Yeereemii Timinsii 1

Yeereemii timinsii

gbɔŋku

Jeerusaleem ŋá kii ukpiipu un bi dūu fée

1 Ba di yì-tì ní kitiŋ kin poon binib nìn nyìkēe

ŋá kii ukpiipu un bi dūu fée.

Kíǹ di nìn nyáń diyindi atimbun kɔkɔ kansikin,

kpèè, kì kpántì uyumbu.

Kíǹ di nìn sá kii bɔtiisal

ki tɔ́kɔ́ ntimu kɔkɔ pu.

2 Kì cáá tinyati kɔkɔ ki sūǹ ní,

ní nnyinnyim pùub̀ ki-taŋkpunti.

Bin nìn néeń-kèe kansikin

báà ubɔ kaa ŋméeǹ-kì.

Ki-bɔɔbi kɔkɔ dū-kì ki fá

ní ki kpántì ki-nannanliibi.

3 Bi cúú Juuda tiŋki yab kɔkɔ

ki cūnnì kuyuŋu kinicantiŋin,

isaa jíń-bi tikpil niin.

Bi cūtìi kɔ́ dinibul diba pu

ní kaa ká laaba kí kàl̄.

Bin bí ki jì bi-boonee tin cúú-bi nsanni

bi bí kunimbaau poon.

4 Isan in bi dì ki cá Siiyɔn tiŋkinee kā dikpool,

kun puee báà ubɔ kaa ti cá ki jīǹ jiŋaalib.

Ki-punyɔmmu bíil̀,

ní ki-saraaŋaliibi bí iyaliŋki poon.

Ki-sapɔmbi bin kaa nyí uninjee

bí kunimbaaun.

Tíǹ gbanti kɔkɔ kpántì ntuntun ní ki tīī Siiyɔn yab.

5 Bi-nannanliibi jáń ki pɔ́ɔkiǹ-bi,

bi-pulincɔntiibi kā nì ŋgbansɔŋfi.

Bi-kpitii wíiŋŋu puee,

ti-Dindaan yāntì takaasi bíi jīǹ-bi.

Bi cúú bi-biyaamu ki cūnnì unannanli

nimbiin kuyuŋu ní ki wɔ́b́-bi.

6 Siiyɔn kā ki wāĺ ní bi yōoǹ

tin sá u-nyootee ki cáa búntì.

U-kàliŋkpilib kpántì kii ipeel

in kaa ti kāntí kumoou kí ŋmɔ́ee.

Baa ti ŋūǹ kí sāǹ kí ŋmátí

bikpambi bin bíi jì-bee ŋaan.

7 Nnaabu jéetì Jeerusaleem pu

ní kàa ti nyí laakin kì làá cùee,

ní ki téetí tigaajawan tin kɔkɔ

kì nìn cáá dooooyee pu.

Ŋyunti ŋun ki-niwul

kɔ́ binannanliibi ŋaanee,

báà ubɔ kaa dɔ́miń kí jòoń-kì.

U-nannanliibi nín ká kì lítì míǹ

kaa ti bí tibanee ní bi bí ki lāā.

8 Jeerusaleem yab ŋá ikpitikpaan ní,

an pu ní kì kpántì titampummool.

Bin kɔkɔ nìn tīī-kì disíndee

kíǹ ki kpèé-kì fám,

kun puee bi ká ki-cooi.

Ní kíǹ ki-ba sūǹ ki yáliŋkí

ki fātì ki-boon ki tīī.

9 Ikpiti jɔkɔnti táká ki-bɔkutil,

kaa dākafì kun ní an làá cáań boonee.

An ŋá-kì maamaaci kì nín lítì miŋyee pu,

ní ubɔ kaa bí kí ŋméeǹ-kì.

U bí yii: «M-Dindaan, kpèè isaa in poon m bée,

m-nannanliu bí ki gà u-bindi

u-pɔŋŋu pu.»

10 Binannanliibi fúkúl̀ Jeerusaleem

gaajawanti kɔkɔ pílpil.

Jeerusaleem yab ká anibul aba yab

dɔ́miń ki kɔ́ circir kɔŋkooŋŋun.

Ama ti-Dindaan, a nìn yíì

an nibuliŋee bí taa kɔ́

a-nikitil kansikin.

11 Ki-nib bí ki yáliŋkí

ki nyàab̀ tijin.

Bi ŋúb́ bi-gaajawammɔntiiti

kí kpántí tijin kí jī kí ŋmátí.

«M-Dindaan kpèè takaasi

un poon m bée.»

12 Nimbi bin còom̄ ki jītí dooyee,

kpèèmaan ubɔ naabuŋu bàn̄

man yɔu nee jutaaa?

Ubɔ naabuŋu bàn̄ ŋun poon ti-Dindaan

kɔ́ǹ-mi u-ŋuul wiiŋŋu dal naaa?

13 Yilpu ní u tɔ́ń ŋŋmi,

ní an kɔ́-mi ki tin bàn̄ m-kpabiŋ.

U píĺ kutaliŋŋu m-saŋŋu pu,

u gíiǹ-mi boon.

U nyántì-mi m kíǹ ki bí m-baba,

baabadalee m bí iween poon ní.

14 U kpáfì m-kpitii ki dūu bóob́ kpancikil,

nì u-ŋalii ní u dūu bóob́,

ní ki dūu léeǹ m-neen.

Ti-Dindaan bātì m-pɔŋŋu pu,

ní ki dū-mi ki líiǹ binib bin

nimbiin maa ŋūǹ kí fālifèe ŋaan.

15 Ti-Dindaan nyántì bibaatandambi

bin nìn bí m-ceeyee.

U bɔ́ntì dijanjakitil ki tɔ́ m-pu

bí dāá nà m-nipɔmbi kunaau.

Ní bi dɔ́miń ki nàn̄-bi kii

bi nín nà asubil ki còol̀ ŋkpam puee.

Míǹ ní ti-Dindaan nàn̄ Juuda yab

bin bí kii usapɔɔn un kaa nyí uninjee.

16 Tí nee kɔkɔ pu ní m bí ki sūǹ

m-nimbiliŋ dēē nnyinnyimin.

Kun puee un bàà làá ŋméeǹ-mi,

kí tīī-mi dimaŋfalee dū-mi ki fá.

M-biyaamu wáŋkì m-ŋaan,

kun puee m-nannanliu pɔ́ɔkiǹ-mi.

17 Siiyɔn tāntì u-ŋalii ki gbāam̀ ki gīī,

ama ubɔ kaa bí kí cúú-u

kí sɔ̄ŋkì u-pɔbil.

Ti-Dindaan tīī mara yii

Jaakɔb nannanliibi ń màntīí gíb́-u

ajan kɔkɔ pu.

Jeerusaleem kpántì kii

titampummoolee binib kansikin.

18 Ti-Dindaan nín ŋá puee sá deedee,

di sá yii bi-marab ní waa là.

Anibul kɔkɔ pīlifìmaan!

Kpèèmaan iween in poon m bée.

Bi cúú m-naacimpɔmbi nì m-bisalib

ki cūnnì kuyuŋu.

19 M bàà yíiń bin m nìn néeńee,

ní bíǹ kaa ti là m-bɔti.

M-saraaŋaliibi nì m-kpilib

kpíì kitiŋin,

ŋyunti ŋun bi nìn bíi nyàab̀

tijin kí jī kí ŋmátée.

20 M-Dindaan, kpèè mbusu un kɔ́-mee,

an cúú m-poon nai ki kūtì.

M-naŋki nyáń nì m-ba,

kun puee m jáń nì si an gíti lákatì.

Kitàataajiki kūū m-biyaamu mmɔŋki

ní kudiinee, a lì kii bitaŋkpiibi dumpuee.

21 Bi gbìl̄ m nín dùǹee,

ama ubɔ kaa dòoń kí sɔ̀ŋkì m-pɔbil.

M-nannanliibi kɔkɔ gbìl̄

nnaabu ŋun jéetì m-puee,

ní an mɔ́ɔkiǹ-bi

a nín ŋá-mi puee pu.

A yāntì ŋwiin ŋun a yóoǹee bāań^a,

yàntī tin poon m bí nee

ń bàń bi mun pu míǹ.

22 Kpèè ntoom min kɔkɔ bi ŋée,

kí ŋá-bi kii man kpitii puee,

a nín ŋá-mi puee!

Di sá yii m bí iyaliŋki poon ní

an kaa cáá digbèendi.