Amoosi i

Kugbɔŋu kun sòoǹ

Amoosi

gbɔŋku

Tibɔkilkaal

Abin 760 kí wàatī bí màal̀ Yeesu Kriisitooyee ní Amoosi yíkìń u-tiŋki Teekoowa, Juuda beelin tiŋki kiban ki dɔ́miń Beeteel tiŋki kin sá Isirayeel beelin yab nimbɔtijaamii pɔ̀ti puee (Kpèè 1.1 nì tin bi ŋmàn̄ kugbɔŋu faaku taapuee). U bàn̄ kpalaayee ní an cúu bíil̀ Isirayeel beelin.

Di sá yii ŋyunti ŋun Amoosi bàn̄ Beeteel tiŋkinee, Jeerooboowaam uliliiti un nìn sá Isirayeel beelin ubɔtee nì u-yab nìn dá láá ká diŋuŋfil bi-nannanliibi Asuur yab cee, ní an nìn fātìi bútì-bi mpɔm. Ŋyunti gbanti ní Amoosi báakì yii Unimbɔti làá kúntí dinibul din úǹ u-ba lēēyee. Ŋyunti gbanti muee, binib nìn nóó Unimbɔti tiŋan. Kin ba yì-tì ní Unimbɔti lī míǹ?

Unil kamaa bàà máaǹ kí nīn cáá nsan kí nīn bí u-jutiibi kansikin. An pu ní Unimbɔti síiǹ marab. Ama bipɔndambi kaa dū marab gbanti ki yíiń tiba. An pu ní Unimbɔti dàkā yii úǹ u-ba di mɔ́tí biwɔfib pu kaa gbèentí.

Amoosi lī kun pu ní u kíí kí dū tibɔti tin pɔ̄ɔ̄ kpaŋkpam nee kí sòoǹee (kpèè aleedaka ŋin kā ayil aluli kí cáá sāā awa poonee). An pu gba ní bi jìn̄-u ki nyántì Isirayeel beelin malaa (7.10-17).

- Diyil 1 nì ayil 2 poonee, ti kāntí Unimbɔti nín wòon̄ Isirayeel beel nì abee ŋin bí ki pìlīǹ-dèe puee.

- Ayil 3–6 sòoǹ kujaau kun bí deedee Nimbɔtiu nì u-nibul kansikinee bɔti.

- Ayil 7–9 dàkà laakin ní tibɔti tin kɔkɔ Amoosi sòon̄ee nyánnée. Tì nyánní aleedaka aŋmoo ŋin dàkà Unimbɔti bɔsooŋyi in dòońee daantin.

Amoosi gbɔŋku yàntī tí dàkafì kí béé Unimbɔti bɔti nín cāabìń dikpántil din ti-duulinyau poonee ní. An puee, kii bi nín jìn̄ Unimbɔti bɔnaatiliu Amoosi puee yàntī tí dàkafì kí béé kun nìn dɔ̄ ki cí Yeesuee. Di sá yii tibɔti tin Yeesu dāa cáańee mun nìn cāabìń dikpántil ní. Yeesu bɔti kaa nìn sá tipɔɔbɔti, ama tí mun nìn pɔ̄ɔ̄ ki jítiǹ Amoosi yati!