Yeereemii 49

Tin ti-dindaan sòon̄ Amɔn yab puee

1 Ti-Dindaan sòon̄ Amɔn yab^a pu. Ti-Dindaan nín sòon̄ puee sèé:

«Ba pu ní diwaal Mooleeki

jíń Gaadi tiŋki mpaan míǹ?

Ba pu ní Amɔn yab

fōō Isirayeel timmu míǹ?

Isirayeel kaa cáá jipɔɔn

un làá fōō ntimu gbanti difakaleeee?»

2 An puee ti-Dindaan bí yii:

«Iwiin iba bí ki dòoń m làá yàntī bí gbìl̄

Amɔn yab tiŋyil Raaba poon ijanjakuŋkuunti.

Kitiŋ gbanti làá dāá kpántí adigbun,

bi làá wà ntimbilimu mun māntìi tú-kèe ŋŋmi.

Ŋyunti gbantee Isirayeel yab

làá fàtīí fōō bin nìn jìn̄-bee cee bi-wanti.»

3 Eesbɔn yab, nín yáliŋkímaan!

Di sá yii bi nāaǹ Ayi tiŋki.

Ntimbilimu mun māntìi tú Raaba tiŋkee,

gbámaan ibiil bí jòò-ni.

Dūmaan kpɔsatab kí pèen̄,

gāāmaan ikpiisilan!

Yìim̀maan tinaabakalin.

Bi cúú diwaal Mooleeki ki cáǹ kuyuŋu,

ki kpáaǹ di-tandambi nì di-kpilib dicilpu.

4 Raaba tiŋki, kisapɔmbiki kin gáatèe,

ba pu ní a nìn dàkà a-ba a-tantakal

nì a-kpaaŋŋi ŋin lòoǹ tiŋanee pu míǹ?

A nìn máká a-gaajati pu.

A nìn bàlifī a-ba yii:

«Ŋma di sá-u ní kí já nì mi?»

5 «M làá cáań dinyoondi kí tɔ̄

ni-kɔŋkɔnnaatɔb kɔkɔ pu,

ti-Dindaan di lī míǹ.

M làá jà ni-kɔkɔ ní sāǹ

báà ŋma ń nīn pée túĺ u-nimbiin cáaa,

ní báà ubɔ dāa kpá kí kóoǹ

bin bíi sáńee kí kpāfì.

6 «Míǹ boonee, m làá fàtīí gíiǹní Amɔn yab

bin bi cúú ki cūnnì kuyuŋuee.»

Ti-Dindaan nín sòon̄ puee dee.

Tin ti-Dindaan sòon̄ Eedoom yab puee

7 Ti-Dindaan sòon̄ Eedoom yab pu. Ti-Dindaan Mpɔŋkɔdaan nín sòon̄ puee sèé:

«Biciŋfitiibi kaa ti bí Teeman tiŋkin níii?

Binyiliibi kaa ti nyí níii?

Bi-ciiŋyi wáŋkì níii?

8 Deedan yab, sām̀maan!

Fàtīmaan ni-boon kí tīī.

Sām̀maan kí báĺ itaŋkpalɔkɔn!

M làá cáań dinàandi kí tɔ̄ Eesayuu naantiibi pu,

di sá yii ŋyunti bāań bí dáaĺ bi-tafal.

9 Bin kìtī fiinyi subiliŋee yaa láa bāań ni-ceeyee,

baa làá dāá kíǹ disubil dibaba.

Binaayub yaa láa dɔ́miń ni-cee kunyeeuee,

bi làá dāá nàan̄ tin kɔkɔ bi dāa ŋūǹee.

10 Di sá yii man di làá fūkul̀ Eesayuu naantiibi.

M làá nyāntí ni-balilammu kí páań mpaampiin pu.

Naa dāa gíti ŋūǹ kí cù kí báĺ niin.

Ni-naantiibi nì ni-nabiyaamu nì

ni-kɔŋkɔnnaatɔb làá nàan̄.

Ubɔ dāa kpá kí tùkù-ni yii:

11 <Yàntīmaan ni-taŋkpiibiliŋ,

ti làá kpèè-ŋi kí tīī-ni,

ní ni-kpiipoobi ŋūǹ kí nīn máká m-pu.>»

12 Di sá yii ti-Dindaan nín sòon̄ puee sèé:

«Pīlifì, bin maa nìn páb́ yii bí nyɔ̀ m-ŋuul kɔŋkɔnnyɔkaaunee nyùn̄ kaa là. Ní sii Eedoom, a dàkafī yii baa làá dáaĺ a-tafalaaa? A làá nyɔ̀ m-ŋuul kɔŋkɔnnyɔkaaun kaa bál̀. 13 Man ni-Dindaan di pūtì yii m sá Unimbɔti ní ki làá yàntī a-tiŋyil Boosiraa ń kpántí adigbun ŋma, ntimbiil paaŋŋu. Bi yaa làá dāá tɔ̄ ubɔ mbusu àá kí kɔ́ǹ ubɔ icooyee, kíǹ ní bi làá dāá yòon̄ ŋabika. Ki-timmu kɔkɔ làá dāá kpántí adigbun ŋma kí nīn cá jaanjaan.» Ti-Dindaan di sòon̄ míǹ.

14 Ti-Dindaan sòon̄ nì mi tibɔti tiba,

ní ntuun ŋubɔ cáań-tì ki nāatì atimbun kɔkɔ:

«Kóom̀maan kí kpāfì! Cùú jámaan Eedoom tiŋki.

Yīkìmaan! Jámaan-kì!»

15 «Tiŋman, m làá yàntī sii Eedoom

ń kpántí uluŋkikaa anibul kansikin,

kitiŋ kin ní báà ŋma làá nīn kpèé ki sìŋkīǹee.

16 A nìn fàantí báà ŋma,

a nìn dàkafī yii a tɔ́kɔ́ bin kíǹee kɔkɔ pu,

ama a nìn bíi kíiĺ a-ba ní.

A kóò itaŋkpalɔkɔn

ki lúń yilpu yilpu.

Ama báà a yaa máń a-diiku ki tɔ́kɔǹ yilpu

kii ukaabɔnee,

m làá dū-si kí tɔ̄ń taapu.»

Ti-Dindaan di lī míǹ.

17 «Eedoom tiŋki làá kpántí adigbun ŋma ní. Bisanjitiliibi kɔkɔ yaa láa ká bi nín nāaǹ-si puee, án làá dāá ŋá-bi bitii ní bí nīn búǹ ifoon. 18 An dāa bí kii Soodoom nì Goomoora timmu nì ntimu mun nìn māntìi tú-muee nín nìn nāaǹ puee ní, ti-Dindaan di lī míǹ^b. Ubɔ kaa làá dāá gíti kɔ́ niin, uniseen kaa dāa gíti kíikí kí kàl̄ niin.»

19 Ti-Dindaan bí yii:

«M làá dāá nīn bí kii gbikinti

nín nyēē kimɔgbaayin Jɔɔdan buŋgbandi

ki cá laakin timɔsɔn bée puee ní.

Kii dinimbil nín kábití puee,

m làá yàntī báà ŋma ń búntí.

Míǹ boonee ní ḿ lēē un m lèe

kí kàan̄ Eedoom tiŋki pu ubɔti.

Di sá yii ŋma di bí kii mamee?

Ŋma di ŋūǹ kí yíiń-mi tibuul?

Uyidaan ulɔu di ŋūǹ kí yūĺ m-nimbiin?»

20 Ní pīlifì tin ti-Dindaan bɔ́ntì

kí ŋá Eedoom tiŋkee,

nì tin u lēē kí ŋá Teeman yabee.

Bi làá dāá cúú-bi mpɔn ki dàtī kii tiwaŋkutee,

áli uluŋkikaa, án kpá kí gbíntí.

Bi-puee, bi làá nàan̄ bi-naakpaapɔɔku,

án kaa cáá yii án kpántí.

21 Bi nín lítì puee wooku

yāntì kitiŋ cīŋkì.

Bi gbìl̀ bi-biilii pu áli Tikati mɔɔl.

22 Unannanli bí kii ukaabɔn nín jɔ́ḿ kutaa pu, ki ŋàaǹ ki kpátí u-feeŋyi Boosiraa tiŋki puee ní. Yaadalee, Eedoom yab baatandambi pɔbiliŋ làá dāá bīil̀ kii imatiŋween nín cútí upɔdaan puee ní.

Tin ti-Dindaan sòon̄ Damaasi yab puee

23 Ti-Dindaan nín sòon̄ tibɔti tin Damaasi yab puee sèé.

«Amaati nì Aripaadi timmu

nín gbìl̄ kubɔbiiu gbanti puee,

ní icoo cúú-mu.

Bi-pɔbil yíkì kii tiŋku un pu

kubuŋkpaaŋŋu jītí waa ŋūǹ kí dòon̄ sooooyee ní.

24 Damaasi yab wunti yɔ̄tì

ní bi bíi bɔ́ntí kí sāǹ.

Tifaandi cúú-bi.

Dinyoondi kɔ́-bi ní bi bíi yáliŋkí

kii imatiŋween di cúú upɔdaanee.

25 An ŋá mana ní bi dū kitiŋ

kin nyáń diyindee ki fá míǹ,

kitiŋ kin nìn tīī-mi dipɔɔpindee.

26 Ti-Dindaan Mpɔŋkɔdaan nín sòon̄ puee sɔ̀. An pu ní ŋwiin gbantee, bi-nipɔmbi làá lítí mpaan nee pu ní bijanjaliibi kɔkɔ ń kpú. 27 M làá tūū digundi din māntìi tú Damaasi tiŋkee ŋŋmi ní ŋú wà ubɔti Been-Adaadi beecindi.

Tin ti-Dindaan sòon̄ Bilaalibub nibul puee

28 Ti-Dindaan nín sòon̄ tibɔti tin bilaalibub nì Asɔɔr beeŋi ŋin Babiloon bɔtiu Neebukadineesaar nìn jáń ki pɔ́ɔkiǹee sèé:

«Yīkìmaan kí cùú jáǹ Keedaar yab!

Ní nàan̄ bin kóò kuteeunee wanti kɔkɔ.

29 Ní fōōmaan bi-tantib nì bi-waŋkuti,

nì bi-kɔŋkooŋyi nì tin kɔkɔ bi cááyee.

Ní kpáaǹ bi-gutaamui,

ní kí nīn kūuntí mpɔn bi-pu yii:

Dinyoondi bí an kɔkɔ pu.»

30 Ti-Dindaan bí yii:

«Asɔɔr yab, sām̀maan, yīkìmaan malaa kí fīī ni-ba

Ní sāǹ kí báĺ itaŋkpalɔkɔn.

Di sá yii Babiloon bɔtiu Neebukadineesaar

bɔ́ntì ni-pu min u làá ŋá-nee.»

31 Ti-Dindaan bí yii:

«Yīkìmaan kí cùú jáǹ ditimbundi

din kā ŋgbansɔŋfin

kaa dàkafī yii tiba ŋūǹ kí ŋá-dèe.

Bi-punyɔmmu kaa cáá punuubi,

kaa cáá tikpàlkaal,

ní ki kóò bi-baba ŋkpaanceeti.

32 Binannanliibi làá yɔ̀ bi-gutaamui,

ní kí fūkul̀ bi-picaŋkpunti tin náaǹ nee.

Ti-Dindaan bí yii:

M làá jà binib bin kōol̀ jamba nee.

M làá cáań nnaabu kí tɔ̄ bi-pu

laakin kamaa bi yaa pée bée.

33 Asɔɔr tiŋki làá kpántí

iŋɔkɔ kɔŋkooŋŋu,

kunimbaau teeku kí nīn cá jaanjaan.

Ubɔ kaa làá nīn gíti kóò ki-ni,

báà uniseen.»

Tin ti-Dindaan sòon̄ Eelam tiŋki puee

34 Ti-Dindaan sòon̄ nì u-bɔnaatiliu Yeereemii Eelam yab pu. Ŋyunti gbantee Seedeesiyasi kpántì Juuda bɔtiu an kaa yúntì. 35 Ti-Dindaan Mpɔŋkɔdaan nín sòon̄ puee sèé:

«M làá kóoĺ Eelam yab tɔbu

bun pu bi pɔ̄ɔ̄yee.

36 M làá yàntī kubuŋu ń nyānní

ŋgan pú nì ŋgiil pú,

ŋwìiń nyalaŋki pú nì ŋu-jeetilaŋki pú,

an dàkà yii kitiŋ jannaatiliŋ pú

kí túĺ Eelam tiŋki watil.

«M làá jà Eelam yab, bí yàl̄ kí kɔ́ an kɔkɔ pu. Bi làá dāá ká Eelam yab ntimu kɔkɔn.

37 «M làá yàntī Eelam yab wunti

ń nīn gbáà kpàkpa bi-nannanliibi

nì bin nyàab̀ kí kpɔ̀-bee nimbiin.

Ti-Dindaan bí yii:

<M làá cáań nnaabu kí tɔ̄ bi-pu

m-ŋuukpaandi poon.

M làá dū kujaau kí tɔ̄ bi-pu

kí tin kúntí-bi.

38 M làá kúntí Eelam tiŋkin ubɔti nì u-kàliŋkpilib,

ní kí cáań m-beejal kí yóoń kitiŋ gbantin.>»

Ti-Dindaan di lī míǹ.

39 Ama míǹ boonee,

m làá fàtīí gíiǹní Eelam yab

bin bi nìn cūnnì kuyuŋuee bi-tiŋkin.

Ti-Dindaan di lī míǹ.