Eeseekiyeel 13

Inyimɔn bɔnaatiliibi

1 Ti-Dindaan sòon̄ nì mi yii: 2 «Sii nisaaleen, fōō m-bɔti kí nàatī bin yíì bi-ba yii bi sá Unimbɔti bɔnaatiliibi Isirayeel tiŋkin ní ki nàatī tin bíǹ bi-ba lèe. Tùkù-bi yii bí pīlifì m-nyɔɔbundi. 3 Mama ni-Dindaan Unimbɔti bíi lì yii nnaabu làá jēetí bibɔnaatiliibi bin kaa nyí tiba gbantee pu! Bi nóó tin bíǹ bi-ba bɔ́ntì kí sòoǹee ní ki nāantí bíǹ bi-ba leedakaŋ. 4 Isirayeel yab, ni-bɔnaatiliibi bí kii ŋŋɔkɔmu mun tú ki yìiǹ adigbunnee ní. 5 Baa jɔ́m̀ ki ŋéeb́ abun ŋin bí digundi puee, kaa tí máń digundi din làá wúń ni-pu ní ŋmā kí já kujaau ti-Dindaan wiiŋŋu dalee^a. 6 Bi cáá inyimɔn leedakaŋ ní tin bi sòoǹ yii án làá dāan̄ee kaa sá ibaamɔn. Bi lì yii: <Ti-Dindaan nín lī puee sèé>, ama ní man ni-Dindaan kaa tú-bi. Ní bi kā ki cí yii ḿ ŋá tin bi sòon̄ee kí tīī-bi! 7 Ama ní m bí-bi yii: <Aleedaka ŋin ni kée kaa sá inyimɔn leedakaŋaaa? Tin ni sòon̄ yii an làá dāan̄ee kaa sá inyimɔnaaa? Ni gà ni-biŋŋi ki lì yii ni nàatī tin ti-Dindaan tīī-ni ní nàatēe, ama ní maa kpáàa sòon̄ nì ni gba! 8 Too, man ni-Dindaan Unimbɔti bíi sòoǹ yii: ni nín ŋá pu ki yāntì inyimɔn nyɔɔbuŋŋi nì inyimɔn leedakaŋee gbītì an kɔkɔ puee, m làá jáǹ-ni.> Man ni-Dindaan Unimbɔti nín sòon̄ puee dee!

9 «M làá dàkà bibɔnaatiliibi bin kántì inyimɔn leedakaŋ ki sòon̄ tinyimɔmbɔtee m-pɔŋŋu. Baa ti làá nīn cáá mpaan m-samaau kansikin. Baa làá ŋmà bi-yiŋŋi Isirayeel nibul^b gbɔŋkun ní baa ti làá gítí bi-tiŋkin mun. Niinee bi làá béé yii m sá ni-Dindaan Unimbɔti.

10 «Bibɔnaatiliibi bí ki kíiĺ m-nibul ki lì yii ŋgbansɔŋfi bí, ama ní ŋgbansɔŋfi kaa bí. M-samaau bíi māā digundi ní bíǹ bí ki pōontí-dì. 11 Too, tùkù bin bíi pōontí gbanti yii: Digundi làá lítí! Utaakpaan ubɔ làá nì ní ataanyiŋkumbil ń lítí ní kubuŋkpaaŋŋu ń jītí. 12 Digundee yaa láa lítèe, bi làá dāá bàlifì-ni yii: <Ni nín póoń digundi puee bí la?> 13 An ní man ni-Dindaan Unimbɔti nìn bíi tùkù-nee yii: M-ŋuul poonee, m làá cáań kubuŋkpaaŋŋu, ní m-bum ń cáań utaakpaan ní ataanyiŋkumbil ń lítí kí nàan̄ tikɔkɔ. 14 M làá kpēelikì digundi din ni póońee. M làá téé-dì kí lúkú kitiŋ ní di-nyeel ń nyā kí páań mpaampiin pu. Di làá lítí ní kí nà-ni dúsi dusi ní ní béé yii m sá ni-Dindaan. 15 M làá yàntī m-ŋuul ń tɔ̄ di-tundi digundi nee nì bin póoń-dèe pu kí cáá kátí. Bi làá dāá tùkù-ni yii: <Digundee kaa ti bí! Ubɔ kaa ti bí kí póoń-dì! 16 Isirayeel bɔnaatiliibi bin nìn sòoǹ ki nàatī Jeerusaleem puee kaa ti bí. Bi nìn kāntí aleedaka ki lì yii ŋgbansɔŋfi bí, ama ní ŋgbansɔŋfi kaa bí! Man ni-Dindaan Unimbɔti di sòon̄.»

Mbusu dɔ̄ ki cí bikpaŋkpantiibi

17 «Nisaaleen, pīlifì, sòoǹ nì Isirayeel nimpoobi bin bɔ́ntí tin bi lèe ki cáa nàatēe, fōō Unimbɔti nyɔɔbundi kí dūú nàatī-bi. 18 Tùkù-bi tin man ni-Dindaan Unimbɔti sòon̄ee yii: Nnaabu làá jēetí ni-pu! Ni cáá igban ki lù abɔmbil ki fūuntí, ní ki lù iŋaabu nì i-bulifi ki tìì binib kɔkɔ kí ŋmā kí nīn cáá mpɔn bi-pu. Ni là kí fōō m-nibul maŋfal kí gāā ni-bindi ní ki kpáafí nimbi ni-ba yal. 19 Ni bíiĺ-mi m-nibul nimbiin kí ŋmā kí ká ɔɔji aŋaŋkul akaaŋkaa nì kpɔnɔb bikaaŋkaabi. Ni nín bíi mɔ́ntí m-samaau un di néeń ki pílifí tinyimɔmbɔtee, ni bíi kù bin kaa bàà máaǹ ŋkúmee ní ki yàntī bin kaa bàà máaǹ kí nīn bí dimaŋfalinee bí dimaŋfalin dee. 20 An pu ní man ni-Dindaan Unimbɔti bíi lì yii m làá jáǹ ni-bɔmbiliŋ ŋin ni cáa sàl̀ bin kíǹee. M làá dáaĺ-ŋi kí tìfì kí fúutí ni-ŋaliyin ní kí fīī bin ni cúúyee kí líí. 21 M làá dáaĺ ni-ŋaabui kí cátí ní kí fīī m-samaau kí nyāntí ni-ŋaan. Naa ti làá ŋmā kí dū-bi kí kpántí ni-wanti tin ni cúúyee ní ní béé yii man di sá ni-Dindaan. 22 Ni dū ni-nyimɔŋyi ki yɔ̄tì deedeedambi wunti ŋyunti ŋun ní maa bàà là bi-wunti ń yɔ̀tēe. Ni tīī binikpitib kunyannyaau, ki pīiǹ-bi nsan bí fá bi-bimbikpitim kí ŋmátí. 23 Míǹ puee, naa ti làá ká inyimɔn leedakaŋ kaa ti làá sòoǹ tinyimɔmbɔti. M làá fīī m-nibul kí nyāntí ni-ŋaan. Mimmee ni làá béé yii m sá ni-Dindaan.»