɔ,

cùnnìmaan-bi nnaŋkpɔpaan pu!

Dinimbinaamandi kɔ́-bi,

di sá yii ŋyunti bāań

ti-Dindaan ń dáaĺ bi-tafal.

28 Pīlifìmaan, bin bíi sáń Babiloon tiŋkee,

bin dáá gbíntìi bí dimaŋfalinee

di dɔ́miń ki máafí Siiyɔn tibɔmɔntiil yii:

«Ti-Dindaan ti-Nimbɔtiu tɔ̀n̄-ti,

u tɔ̀n̄ u-diiku pɔntooŋyi.

29 Kóom̀maan bipintɔliibi,

bin kɔkɔ pīil̀ itɔfee kí kpāfì bí jáǹ Babiloon tiŋki.

Lùkù kí gíb́maan-kì ijaan kɔkɔ pu,

ní taa yàntī báà ubɔ ń sāǹ kí ŋmátí.

Ní pàmaan-kì kí nóó ki-tuŋkpitiŋ.

Ŋámaan-kì kii kì nín ŋá bin kíǹee puee^b.

Di sá yii kì yōoǹ ki-ba yilpu

ti-Dindaan Isirayeel circir Nimbɔtiu nimbiin.

30 «An pu ní bi-nipɔmbi làá lítí mpaan nee pu ŋwiin gbanti, ki-janjaliibi kɔkɔ làá kpú.» Ti-Dindaan di sòon̄ míǹ.

31 «Babiloon ulambidaan, man nì sii dee,

man ni-Dindaan Unimbɔti Mpɔŋkɔdaan di lī míǹ.

A-wiiŋŋu bāań díǹ dee,

ŋyunti ŋun m làá dáaĺ a-tafalee dee.

32 Kilambidaŋ gbéetì ki lítì,

ubɔ kaa bí kí yòon̄-kì kí yóoń.

M tūū ki-timmu ŋŋmi,

an làá wà tin kɔkɔ māntìi tú-kèe.»

33 Ti-Dindaan Mpɔŋkɔdaan nín sòon̄ puee sèé:

«Bi ŋúb́ Isirayeel yab

nì Juuda yab ki sàantí.

Bin cúú-bi kuyuŋuee ŋúb́-bi

kaa là kí gíiǹ-bi kí líí.

34 Ama man un mɔ́tí bi-puee cáá mpɔn,

man ní bi yíì ni-Dindaan Mpɔŋkɔdaan.

M làá mɔ̄tì bi-pu nì tininjati.

Míǹ ní m làá ŋá kí yàntī Babiloon yab ń nyɔ̀ ŋkpatim

ní kí cáań ŋgbansɔŋfi kitiŋ kɔkɔ pu.»

Tin ti-Dindaan bɔ́ntì Babiloon puee

35 Ti-Dindaan bí yii:

«Bí já nì Kaaldee yab,

bí já nì Babiloon yab,

bí já nì Babiloon bɔtibiliŋ nì ki-ciŋfitiibi!

36 Bí já nì bibɔɔbi,

bi-yiliŋ ń lábití!

Bí já nì bibaatandambi,

bi-wunti ń yɔ̀tī.

37 Bí já nì ki-taamui nì ki-janjatɔrɔkub,

nì nyaaŋmaliŋku nib bin kóò bi-kansikinee,

bí kpántí kii binimpoobee!

Bí já nì laakin ki kpáafí ki-gaajatee.

38 Bí já nì ki-buŋyi í kpā!

Di sá yii kì sá awaa tiŋki ní.

Ntimbiil wanti gbanti yāntì bi-yiliŋ lábitì.

39 An pu ní alambuntilaŋkpan

làá dāá nīn kóò Babiloon tiŋkin nì isaakpan,

ní taataabi ń dāá kàl̄ niin.

Ubɔ kaa ti làá kɔ́ niin dalba dalba,

kitiŋ nee làá dāá dòon̄ fám abin abin^c.»

40 Ti-Dindaan bí yii:

«Kii m nín nìn nāaǹ

Soodoom nì Goomoora^d timmu

nì ntimu mun māntìi tú-muee puee,

míǹ ní ubɔ kaa ti làá kɔ́ Babiloon tiŋkin,

uniseen kaa làá ti kàl̄ niin.

41 Dinibul diba nyánní ŋgan pú,

an sá ditimbuŋkpaandi ní.

Atimbun kupaau nyánní

doooo kitiŋgbeennyɔkɔ ki dòoń.

42 Bi-janjaliibi ŋúb́ itɔfi nì ŋkpamu.

Bi cáá nnimbinaakulim kaa sūǹ isaa.

Dibintindi din bi gèe

náań nì tiŋku nín ŋáań kuwoou puee ní.

Bi jɔ́m̀ ki kā itaamu pu.

Bi páaǹ ipɔ̀n pu tiŋan

kí já nì sii Babiloon tiŋki.

43 Babiloon bɔtiu gbìl̄ bi-pu.

U-wunti yɔ̄tì ní dinyoondi cúú-u,

ní u bíi gbìl̀ tiweendi pu

kii imatiŋween di cúú upɔdaanee.

44 Ti-Dindaan bí yii:

M làá nīn bí kii gbikinti

un di nyánní kimɔgbaayin

ki kpàkaǹ Jɔɔdan buŋŋu

ki cá kumɔsɔŋu laŋkee ní.

Kii dinimbil nín kábití puee,

míǹ ní m làá yàntī ki-nib ń yīkì.

Míǹ boonee ní ḿ kàan̄ Babiloon tiŋkin

ubɔti un m lēēyee.

Di sá yii ŋma di bí kii mamee?

Ŋma di ŋūǹ kí yíiń-mi tibuul?

Uyidaan ulɔu di ŋūǹ kí já nì mi?»

45 Ní pīlifìmaan tin ti-Dindaan

bɔ́ntì kí ŋá Babiloon tiŋkee,

tin u lēē kí ŋá Kaaldee yabee.

Tiŋman, bi làá dāá dàtī-bi mpɔn

ki kpáaǹ bi-biyaamu kii tiwaŋkutee.

Bi-puee, bi làá nàan̄ bi-naabakati,

an kaa cáá digbíntil.

46 Bi nín gbìl̄ yii:

«Bi jáń ki fōō Babiloon tiŋkee», kitiŋ cīŋkì ní,

ní ibiil fōō ki píĺ dàii atimbun kɔkɔn.