Eeseekiyeel 4

Eeseekiyeel nì bi nín māntìi tú Jeerusaleem puee

1 «Nisaaleen, pīlifì, yòon̄ kuyɔkɔu brikisiu kí dūú bíĺ a-nimbiin. Lēē brikisee pu Jeerusaleem tiŋki. 2 Míǹ boonee, á lēē kí dàkà yii bi māntìi tú-kì: gbà abɔbil kí gbà ntam kí kpúkuń digundi caŋin. Lēē bijanjaliibi tantib ní kí lēē tijanjawan kí màntīí tū-kì. 3 Yòon̄ tikúti piliŋku kí dū-ku kí síiń án nīn sá kii digundi ki bí sii nì kitiŋee kansikin. Dū a-nimbikpeeŋu kí báań Jeerusaleem tiŋki pu. A làá ká yii bijanjaliibi māntìi tú-kì kí jáǹ-kì. Sii di bíi jáà nì kì dee. Án làá nīn sá kudaaŋŋu ní ki tīī Isirayeel nibul.

4 «Dòon̄ ŋgan pú ní kí dū Isirayeel nibul kpitii kí páań a-pu. Iwiin in nyɔkɔm a làá nīn dɔ̄ dijandi gbanti púee, a làá nīn tú bi-kpitii míǹ ní. 5 Mama m-ba làá síiń-si iwiin in nyɔkɔm làá nīn sá kii abin ŋin nyɔkɔm Isirayeel yab dūu ŋá ikpitee. Míǹ puee a làá dū iwiin saalaa kpá alaataa anaa ní kí túń Isirayeel nibul kpitii nyiŋfiŋu. 6 Ŋyunti gbanti yaa jítèe, á fàtī kí dòon̄ ŋgiil pú ní kí túń Juuda beel kpitii nyiŋfiŋu iwiin imuŋku ili. M síiǹ-si ŋwiin ŋubɔee dibindi diba. 7 Míǹ boonee, á fàtīí kpèè Jeerusaleem tiŋki kin bi māntìi tú kí jáǹ-kèe. Á tàntī a-ŋaliŋu ncal ní kí sòoǹ m-nyɔɔbundi kí tɔ̄ ki-pu. 8 Mamee, m làá dū iŋmii kí bóob́-si án nín làá ŋá pu á taa ŋmā kí fàtī dijandi diba pu kí gítí din kíǹee kí nīn cí iwiin in bi nín māntìi tú kitiŋ kí jáǹ-kèe làá kúntée.

9 «Yòon̄ bilee nì ɔɔji nì atuun nì ikpintumpu nì iyoo nì bilee un pɔ̄ɔ̄yee. Dū kɔkɔ kí ŋá disambibaantiilin kí ŋmàlim̀ kí dūú ŋá kpɔnɔ. Iwiin saalaa kpá alaataa anaa in a làá dūú dòon̄ a-takakal puee, tijin tin a làá nīn jīǹee dee. 10 Ŋwiinee, tijin tin a làá nīn jīǹee làá nyā graambi alaataa ali ní. A làá nīn jīǹ míǹ ní ŋwiin kamaa. 11 Nnyim min a làá nīn nyùee muee, bi làá ŋmàntī-mì ní kí tīī-si. Ŋwiinee, a làá nīn nyù liitiri ubɔ ní. 12 Bi nín cáá ɔɔji ki ŋáań kalaabi bi bí puee, míǹ ní a-jinti làá nīn bí. Á dū binib binti kí kpāā ŋŋmi kí púĺ kpɔnɔb gbanti báà ŋma nimbiin.» 13 Ní ti-Dindaan kútì ki lī yii: «Míǹ ní Isirayeel yab làá jī tijin tin kɔ́ tijɔkɔndee nnicantimu mun poon m làá jà-bi kí cùnnèe.» 14 Niinee ní m téeń yii: «Ti-Dindaan Unimbɔti, maa kɔ́ǹ m-ba tijɔkɔndi ki ká! Doooo m-biyatin, maa láa pée ŋmɔ́ kuwaŋkuluu kun kpíìyee àá kuwaŋkuluu kun ní upeecuncuti cúúyee. Báà kunaŋu kun kòóyee kaa láa pée kɔ́ m-nyɔkɔn.» 15 Ní ti-Dindaan kíí-mi yii: «An yaa sée, m pú-si nsan á dū tinaabin kí kpāā ŋŋmi kí púĺ a-kpɔnɔu kí yàntī tinibin.» 16 Ní u gíti kútì ki lī yii: «Nisaaleen, m làá kúntí kpɔnɔb bin bi dūu kpáafì Jeerusaleem tiŋkinee. Binib làá dāá ŋmàntī bi-jinti ní kí ŋmɔ́ kunimbaaun, ní kí dāá ŋmàntī nnyim kí nyɔ̀ kufaaŋŋun. 17 Di sá kpɔnɔ nì nnyim làá dāá lóó-bi, ní báà ŋma dāa kíǹ ki bí dinyoondin. Bi làá dāá dúntí ní kí kpú bi-kpitii pu.»