Jooweel 1

Kugbɔŋu kun sòoǹ

Jooweel

puee

1 Ti-Dindaan di sòon̄ nì Peetuweel jipɔɔn Jooweel tibɔti nee.

Inaakitoon nì ŋweel bɔti

2 Nimbi bikpilibee, ní pīlifìmaan!

Ní ŋátímaan ni-tafaliŋ kí pīlifì, Juuda yab kɔkɔ!

Tin bí nee juti jítì ni-yuntii nee poon ni káaa,

àá tì jítì ni-naanjab yuntii ni gbìl̄ ní?

3 Ní dūú māafìmaan ni-biyaamu.

Ni-biyaamu mun ń dāá dūú māafì bi-biyaamu,

ní bi-biyaamu ń dāá dūú māafì bi-boon yab.

4 Tijin tin anaakitɔmbil ŋmɔ́ ki kíǹee,

inaakitoon dūu ŋmɔ́,

tin ní inaakitoon ŋmɔ́ ki kíǹee,

inaakicaan dūu ŋmɔ́,

ní tin ní inaakicaan ŋmɔ́ ki kíǹee,

inaaki dūu ŋmɔ́.

5 Bidanyɔgbiliibi, fìntīmaan kí nīn sūǹ.

Nín̄ yáliŋkímaan, nimbi bidanyɔliibi kɔkɔ.

Di sá yii naa ti làá ká ndapɔm kí nyɔ̀.

6 Ditimbundi diba nib bíi jáà nì m-tiŋki.

Bi pɔ̄ɔ̄ ní ki wīikí baa ŋūǹ kí kàaǹ-bi.

Bi-nyiŋŋi bí kii gbikinti nyiŋŋee ní,

ní bi-nyɔɔkpaweeŋyi bí kii ugbikintisal yaŋee.

7 Bi yāntì m-fiinyi kpaabu kpántì kii kuteeuee,

bi bíil̀ m-fiigi sufii kɔkɔ múb.

Bi ŋmɔ́ ki lēē i-pɔkɔti kɔkɔ,

ki yāntì i-pammu kíǹ ki pīiǹ kpáu.

8 Nín̄ yáliŋkímaan kii usapɔɔn un

dáá pée mɔ́ǹ ní u-cal kpíì u kā dikpoolee.

9 Baa ti cáǹ tijimpin saraau

nì ndaam saraau ti-Dindaan diikun.

Bisaraaŋaliibi bin sá

ti-Dindaan tɔntɔnliibee kā dikpool.

10 Bi bíil̀ tisati,

kitiŋ kɔ́ kunimbaaun.

Tijin gíti kpáaa,

ndapɔm gíti kpáaa,

ŋkpam mun gúń.

11 Bikpaabi wunti yɔ̄tì.

Bin kù fiinyee yáliŋkí

ɔɔji nì bilee pu,

di sá yii tikpaajin kpá bí cā.

12 Fiinyi kūń,

ní fiigi sufii fáaḿ.

Greenaadi sufii nì ibafi nì pɔɔmi sufii,

an dàkà yii kusaaun sufii kɔkɔ kūń.

Dipɔɔpindi wáŋkì binib kansikin.

Binib ń bóob́ kinyɔkɔ kí gbàam̀ ti-Dindaan

13 Bisaraaŋaliibi, dūmaan kpɔsatab kí pèen̄

kí nīn sūm̀maan.

Nimbi bin tūǹ nsaraafan pu tundee,

nín̄ yáliŋkímaan!

Nimbi bin sá m-Nimbɔtiu tɔntɔnliibee,

dūmaan kutuku kí pèen̄ kutaa ń wúntí.

Di sá yii baa ti cāabìń tijimpin

nì ndamam saraau ni-Nimbɔtiu diikun.

14 Bɔ́ntímaan ni-ba kí bóob́ kinyɔkɔ,

yíiḿmaan binib bí kóoǹ kí kpāfì.

Ní kóom̀maan bitindaŋkpilib

nì bin kɔkɔ kóò Juuda tiŋkinee

kí kpāfì ti-Dindaan ni-Nimbɔtiu diikun,

ní kí kúuǹ kí yíiń ti-Dindaan.

Ti-Dindaan wiiŋŋu dal

15 Óooo! Ba wiiŋŋu ŋúǹ bulifi dee!

Ti-Dindaan wiiŋŋuee tóobiń.

Ŋu dòoń kí nàan̄ tikɔkɔ,

ŋu làá nyānní Mpɔŋkɔdaan cee ní kí dāan̄^a.

16 An kaa sá ti-nimbilaaliyin ní tijin wáŋkì,

ní mmɔn nì dipɔɔpindi

yíkì ti-Nimbɔtiu diikunaaa?

17 Iwambool in bi búĺee dōoǹ kitiŋin ki sūū.

Cakalaabi poon kūń,

adiin ŋin poon bi kpáafí tijinee lítì,

di sá yii bilee kaa ti bí.

18 Pīlifìmaan tiwaŋkuti nín bí ki yáliŋkí puee!

Inaa kaa ti nyí laakin pú i làá túĺee,

di sá yii timool kaa ti bí í ŋmɔ́.

Ipii gba bíi jīǹ falaa.

Unimbɔti bɔnaatiliu bíi mèé

19 M-Dindaan, sii ní m kūuntí ki yíì!

Di sá yii ŋŋmi wùn̄ kuteeu pu mooti,

aŋmilimbil wùn̄ kusaau sufii kɔkɔ.

20 Ipeel gba fèefī ki nyàab̀-si,

di sá yii ibun fóotì.

Ŋŋmi wùn̄ kuteeu pu mooti.