Anyɔɔbun ŋin ŋmàn̄ ki kā kugbɔŋu nee poonee kaa náaǹ. Ku sòoǹ Unimbɔti bɔnaatiliu ubɔ nín nāatì Unimbɔti bɔti tiŋyee ní. Ti pée nyí Unimbɔti bɔnaatiliu gbanti yindi baba ní. U sòon̄ ki bīitì Eedoom nibul, (an dàkà yii Eesayuu naantiibi) bimbim min bi cáá Isirayeel nibul, (an dàkà yii Jaakɔb un sá Eesayuu naalee naantiibi) puee. Eedoom yab bin nìn kóò Ŋyaam mɔɔl ŋwìiń nyalaŋki pú ki cá ŋgiil púee nì Isirayeel yab kaa nìn pée kpí. Ama ŋyunti ŋun Juuda beel lítì ní bi jáń ki fōō Jeerusaleemee, bi nìn gíti dàkā mbimbim gbanti an lákatì. Kaa sá yii bi nín kaa dɔ́miń ki tútúǹ Isirayeel yab bi-kɔŋkɔnnaatɔbee ŋmaniŋma, ama bi dī bi-wɔfii pu ki fōō bi-tiŋki dijandi ní ki kútì bin bin fúkúl̀ Jeerusaleem wantee pu.

Bi máaǹ ki ŋmàn̄ Oobadiya gbɔŋku nee Babiloon yab nín jáń ki fōō Jeerusaleem tiŋkee boon ní. Kugbɔŋu nee sòoǹ ki tùkù Eedoom yab yii ŋyunti ŋun bi làá dāá nàan̄ Isirayeel nannanliibee, bi làá dāá nàan̄ kí kpáaǹ bi mun. Ku kpáàa cáá kunyannyaau nyɔɔbuŋŋi ki tìì Isirayeel yab mun. Unimbɔti di yì dinyɔɔbunjoolkaal ní ki làá dāá sòoǹ anibul kɔkɔ bɔti.