Eeseekiyeel 41

1 Uninjee nìn cáá-mi ki kɔ́ǹ kunimbɔtidii dikpaaŋkun ní ki ŋmāntì-ku. Bi nìn máń agun ali ní agunee kansikinee, nsan ŋun bi dì ki kóò kudikpaaŋŋu gbantinee nìn bí. Digundi kamaa gbifiŋŋu nìn sá kukaluuee fɔkɔŋŋu miluu pu.2 Kipunyɔkɔ waaŋŋu nìn sá kukaluuee fɔkɔŋŋu saalaa pu, ní agun ŋin bí ajanliitil puee gbifiŋŋu sá kukaluuee fɔkɔŋŋu miŋmoo pu. Kudii ku-ba púuŋŋu nìn sá kukaluuee fɔkɔŋŋu imuŋku ili pu, ní ŋwaan sá mmuŋku pu.3 Míǹ boonee ní u jítìi kɔ́ poon poon diiku ki ŋmāntì kipunyɔkɔ jaantalkub ní ki ká kukaluuee fɔkɔŋŋu mili pu, ní kipunyɔkɔ ki-ba waaŋŋu sá kukaluuee fɔkɔŋŋu miluu pu. Ki-guŋŋi gbifiŋŋu nìn sá kukaluuee fɔkɔŋŋu miluli pu.4 U nìn ŋmāntì kudii ku-ba ní ki ká mpúun pú kukaluuee fɔkɔŋŋu mmuŋku pu, ní ki ká ŋwaan pú mmuŋku pu. Niinee ní u tùkū-mi yii niin di sá <Circir páaa laŋki>.

Ndibiyaamu mun kútì kunimbɔtidii puee

5 Míǹ boonee ní u ŋmāntì kunimbɔtidii poon gundi ní ki ká ŋgbifin kukaluuee fɔkɔŋŋu miluu pu. Bi nìn máń ndibiyaamu ki māntìi tú digundi gbanti ní ndibiyaamu gbanti waaŋŋu nìn sá kukaluuee fɔkɔŋŋu mili pu. 6 Ndibiyaamu gbanti nìn tɔ́kɔ́ tɔb pu mita pu, ní dicindi kamaa cáá adiin mmuŋku nì saalaa. Bi nìn máń kidibiki kamaa ki tɔ́kɔǹ boon pú gundin, ama an kaa nìn kɔ́ kunimbɔtidii ku-ba gundin. 7 Dicindi kamaa puee, bi nìn bàtī digundi gbifiŋŋu pu, ní ndibiyaamu wàantí ki cá, míǹ ní an nìn bí ki māntì kunimbɔtidii ki tú. An puee, yilpu dibiyaamu nìn wāā ki jítiǹ taapu yamu. A yaa nìn kíĺ taapuee, a nìn jɔ́ḿ adiin ŋin tɔ́kɔ́ taapu yaŋ puee ní kí nín bà ŋin mun gíti tɔ́kɔ́ kansikin yaŋ puee. 8 M nìn gíti ká yii ndibiyaamu mun bi nìn máń ki tú kunimbɔtidiiyee nìn lībitì adiin ŋin kíǹee kɔkɔ. Mu nìn lībitì-ŋi kukaluuee fɔkɔŋŋu miluu pu ní. 9 Ndibiyaamu gundi din bí boonee gbifiŋŋu sá kukaluuee fɔkɔŋŋu miŋmoo pu. Adiin ŋin bi nìn máń ki nákáǹ kunimbɔtidii boon gundi 10 nì adiin ŋin kíǹee kansikin nìn sá kukaluuee fɔkɔŋŋu mmuŋku pu ki māntìi tú. 11 Ndibiyaamuee punyɔmmu muli nìn túĺ mpaan ŋun bí fám gbanti watil pú. Kipunyɔkɔ kiba nìn bí ŋgan pú ní kiba mun bí ŋgiil pú. Digundi din bi nìn máń ki tú mpaan gbantee gbifiŋŋu nìn sá kukaluuee fɔkɔŋŋu miluu pu. 12 Kunimbɔtidii ŋwìiń jeetilaŋki púee, kudii kubɔ nìn bí mpaan ŋun dɔ̄ fám gbanti nyɔkɔpu. Kudiiyee púuŋŋu nìn sá kukaluuee fɔkɔŋŋu imuŋku inaa nì saalaa pu, ní ku-waaŋŋu sá imuŋku ita nì saalaa pu. Ku-guŋŋi gbifiŋŋu nìn sá kukaluuee fɔkɔŋŋu miŋmoo pu. 13 Uninjee nìn ŋmāntì kunimbɔtidii ní ki ká yii ku-púuŋŋu nìn sá kukaluuee fɔkɔŋŋu dilaataal pu. Mpaan ŋun nìn dɔ̄ fámee nì kudii kun bí ŋwìiń jeetilaŋki púee nì ku-guŋŋi púuŋŋu kɔkɔ nìn kpáfì kukaluuee fɔkɔŋŋu dilaataal pu. 14 Kunimbɔtidii jandi din bí ŋwìiń nyalaŋki púee nì mpaan ŋun dɔ̄ fámee waaŋŋu nìn nyáń kukaluuee fɔkɔŋŋu dilaataal pu. 15 Uninjee nìn tí ŋmāntì kudii kun bí kunimbɔtidii boonee. Kudiiyee nì isan in bí ku-jaŋŋi liitil puee fɔkɔŋŋu nìn sá kukaluuee fɔkɔŋŋu dilaataal pu.

Kunimbɔtidii poon

Kudii kun bi tà kí kɔ́ kunimbɔtidii poonee nì kudikpaaŋŋuee nì kudii kun bí poonee 16 nì kipunyɔkɔ nì tɔkɔlab bin bi dū tilaandi ki kpáá ki nákáǹee nì isan in bí ki māntìi tú aditɔntɔkɔee, bi nìn dū ndɔpampamu ní ki bīiǹ ki māntìi tú kí yòon̄ kitiŋ kí cáá sāā tɔkɔlab. Bi nìn dū ndɔpampamu ní ki bīiǹ tɔkɔlab bi-ba. 17 Kunimbɔtidii boon nì ku-poon, kí yòon̄ kipunyɔkɔ kí cáá sāā poon poon diikuee, bi nìn bɔ́ntì mpaan ŋubɔ 18 kí lēē keerubimbi nì ibafi. Bi nìn lēē bubabu bubɔ ki sákaǹ keerubimbi bili kansikin. Keerubim kamaa nìn cáá inimbiin ili ní: 19 unil nimbiin nìn túĺ bubabu kpakpalku kubɔ, ní gbikinti nimbiin túĺ bubabu kpakpalku kun kíǹee watil pú. Bi nìn pée kpítì míǹ ní ki nákáǹ nákáǹ ki māntìi tú kunimbɔtidii. 20 Bi nìn kpítì keerubimbi nì ibafi agun pu kí yòon̄ kitiŋ kí cáá sāā punuubi yilpu. 21 Idɔ in pu kudikpaaŋŋu punuu nìn sàkēe jannaatiliŋ nìn ŋmà ní.

<Circir páaa laŋki> nyɔkɔpuee, tiba nìn bí niin ki náań nì 22 ndɔ saraafaŋŋu. Ŋu-fɔkɔŋŋu nìn sá kukaluuee fɔkɔŋŋu mita pu ní ŋu-waaŋŋu sá mili pu.

23 Kunimbɔtidii nì circir laŋki nìn cáá mpunyɔmu muli ní. Bi dì kiba pu ní kí kɔ́ kudikpaaŋŋun ní kí dī kin kíǹee pu kí kɔ́ circir páaa laŋki. 24 Mpunyɔmu gbanti nìn cáá punuubi bili bili ní. 25 Bi nìn kpítì keerubimbi nì ibafi ki nákáǹ kudikpaaŋŋu punuubi pu, kii bi nín ŋá agun pu puee ní. 26 Kipunyɔkɔ pu guŋŋi puee, tɔkɔlab bin pu bi kpáá tilaandi ki nákáǹee nìn bí, ní bi kpítì ibafi ki nákáǹ nákáǹ.