Eeseekiyeel 12

Eeseekiyeel tīī bin bi làá cúú kuyuŋuee kudaaŋŋu

1 Ti-Dindaan sòon̄ nì mi yii: 2 «Nisaaleen, a kóò pɔɔgaatib kansikin ní. Bi cáá animbil ní kaa wāĺ, ní ki cáá atafal kaa gbìl̀. Di sá yii bi sá pɔɔgaatib ní^a. 3 Sii, nisaaleen, bɔ́ntí a-tɔkɔl kii a cá kuyuŋuee ní kí búntí kuyuŋu ŋwiimpu bi-nimbilaaliyin! Yīkì laakin a bée kí nīn cá laaba kuyuŋu bi-nimbilin. An yaa yíì bi làá gbìl̄ taapu yii bi sá pɔɔgaatib. 4 Nyāntí a-tɔkɔl din a bɔ́ntì ki cáa cá kuyuŋuee mmɔŋki ŋwiimpu báà ŋma ń wāl̀. Kujoou yaa jóotèe, á nyā kii bin bi cúú kuyuŋuee nín nyēē puee bi-nimbilaaliyin. 5 Á lùkù kí cíĺ digundi din bi máń ki tú kitiŋee bi-nimbilaaliyin ní kí dī niin kí nyā. 6 Á yòon̄ ditɔkɔl kí páań a-gbigbipeeu pu bí nīn wāĺ-si ní á nyāntí-dì dibɔmbɔndin. Á dū tiwan kí bìin̄ a-nimbiin kí taa kpèè kitiŋ nee. Di sá yii m làá nīn sá kii kudaaŋŋuee ní ki tīī Isirayeel yab.» 7 Niinee ní m ŋá kii ti-Dindaan nín kpáafì-mi puee. M nyántì ditɔkɔl din m bɔ́ntì kii uyumbu tɔkɔlee ŋwiimpu. Kujoouee ní m dū m-ŋal ki lùkū ki cíl̀ digundi din bi máń ki tú kitiŋee ní ki nyántì ditɔkɔl dibɔmbɔndi poon ní ki yōoǹ ki páaǹ m-gbigbipeeu pu bi-nimbilaaliyin niin.

8 Kutaa wúntì kutaafaauee ní ti-Dindaan sòon̄ nì mi yii: 9 «Nisaaleen, mimmee Isirayeel yab pɔɔgaatib nee kaa bālifì-si yii ba ní a ŋáańaaa? 10 Tùkù-bi yii: <Ti-Dindaan Unimbɔti nín sòon̄ puee sɔ̀. Tibɔti nee sá ki tīī dibɔtibil din bí Jeerusaleemee nì Isirayeel yab bin kɔkɔ bí ki kóò kitiŋ nee poonee ní.> 11 Tùkù-bi yii a ŋá míǹ kí tīī kudaaŋŋu ní. Kun a ŋá nee, kun làá bàń bi-puee dee, di sá yii bi làá cúú-bi kí cùnnì kuyuŋu. 12 Dibɔtibil din bí bi-kansikinee làá dāá yòon̄ u-wanti kí páań u-gbigbipeeu pu ní kí nyā dibɔmbɔndin. Bi làá dāá sāā kí cíĺ digundi ní ú dī niin kí nyā. U làá dāá dū tiwan kí bìin̄ u-nimbiin án nín làá ŋá pu ú taa ti ká kitiŋ nee nì u-nimbiliŋee. 13 M làá dāá dū m-laaŋku kí tɔ̄ u-pu ní m-taliŋku ń sàl̄-u. M làá cùnnì-u Babiloon, Kaldee yab tiŋkin. Ama waa làá ká kitiŋ gbanti ní kí kpú. 14 M làá yàaǹ bin kɔkɔ māntìi tú-uee nì u-tɔntɔnliibi nì u-janjaliibi ijaan kɔkɔ pu. Míǹ boonee ní ḿ dū kitàataajiki kí jà-bi. 15 Bi làá dāá béé yii m sá bi-Dindaan, ŋyunti ŋun m yaa láa jìn̄-bi ki yàl̄ atimbun kɔkɔn nì ntimu kupaau poonee. 16 Ama m làá dāá kíń bi-kansikin binikaaŋkaabi bin làá dāá ŋmátí kí nyā kujaaun nì ŋkùmin nì bìlbil kúminee. Bíǹ làá dāá māafì ntimbiil tuuŋŋi ŋin kɔkɔ bi ŋée. Ŋyunti gbantee, bin kóò niinee làá dāá béé yii man di sá bi-Dindaan.»

17 Ti-Dindaan sòon̄ nì mi yii: 18 «Nisaaleen, a làá dāá jī a-jinti ní a-wunti jìkì, ní kí nyɔ̀ a-nyim nì dipɔɔbiildi nì inimɔɔn poon. 19 Á dāá tùkù kitiŋ nee nib yii: Ti-Dindaan Unimbɔti nín sòon̄ nì bin kóò Jeerusaleem ki bí Isirayeel tiŋkinee pu puee sɔ̀. Bi làá dāá jī bi-jinti inimɔɔn poon ní kí nyɔ̀ bi-nyim dipɔɔbiildi poon. Di sá yii bi làá dāá nàan̄ bi-tiŋki. Tiba nì tiba kaa làá dāá gíti kíń doo, di sá yii bin kóò kitiŋ nee dū tipɔmbɔti ki gbéeǹ-kì. 20 Ntimu mun poon binib nìn kóòyee làá kpántí adigbuŋkati ŋma, ní kitiŋ nee ń kpántí kuteeu. Niinee ni làá dāá béé yii m sá ni-Dindaan.»

Ti-Dindaan nín lī puee, án làá ŋá míǹ

21 Ti-Dindaan sòon̄ nì mi yii: 22 «Nisaaleen, ba pu ní ni gà Isirayeel tiŋki dilaŋkpandi nee yii: <Iwiin fɔ̀kɔntí ki cá, ama ní an kaa ŋáań kii an nín lēē ki dàkā puee ní>? 23 Too tùkù-bi yii ti-Dindaan Unimbɔti nín sòon̄ puee sɔ̀. M làá kúntí dilaŋkpandi gbanti. Baa làá ti gāā dilaŋkpandi gbanti Isirayeel tiŋkin. Ama á tùkù-bi yii: <Iwiin tóobiń, míǹ ní an nín lēē ki dàkā puee kɔkɔ làá ŋá.> 24 Di sá yii nnyimɔn leedakaŋ kaa ti làá nīn bí, ní ubɔ mun kaa làá ti sòoǹ kí mɔ̄ntì yii tiba làá ŋá Isirayeel yab kansikin. 25 Di sá yii m sá ni-Dindaan ní. M sòoǹ tin m cáá kí sòoǹee, ní án lafun làá ŋá míǹ kaa làá tàan̄. Tiŋman pɔɔgaatib, ni-yuntii nee poon ní m làá sòoǹ ní kí ŋá m nín sòon̄ puee. Ti-Dindaan Unimbɔti di sòon̄ míǹ.»

26 Ti-Dindaan sòon̄ nì mi yii: 27 «Nisaaleen, Isirayeel yab nín bí ki sòoǹ tiŋyee sèé: <Kijapaai nee leedakaŋ sá iwiin iba poon bɔti ní. U bíi sòoǹ ki nàatī iwiin in dátèe poon bɔti ní.> 28 An pu ní an sá á tùkù-bi yii ti-Dindaan Unimbɔti nín sòon̄ puee sèé: <Tin m sòon̄ee, m làá yàntī án ŋá míǹ kaa làá tàan̄.> Ti-Dindaan Unimbɔti di sòon̄.»