Eeseekiyeel 43

Unimbɔti fātìi gítìń kunimbɔtidiin

1 Uninjee nìn cáá-mi ki cūnnì ŋwìiń nyalaŋki pú. 2 Niinee ní m ká Isirayeel Nimbɔtiu nyooti nyánní ŋwìiń nyalaŋki pú ki dòoń. Tinyoolee nín nìn ŋáań kuwoou kuŋyee nìn náań nì tiŋku wookuee ní, ní ki nìn cáá tì-walifiŋu ki ŋmíntí kitiŋ. 3 Dileedakal nee náań nì din m bàà ká ŋyunti ŋun ní Unimbɔti dɔ́miń kí nàan̄ Jeerusaleem nì ŋyunti ŋun m bí Keebaar buŋgbandee ní. Niinee ní m tātìi gbāaǹ m-yigbeel tūū kitiŋ. 4 Ti-Dindaan nyootee nìn dīń ŋwìiń nyalaŋki punyɔkɔki ki kɔ́nní kunimbɔtidiin. 5 Unimbɔti Fam yōoǹ-mi ní ki cáá-mi ki kɔ́ǹ poon cindin. M nìn ká yii ti-Dindaan nyooti nìn gbí kunimbɔtidii poon. 6 Ní m gbìl̄ ubɔ sòon̄ní-mi doooo kunimbɔtidii poon. Ŋyunti gbantee uninja un céeǹ-mee nìn yú ki kɔ́ĺ-mi. 7 Ti-Dindaan nìn bí-mi yii: «Nisaaleen, mpaan nee di sá laakin m-beejal bée, laakin m cáá m-taaŋi ki sīintée. M làá nīn kóò niin, Isirayeel yab kansikin kí nīn cá jaanjaan. Isirayeel yab nì bi-bɔtiibi kaa ti làá kpèè m-circir yindi fám. Baa làá ti ŋá ajɔkɔntuun ní kaa nín kɔ́ǹ bi-bɔtiibi doo kí síb́. 8 Bibɔtiibi dū bi-bɔtinaakɔti punyɔmmu nì bi-naakɔti dɔi in pu bi sàkantí punuubee ki cóoǹ ki kɔ́ĺ m-Diiku punyɔmmu nì idɔ in pu m-Diiku punuubi sàkantée. Digundi dibaba di pée pītì man Diiku nì bi-diiŋŋi. Bi bíil̀ m-circir yindi, di sá yii bi ŋá ntimbiil tuuŋŋi. An pu ní m gíí bi-pu diŋuul ki nāaǹ-bi. 9 Kɔŋkɔnnee, Isirayeel yab làá gbèen̄ kí taa ti nín̄ bí tijɔkɔndin. Bi làá yòon̄ bi-bɔtiibi bin kpíìyee wunti kí wàatī-mi, ní ḿ nīn kíǹ ki kóò bi-kansikin kí nīn cá jaanjaan.

10 «Sii nisaaleen, tùkù Isirayeel yab kunimbɔtidii nee nín bí puee. Icoo ń cúú-bi bi-tuŋkpitiŋ pu, ní bí bīfì kí béé bi nín lēē kudii nee ku bí puee tiŋan. 11 Atuun ŋin bi ŋée yaa lafun kɔ́ǹ-bi icooyee, á dū kunimbɔtidii nee footau kí dàkà-bi nì adiin nín bí puee nì mpunyɔmu nì bi nín bɔ́ntì-ku pu ki dāa máń-kuee. Á ŋmà marab nì akoobil ŋin bi máaǹ kí nīn ŋúb́ bi yaa bí mpaan nee puee kí dūú bíĺ bi-nimbiin. A yaa ŋá mimmee, bi làá nīn ŋúb́-bi kí nīn tɔ́-bi. 12 Kunimbɔtidii nee bɔkpaal dipeekaal sɔ̀. Mpaan ŋun kɔkɔ māntìi tú-ku dijool yilpuee sá ki tīī Unimbɔti ní.»

Nsaraafan nì saraabi

13 Bi nìn ŋmāntì nsaraafan. Ndɔ ŋun bi nìn dūu ŋmāntèe nìn jítì santimeetab imuŋku ili nì saalaa pu fiii. Mbòó ŋubɔ nìn māntìi tú nsaraafan ní ŋu-nyooŋŋu nìn sá ndɔŋmantikaayee diba pu ní ŋu-waaŋŋu mun sá diba pu. Boon púee, mbòóyee nìn jɔ́m̀ kii ndɔŋmantikaayee dijandi. Nsaraafan ŋu-ba fɔkɔŋŋu, 14 taapu laakin síb́ kitiŋee kí cáá sāā laakin nyáńee, bi nìn máń dinyeel dipeekaal ki tɔ́kɔǹ. Laakin nìn síb́ gbantee nìn sá ndɔŋmantikaayee mili pu ní. Dinyeel gbanti jaŋŋi kamaayee, ndɔŋmantikaayee ŋubɔ di nìn pátì kí bà laakin síb́ee. Dinyeel dipeekaal gbanti yilpuee, bi nìn gíti máń dinyeel dililiitiil ki tɔ́kɔǹ. Díǹ fɔkɔŋŋu nìn sá ndɔŋmantikaayee minaa pu ní. Dinyeel gbanti jaŋŋi kamaayee, ndɔŋmantikaayee ŋubɔ di nìn pátì kí bà dipeekaalee. 15 Dinyeel dililiitiil gbanti yilpuee ní bi máń ŋfan yam. Ŋfanee fɔkɔŋŋu nìn sá ndɔŋmantikaayee minaa pu ní ki nìn cáá iyin inaa. 16 Ŋfanee jannaatiliŋ nìn ŋmà ní, ní dijandi diba nìn sá ndɔŋmantikaayee saalaa nì mili pu. 17 Dinyeeliliitiilee mun jannaatiliŋ nìn ŋmà ní, ní dijandi diba fɔkɔŋŋu nìn sá ndɔŋmantikaayee ŋubɔ kpá saalku pu. Digbándi boon púee fɔkɔŋŋu nìn sá ndɔŋmantikaayee dijandi. Nnyinsan ŋubɔ nìn māntìi tú nsaraafanee ní ŋu-waaŋŋu nìn sá ndɔŋmantikaayee diba pu. Akɔl nìn bí ŋwìiń nyalaŋki pú ní bi dàb̀ kí bà yilpu.

18 Uninjee nìn bí-mi yii: «Nisaaleen, ti-Dindaan Unimbɔti nín sòon̄ puee sɔ̀. Bi yaa láa máń nsaraafan kí nīn ŋáań bisaraawɔkaabi, kí nīn yàantí saraabi waŋkuti fatikuuee, akoobil ŋin bi làá dāá ŋée sɔ̀. 19 Á dū unaja kí tīī Leefii yab bisaraaŋaliibi bin sá Sadooki maaliŋunee bí sútí kí pìl̄-mi kí tɔ̄ ditundi kí tīī-mi. Man ni-Dindaan Unimbɔti di sòon̄ míǹ. Bí dāá dū unajee kí ŋá ikpiti pɔ̄tam saraau. 20 Á dāá yòon̄ u-fatikuu kí dūú ŋmìtī nsaraafan yiŋyi naatil nì ŋu-nyeel gbiŋŋi anaatil nì ŋu-nyɔɔgbandi kí màntīí tū. A yaa ŋá mimmee, a ŋá nsaraafanee circir ki dū-ŋu ki sú-mi dee. 21 Míǹ boonee, á yòon̄ unaja un bi dūu ŋá saraayee kí cáá wà ŋŋmi mpaan ŋun bi bɔ́ntì kí nīn ŋáań mimmee, circir kɔŋkooŋŋu kpaanceetiŋu. 22 Kutaa yaa wúntèe, á yòon̄ uŋɔja un laaba kaa wɔ̀b̄ee kí dūú ŋá ikpiti pɔ̄tam saraau kí ŋá nsaraafan circir, kii a nín bàà dū unaja ki ŋá puee. 23 A yaa dóò saraa gbantee ní á yòon̄ unaja nì upìja in laaba kaa wɔ̀b̄ee 24 kí cáań man a-Dindaan nimbiin. Bisaraaŋaliibi làá dū ŋyaam kí yàaǹ i-pu^a ní kí dū-bi kí ŋá saraawɔkaa kí tīī-mi. 25 Iwiin iluli in làá páannée, á dū uŋɔja kí ŋá ikpiti pɔ̄tam saraau ŋwiin kamaa, ní kí dū unaja nì upìja in laaba kaa wɔ̀b̄ee kí ŋá míǹ mbaantiim. 26 Iwiin iluli ní ni làá ŋá nsaraafan circir kí dū-ŋu kí sú-mi ní bí nín kíĺ ŋu-pu ditundi. 27 Iwiin iluli gbanti yaa kúntèe, ŋwinniniiti dal nì iwiin in làá páannée, bisaraaŋaliibi ń ŋá ni-saraawɔkaabi nì mpèé saraabi bin ni cáańee nsaraafan pu. Niinee, m làá dàkà-ni kulaŋŋaŋfitiiu. Man ni-Dindaan Unimbɔti di sòon̄ míǹ.»