Yeereemii Timinsii 3

Un bí nnaabu poonee gbíntìi máká ti-Dindaan pu

1 M sá unil un di ká dinimbinaamandi

mbum min ti-Dindaan fōōyee puee ní.

2 Man ní u téé ki līntì u-nyɔkɔpu

ḿ còom̀ dibɔmbɔndin,

kaa sá ŋwalifin.

3 Man baba tafal ní u dátí

baabadal taafaau nì joou.

4 U fóofì-mi m-wunti dóò dáká daka,

ní ki wīī m-kpabiŋ.

5 U dū ntuntun nì agìń ki māntìi

gíb́-mi kii digundee.

6 U cáá-mi ki kāaǹ dibɔmbɔndi paaŋŋun

a lì kii bin kpíì ki dɔ̄ doooodooooyee.

7 Ti-Dindaan dū digundi ki māntìi tú-mi

ḿ taa ŋmā kí nyā,

ki túǹ-mi tikúti tin nyìm̀ee.

8 M kúuǹ ki yíiń-u ú dāá jòoń-mi

ní u kpáá u-tafaliŋ kaa pílifì m-wimmeem.

9 U dū ataŋkpakpaan ki pīiǹ m-saŋŋu

ní ki dū-mi ki dī nsaŋkpiti pu.

10 Ti-Dindaan bí m-cee kii

digbiŋgbil di wúliń m-puee,

kii gbikinti di nɔ̀kɔ̄ kubambaŋŋun

ki cí-mee.

11 U yāntì m fá m-saŋŋu,

ní u cúú-mi ki tɔ̄ntì, ki nāaǹ-mi.

12 U píĺ u-tɔbu

ki páaǹ mpiin ki bíitìń-mi.

13 U tɔ́ń u-piiŋyi kɔkɔ,

ní i dɔ́miń ki yáŋkì m-caŋ ki kɔ́.

14 Man ní m-nibul kɔkɔ lāā,

baabadalee man ní bi gà ilan ki bèel̄.

15 Ti-Dindaan yāntì m-nyɔkɔ túŋkì,

u nyūntì-mi ndabiim.

16 U tīī-mi itaŋkpabiiti m jú ki wīil̀,

ní ki dū ŋfantam ki pùkū-mi.

17 U lēē m-gbansɔŋfiŋu,

m súntì nnaam pu.

18 Niinee ní m bí yii: an dóò man pu ní,

maa ti cáá dimákal diba ti-Dindaan pu.

19 Téetí nnaabu ŋun poon m bée

nì takaasi un bíi jīǹ-mee pu.

An sá tilool tin tūee ní m bíi nyù.

20 M téetí múlmul,

ní an jákatí m-pɔbil.

21 Ama tin pu m téetí

ki cáá dimákalee sèé:

22 Di sá yii ti-Dindaan ŋanti kaa dóò,

u-neendi kaa kúntì.

23 U-deedeeu pɔ̀ntī ní

kutaafaau sá kamaa!

24 M lī m-ban yii: ti-Dindaan di sá man gaajati,

úǹ saŋŋu pú ní m kpèé.

25 Ti-Dindaan ŋān̄ bin kpèé u-saŋŋu púee

nì bin nyàab̀-uee cee.

26 An ŋān̄ á nīn kā diŋmiŋŋmil

ki cí ti-Dindaan jòońtam.

27 An ŋān̄ uninja ń léeń kpancikil

u-naacimpɔntin.

28 U yaa bíi dàkà-u min waa lèe,

ú cùú kàl̄ ŋkpaanceeti kí nīn ŋmí fɔ́ŋfɔŋ.

29 Ú gbàan̄ u-nimbiin ń cìb̄ dibulin,

an yaa yíì u làá ká dimákal.

30 Ú tàntī u-taŋkpanjil kí tīī

un là kí fáá-u ntampee^a,

ú nīn fòol̄ asiibil tijin yam

ki jīǹ ki díkì.

31 Di sá yii ti-Dindaan kaa féeń

unil kpataaa pu.

32 Báà u yaa bíi sàantí unil,

u làá dāá sɔ̄ u-saai,

kun puee u-neendi wīikí tikpil.

33 An kaa sá yii u-pɔbil poonee an mɔ̄ǹ-u

ú sàaǹ inifunaan kí sìntī-bi taapu.

34 Bi yaa bíi tà ki mátí kitiŋ pu

yumbui kɔkɔee,

35 bi yaa bíi kpèé unil nì u-baamɔŋyi fám

un bí yilpu yilpuee nimbilaaliyinee,

36 bi yaa kūū ubɔ bɔti digàndee,

ti-Dindaan kaa wāĺaaa?

37 Ŋma di ŋūǹ kí lì dinyɔɔbundi

tiba ń nyā kí nīn bí^b?

Ti-Dindaan di lèekī ní án bàńaaa?

38 Ti-Dindaan di kaa lì ní

tikpitil nì tiŋan kɔkɔ ŋáańaaa?

39 Too, ba pu ní unil un bí dimaŋfalin

min kamaa u sá unikpitee yáliŋkí?

40 Tí nyɔ̀kɔfì kí kpèè ti-bimbim kí dàkafì tiŋan,

kí gítiḿmaan ti-Dindaan cee.

41 Tí yòom̄maan ti-ŋalii yilpu

kí túĺ Unimbɔti un bí yilpuee

kí mèè nì ti-pɔbiliŋ kɔkɔ.

42 Taa yúliǹ-si deedee, ti-Dindaan,

ti jáń nì si,

ní saa dūu pú-ti.

43 A kɔ́ a-ŋuul poon

ki yíkìi jìn̄ ti-boon ki kūū-ti

kaa súń isaa.

44 A dū ditagbandi ki bīiǹ a-ba pu

ti-wimmeem ń taa bàń-si.

45 A dū-ti ki ŋá anibul kansikin

kii titampummool nì tiwan tin bi dūu fée.

46 Timbi ní ti-nannanliibi kɔkɔ

sòoǹ ki bíiĺ.

47 Tin dɔ̄ ki cí-tee di sá

dinyoondi nì nnaabu,

dinàandi nì sámbu.

48 M-nimbiliŋ pùub̀ nnyinnyim

sámbu un kɔ́ m-nibulee pu.

49 M sūǹ kaa ŋmīlifí,

an kaa cáá digbèendi,

50 kí nīn cí ti-Dindaan ń kàlīń

yilpu kí kpèè kí wāl̀.

51 M yaa bíi kpèé tin bāań

m-nibulee,

an wù m-nimbiliŋ ní.

52 Bin ná-mi fám maa ŋá-bi tibee

jì-mi kii m sá kinɔmbikee.

53 Man nì m-nimbiliŋ yéè

ní bi dū-mi ki tɔ́ dilɔkɔgindin

ki dū ditaŋkpal

ki tɔ́nní-mi.

54 Ní nnyim jɔ́m̀ ki bīiǹ m-yil pu

ní m bí yii an dóò man pu dee.

55 Kubɔbiku gbanti poonee,

m kúuǹ ki yíiń sii ti-Dindaan.

56 A gbìl̄ m-nyɔkɔ pu m nín lī yii:

«Taa kpáá a-tafal, pīlifì

m-kuŋkuuntii nì diniindi din m fátée.»

57 M nín kúuǹ ki yíiń-see, a sútìń ki pìl̄-mi

ní ki bí-mi yii: «Taa fàŋkì.»

58 M-Dindaan a mɔ́tì m-pu

ní ki fīī-mi ki líì.

59 M-Dindaan, a ká agìń

ŋin poon binib kɔ́ǹ-mee, pɔ̀-mi!

60 A ká

ipɔntoon in bi tɔ̀n̄-mee,

ki ká

bi nín búkú m-pu tiŋyee.

61 M-Dindaan, a gbìl̄ bi nín sìí-mi puee,

nì bi nín sòon̄ ki búkú m-pu puee.

62 M-nannanliibi dàkafī m-pu tibɔkpitil ŋma ní,

ní ki sòoǹ ki tòó m-pu baabadal.

63 Kpèè, bi yaa kāaa, bi yaa yúɔɔɔ,

man bɔti di sá-bi ilan bi gà.

64 Ti-Dindaan, pà-bi

tin bi ŋá-mee paati.

65 Kí pɔ̄ɔkì bi-pɔbiliŋ

mbusu ń kɔ́-bi.

66 Nì a-ŋuul poon ní a làá jà bi-boon,

kí céetí-bi kitiŋ pu.