Eeseekiyeel 42

Adiin ŋin bi nìn máń ki kɔ́ĺ kunimbɔtidiiyee

1 Uninjee nìn nyántì-mi kunimbɔtidii boon cindin ŋgan pú ní ki yāntì m kɔ́ adiin ŋin bí ki túĺ mpaan ŋun dɔ̄ famee nì kudii kun bí kunimbɔtidii boonee. 2 Adiin ŋin nìn bí niin gbantee kɔkɔ púuŋŋu nìn sá kukaluuee fɔkɔŋŋu dilaataal pu ní ŋi-waaŋŋu sá imuŋku ili nì saalaa pu. 3 Dijandi diba púee, adiinee túĺ mpaan ŋun dɔ̄ fám ki māntìi tú kunimbɔtidiiyee ki yōoǹ kukaluuee fɔkɔŋŋu mmuŋku pu. Dijandi din kíǹee púee, ŋi nìn bíitiǹ bi nín bɔ̀b̄ kunimbɔtidii puee boon pú ní. Bi nìn bɔ́ntì adiin gbanti ní ŋi tɔ́kɔ́ tɔb pu mita pu. 4 Adiinee nyɔkɔpu, poon cindi watil púee, nsan ŋubɔ nìn dɔ̄ ŋwaan sá kukaluuee fɔkɔŋŋu saalaa pu, ní mpúun sá dilaataal pu. Bi nìn dì ŋgan pú ní kí kɔ́ kudii gbantin. 5 Adiin ŋin nìn tɔ́kɔ́ yilpuee kaa nìn wāā ki bàn̄ ŋin bí taapuee, di sá yii isan nìn fōō mpaan yilpu diiŋŋi pu ki jítiǹ kansikin nì taapu yaŋ pu. 6 Adiin gbanti nìn tɔ́kɔ́ tɔb pu mita pu ní kaa nìn cáá jaantalkub kii kunimbɔtidii cindin diiŋŋi ŋin kíǹee nín cáá puee. An pu ní adiin ŋin nìn tɔ́kɔ́ yilpuee nìn sá ŋwaamu ki jítiǹ ŋin bí taapuee nì ŋin bí kansikinee. 7 Boon pú cindi jandi púee, digundi din nìn bí adiinee púuŋŋu puee nìn sá kukaluuee fɔkɔŋŋu imuŋku ili nì saalaa pu. 8 Di sá yii adiinee ŋi-ba púuŋŋu nìn sá kukaluuee fɔkɔŋŋu imuŋku ili nì saalaa pu ní. Ama adiin ŋin nìn bíitiǹ kunimbɔtidiiyee púuŋŋu nìn sá kukaluuee fɔkɔŋŋu dilaataal pu. 9 Adiinee taapu púee, kipunyɔkɔ kin bi dì kí kɔ́ kí nyānní boon pú cindinee nìn bí. 10 Kipunyɔkɔ gbanti nìn bí laakin dicindi gundi kífée ní.

Ŋgiil púee, adiin aba nìn bí ki túĺ dicindi nì kudii kun bí kunimbɔtidii boonee. 11 Adiin gbanti nyɔkɔpuee, nsan ŋubɔ nìn bí. Adiin gbanti púuŋŋu nì ŋi-waaŋŋu nì ŋin bí ŋgan púee yaŋ nìn ŋmà ní. Ŋi-punyɔmmu nì bi nín máń-ŋi puee nì bi-punuubi sá tiwambaantiil ní. 12 Adiin ŋin bí ŋgiil gbantee punuubi sá bibaantiibi nì ŋin bí ŋgan púee yab ní. Nsanee nín kífí puee, kipunyɔkɔ kiba nìn bí ki túĺ digundi din bi máń ki tú circir paaŋŋuee. Bi nìn dì ŋwìiń nyalaŋki pú ní kí kɔ́ niin. 13 Uninjee nìn bí-mi yii: «Adiin ŋin bí ŋgan pú nì ŋgiil pú ki túĺ dicindee, bi dū-ŋi ki sú Unimbɔti ní. Niin ní bisaraaŋaliibi bin nìn ŋūǹ kí kɔ́ circir páaa laŋkee nìn jīǹ saraabi bin bí circir páaayee jinti. Niin ní bi máaǹ kí dū tiwan tin bí circir páaayee nì saraabi nì ikpiti pɔ̄tam saraabi nì dibɔkpil saraabi kí bíĺ, di sá yii mpaan gbanti bí circir ní. 14 Bisaraaŋaliibi bin yaa kɔ́ circir kɔŋkooŋŋunee kaa ŋūǹ kí nyānní boon pú cindin dicilpu. Bi máaǹ kí dū bi-circir wampeeŋkaati tin bi pēeǹ ki túń ti-Dindaan tundee kí bíĺ adiin gbantin, ní kí dū abɔkuti aba kí pèen̄ ní kí nín nyā laakin samaa kpáfèe.»

Boon pú gundi ŋmàntitam

15 Uninjee nín ŋmāntì adiin ŋin bí kunimbɔtidiinee ki dóòyee ní u dū-mi ki dī ŋwìiń nyalaŋki punyɔkɔ pú ki nyántì. Niinee ní u kíĺ ki bíi ŋmàntī mpaan ŋun māntìi tú kunimbɔtidiiyee. 16 U nìn dū kukaluu kun u cáa ŋmàntēe ki ŋmāntì ní ki ká yii ŋwìiń nyalaŋki púee, mpúun sá kukaluuee fɔkɔŋŋu alaataa aŋmoo pu. 17 U nìn dū kukaluuee ki ŋmāntì ŋgan pú jandi ní ki ká alaataa aŋmoo pu. 18 U nìn dū kukaŋmantikaauee ki ŋmāntì ŋgiil pú jandi ní ki ká alaataa aŋmoo pu. 19 Ní u fātì u-ba ki túĺ ŋwìiń jeetilaŋki pú ki dū kukaluuee ki ŋmāntì ŋgan pú jandi ní ki ká alaataa aŋmoo pu. 20 Míǹ ní u nìn ŋmāntì digundi din māntìi tú kunimbɔtidiiyee jannaatiliŋ. Digundee jannaatiliŋ nìn ŋmà ní ki nìn pītì mpaan ŋun bí circiree nì ŋfantanti kansikin.