Eeseekiyeel 14

Isirayeel yab máaǹ kí dū awaa kí fá

1 Dalbee Isirayeel tindaŋkpilib biba dɔ́miń ki kāl̀ m-nimbiin. 2 Niinee ní ti-Dindaan bí-mi yii: 3 «Nisaaleen, binib nee tú bi-waaŋi bi-pɔbiliŋin ní. Bi-nimbikpeeŋu pée cɔ́ kun di yàntī bi ŋáań ikpitee pu ní. A dàkafī yii m làá yàntī bí bàlifì-mi tiba ḿ kíí-baaa? 4 An puee sòoǹ nì bi kí tùkù-bi tin man ni-Dindaan Unimbɔti lēe yii: Tí dūú ŋmàntī kii Isirayeel yab kansikin ubɔ tú u-waaŋi u-pɔbilin ní u-nimbikpeeŋu pée cɔ́ tin di yàntī u ŋáań ikpitee pu, ní boonee ki dɔ́miń kí bàlifì Unimbɔti bɔnaatiliu, man ni-Dindaan di làá kíí-u m-ba. M làá kíí-u kí nóó nì awaa ŋin nyɔkɔm u cááyee ní. 5 M làá ŋá míǹ ní kí gbēē Isirayeel yab bin dū-mi ki fá ki kíǹ ki nóó awaayee pɔbil. 6 An pu ní á tùkù Isirayeel yab yii: <Ti-Dindaan Unimbɔti bí-ni yii ní kpántí ni-bimbim. Fàtīmaan ni-boon kí tīī ni-waaŋi ní kí dū ni-timbiilituuŋŋi kɔkɔ kí fá.>

7 «Isirayeel niliu ubɔ àá unicaan un kóò Isirayeel tiŋkinee yaa dū-mi ki fá ní ki yāntì tiwaabɔti jíń u-pɔbil ní kaa fātì u-boon ki tīī tin di yàntī u ŋáań ikpitee, udaan yaa dɔ́miń m-bɔnaatiliu cee kí bàlifì kí béé m-lammee, man ni-Dindaan di làá kíí-u m-ba. 8 M làá jáǹ unil gbanti. M làá yàntī ú kpántí ŋabika bí nīn kíǹ ki cáa gà ilan. M làá nyāntí-u m-samaau kansikin ní ní béé yii man di sá ni-Dindaan.

9 «Ama ubɔnaatil yaa yāntì an ŋmātiǹ-u ní u gāā u-bindi ki kíí udaan tibee, mimmee an dàkà yii man ni-Dindaan di ŋmātiǹ ubɔnaatil gbanti. M làá dàkà udaan m-pɔŋŋu ní kí nyāntí-u m-nibul Isirayeel yab kansikin. 10 Ubɔnaatil gbanti nì un dɔ́miń ki bālifèe kɔkɔ ŋá ikpitibaanti ní bi làá túń bi-kpitii kpuulool. 11 An yaa ŋá mimmee, Isirayeel yab kaa ti làá gáatí kí wàatī-mi. Baa ti làá ŋá ikpiti kí kɔ́ǹ bi-ba tijɔkɔndi. Ama bi làá nīn sá m-nibul ní man ḿ nīn sá bi-Nimbɔtiu. Man bi-Dindaan Unimbɔti di lī míǹ.»

Tiba kaa ŋūǹ kí pìin̄ Unimbɔti bɔsooŋyi nsan

12 Ti-Dindaan bí-mi yii: 13 «Nisaaleen, kitiŋ kiba pu nib yaa kaa yúl̀-mi deedee ki ŋá ikpitee, m làá dàkà-bi m-pɔŋŋu. M làá bīil̀ bi-kpaajinti tin bi kpáafèe ní kí yàntī ŋkùm ń nyā, ní kí kpɔ̀ kí céetí kitiŋee nib nì ki-waŋkuti. 14 Báà binib bita nee, Noowa nì Daniyeel nì Yoob yaa bí kitiŋ gbanti nib kansikin, bi-deedeeu làá fīī bíǹ ŋmaniŋma ní. Man ni-Dindaan Unimbɔti di lī míǹ.

15 «Àá tí lì yii m dū ipeecuncuti ki tɔ́ kitiŋ gbanti nib pu. Kitiŋee làá kpántí kii kuteeuee ní, di sá ipeel làá kpɔ̀ kí céetí ki-nib ní ipeel puee, ubɔ mun kaa ti làá kíí kí dī niin. 16 Báà binib bita gbanti yaa bí kitiŋee poon, bíǹ baba di làá ŋmátí. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba, ní kitiŋee làá kpántí kuteeu.

17 «Àá m yaa cáań kujaau ki tɔ́ kitiŋee nib pu ní ki pú bijanjaliibi nsan bí kpɔ̀ kí céetí kitiŋee pu nib nì ki-waŋkuti, 18 ní binib bita gbanti yaa kóò kitiŋee poonee, bíǹ baba di làá ŋmátí. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba.

19 «M yaa tí cáań bìlbil kúm ki tɔ́ kitiŋee nib pu ki kpáatì m-ŋuul ki sītì bi-pu kí kpɔ̀ kí céetí ki-nib nì ki-waŋkuti, 20 ní Noowa nì Daniyeel nì Yoob bí kitiŋee poon, bi-deedeeu làá fīī bíǹ ŋmaniŋma ní. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba.»

21 Míǹ boonee ní ti-Dindaan Unimbɔti bí-mi yii: «M dū inaabukpaan inaa ki tɔ́ Jeerusaleem pu kí kpɔ̀ kí céetí binib nì tiwaŋkuti. Inaabu gbanti di sá kujaau nì ŋkùm nì ipeecuncuti nì bìlbil kúm. 22 Ama biba làá ŋmátí. Bi làá nyāntí bininjab nì binimpoobi kitiŋin. Bi làá dāan̄ kí kūtì ni-pu. Ni làá dāá ká bi-bimbim nì bi-tuuŋŋi ní kí tīī-mi mmɔ́ɔn m nín dū nnaabukpaan ŋun ki tɔ́ Jeerusaleem puee. 23 Ni làá kpántí ni-landɔkɔŋu, di sá yii ni làá ká-bi ní kí béé yii m cáá nsan kí ŋá kitiŋ nee kii m nín ŋá-kì pu nee. Man ni-Dindaan Unimbɔti di sòon̄ míǹ.»