Eeseekiyeel 3

1 Un nìn bíi sòoǹ nì mee nìn bí-mi yii: «Sii nisaaleen^a, yòon̄ kugbɔŋu kun dɔ̄ a-nimbiin nee kí ŋmɔ́. Míǹ boonee, á cùú sòoǹ nì Isirayeel yab.»2 M wāaǹ m-nyɔkɔ ní u dū kugbɔŋuee ki tīī-mi m ŋmɔ́.3 U nìn kútì ki lī yii: «Sii nisaaleen, dū kugbɔŋu kun m cáa bíi tìì-si nee kí ŋmɔ́ a-pool ń díkí.» Niinee ní m dū-ku ki ŋmɔ́ ní an gíti mɔ́ɔkì m-nyɔkɔn kii tisiilee.

4 Niin ní u nín bí-mi yii: «Nisaaleen, nín̄ cá Isirayeel yab cee kí dū m-nyɔɔbuŋŋi kí nàatī-bi. 5 Maa bíi tūǹ-si dinibul din sòoǹ isooncaan in pɔ̄ɔ̄yee cee, ama Isirayeel yab cee ní m bíi tūǹ-si. 6 M yaa bàà tú-si anibul akpaan ŋin sòoǹ isooncaan in pɔ̄ɔ̄ aa ŋūǹ kí gbìl̄ taapuee cee gba, bi bàà làá pīlifiǹ-si. 7 Ama Isirayeel yab kaa làá pīlifiǹ-si, di sá yii baa là kí pīlifiǹ-mi ní. Kun yì-tèe di sá yii bi-yiliŋ pɔ̄ɔ̄ ní bi-pɔbiliŋ mun dūu tīlifì. 8 Ama m làá pɔ̄ɔkì a-pɔbil kii bi-yalee, ní kí pɔ̄ɔkì a-yil kii bi-yaŋee! 9 M làá yàntī á nīn pɔ̄ɔ̄ kii ditaŋkpal din bi yíì diyaamaŋyee, kí nīn pɔ̄ɔ̄ ki jítiǹ ditaŋkpajal gba. An puee á taa fàŋkì-bi kí taa yàntī bi-bimbim ń fàaǹ-si, di sá yii pɔɔgaatib ní bi sá.» 10 U nìn nìkī ki bí-mi yii: «Sii nisaaleen, ŋátí a-tafal kí pīlifì anyɔɔbun ŋin kɔkɔ m làá tùkù-see, kí dū-ŋi kí kpāafì a-pɔbilin. 11 Míǹ boonee á cù a-yab bin ní bi cúú kuyuŋuee cee. Á sòoǹ nì bi yii: <Ti-Dindaan Unimbɔti nín lī puee sɔ̀>. Bi yaa bíi pílifíǹ-saaa, bi yaa kaa bíi pílifíǹ-saaa, sii dee sòoǹ nì bi.»

12 Niinee Unimbɔti Fam yōoǹ-mi ki cáa jɔ́m̀, ní m gbìl̄ m-boon pú dibintiŋkpaandi pu yii: «Tí nyɔ̄ŋkì ti-Dindaan laakin u lèekī u-nyooti ki dàkèe.» 13 M nìn gbìl̄ tiwan tin cáá kufoouee feeŋyi nín gbáà tɔb ki ŋáań kuwoou kuŋyee mun pu, ní ki gbìl̄ ataa ŋin nìn bí ki kɔ́ĺ-tèe wooku mun pu. An nìn sá dibintiŋkpaandi ní. 14 Ŋfam min bàà yōoǹ-mi ki jɔ́m̀ee kpáaǹ-mi ki búntì. Ti-Dindaan pɔŋŋu nìn dɔ́miń m-pu tikpil, ní m nín cá nì kunimbaaun, kaa ti nyí tin poon m bée. 15 M nìn bàn̄ Teel-Abiibi bin bi cúú kuyuŋu bi bí Keebaar mɔɔgbandee cee. M nìn kāl̀ bi-kansikin iwiin iluli, ní ki bākatiǹ m-ba sèeee.

Eeseekiyeel làá nīn sá Isirayeel nibul ciitiliu

(Kpèè 33.1-9)

16 Iwiin iluli gbanti jítèe ní ti-Dindaan bí-mi yii: 17 «A sá nisaaleen ní, ama m dū-si ki kpántì uciitil á nīn wàal̀ Isirayeel nibul. Á pīlifì m-nyɔɔbuŋŋi ní kí dū m-bɔkpaafikaati nee kí nàatī Isirayeel yab. 18 M yaa tùkū unikpiti yii: <A làá kpú>, ní aa kpáafì-u àá kaa sòon̄ nì u ú kpántí u-bimbikpitim kí ŋmátée, unikpitee làá kpú u-kpitii pu, ama sii pu ní m làá dū udaan kúm kpuulool kí lúntí. 19 Ama a yaa kpáafì unikpiti ní waa fātì u-boon ki tīī u-kpitii nì u-bimbikpitimee, u làá kpú u-kpitii pu, ní sii ń fīī a-ba. 20 Deedeedaan yaa fātì u-boon ki tīī u-deedeetuuŋŋi ní ki kíǹ ki bíi ŋáań tin kaa bí deedeeyee, m làá yàntī ú gbéetí kí lítí ní kí kpú. A yaa kaa kpáafì-u, u làá kpú u-kpitii pu. Baa ti làá téetí u-tunnyaaŋŋi ŋin u nìn ŋá njaminee pu, ama sii pu ní m làá dū u-kúm kpuulool kí lúntí. 21 Ama a yaa kpáafì deedeedaan gbanti yii ú taa ŋá ikpiti, ní u lafun yāntì kaa ŋá ikpitee, u làá ŋmátí, di sá yii a kpáafì-u, ní siiyee, a làá ká difiil.»

Unimbɔti yāntì Eeseekiyeel ŋmíl̀

22 M gbìl̄ ti-Dindaan bítam pu m-ni, ní u bí-mi yii: «Yīkìm̄, nín̄ cá ditantakalin, m làá sòoǹ nì si niin.» 23 Niinee ní m cúú ditantakal saŋŋu ki nín cá. Ti-Dindaan tí lēē u-nyooti ki dàkā niin kii m nín nìn tí ká Keebaar mɔɔgbandi pu puee. M ká mimmee ní ki tātìi gbāaǹ m-yigbeel tūū kitiŋ. 24 Niinee Unimbɔti Fam kɔ́ m-ni ní ki yōoǹ-mi ki síiǹ m-taaŋi pu. U bí yii: «Nín̄ kùǹ kí dūú pìin̄ kí kpàl̄ a-ba pu. 25 Nisaaleen, pīlifì. Binib làá dū iŋmii kí bóob́-si. Bi làá bóob́-si míǹ á taa ti ŋmā kí nyā binib kansikin. 26 M làá yàntī a-nyɔkɔ ń kpú ní á kpántí umuun, án nín làá ŋá pu á taa ti ŋmā kí wòoǹ-bee, di sá yii pɔɔgaatib ní bi sá. 27 Ama m yaa sòon̄ nì see, á wàan̄ a-nyɔkɔ kí tùkù-bi yii: <Ti-Dindaan Unimbɔti nín sòon̄ puee sèé>. Un yaa làá pīlifèe ń pīlifì, un kaa làá pīlifèe ń taa pīlifì, di sá yii pɔɔgaatib ní bi sá.»