Isirayeel yab bin bínní kuyuŋunee bíi mèé ti-Dindaan
5
1 Ti-Dindaan, taa súntítin bāań-ti nee pu.
Kpèè kí wāl̀ bi nín bí ki sìí-ti puee.
2 Kitiŋ kin a tīī-tee kpántì binicambi yaka,
biba di kíǹ ki yì ti-diiŋŋi.
3 Ti-baabi kaa ti bí,
ti kpántì ataŋkpiibil.
Ti-nab kpántì bikpiipoobi.
4 Ti dāā ti-nyim ní
kí nín ká kí nyɔ̀,
ti dāā ti-dɔi ní
kí nín ká kí kpāā.
5 Bin bí ki sàantí-tee kā ti-pu ní kàti kati,
ti-fam tīl̀, taa pée cáá diŋuŋfil báà fiii.
6 Ti tàntī ŋŋal Eejipiti nì Asuur
timmun watil pú
ní kí wàatī kí nín ká tin ti làá jēe.
7 Ti-baabi bin nìn ŋá ikpitee
kaa ti bí,
ní bi-kpitii gìńdi dɔ́miń
ki nyīkiǹ timbi pu.
8 Iyumbu di jíń ti-pu dinyandi
ní ubɔ kpá kí jòoń-ti.
9 Biyipɔɔdambi bin bí kuteeunee puee,
ti dù ti-maŋfal kí ŋá awoo
ní kí nín ká tijin.
10 Ŋkùm nín cúú-ti tikpil puee,
ti-wunti píĺ ní kpaŋkpam
kii ti kā dibubulinee.
11 Bi dōoǹ nì binimpoobi mpɔn
Siiyɔn tiŋkin,
ki dōoǹ nì bisapɔmbi
Juuda timmun.
12 Bi cúú bikàliŋkpilib ki lúntì idɔ pu,
kaa dū bijaŋkpilib ki yíiń tiba.
13 Binaacimpɔmbi tú tinàti
ní mbiyaamu tú idɔbɔɔ ki còom̄ ki gbéetí.
14 Bikpilib kaa ti kpáfí ki kàal̀
kitiŋ punyɔkɔ nyɔkɔpu
ní binipɔmbi gbēeǹ ilan digaal.
15 Dipɔɔpindi wáŋkì ti-pɔbiliŋin,
ti-ŋool kpántì dikpool.
16 Ti-beefuuliiki nyáń ti-yil pu ki lítì kitiŋ.
An sá-ti mbusu ní,
kun puee ti ŋá ikpiti.
17 An di yì-ti ní ti-pɔbiliŋ fōō tiweendi,
ní nnyinnyim yāntì ti kíǹ ki kpèé pùuu.
18 Di sá yii Siiyɔn jool
kpántì kuteeu
laakin ŋŋɔkɔmu tú ki yìiǹee.
19 Ama sii, ti-Dindaan,
doooo jaanjaan ní a sá ubɔti,
ní a-beejal bí ní ki cá abin abin.
20 Ba pu ní a làá súntí ti-pu talku,
kí fàtī a-boon kí tīī-ti kí nīn cá jaanjaan?
21 Ti-Dindaan, fàtīí gíiǹní-ti a-cee
ní ti mun ń gítiń a-cee tiŋman pu.
Pɔ̀ntī ti-bimbim tí fàtīí gítiń
kii dooooyee ti nín nìn bí puee.
22 A lafun dū-ti ki fá kɔkɔ kpataaa níii?
A lafun gíí ti-pu diŋuul tikpil míǹ níii?