4
1 Nimbi Samaarii yab nimpoobi,nimbi bin jíń ki gbīfiǹ kii
Baasan tiŋkin nasaliiyee,
ní pīlifìmaan tibɔti nee.
Ni mùul̄ biwɔfib,
ki sàantí binandambi
ní ki lì ni-calib yii:
«Ní cáań ndaam tí nyɔ̀!»
2 Ti-Dindaan Unimbɔti un bí circiree,
pūtì ki lī yii:
«Ŋwiin bí ki dòoń,
bi làá dāá dū ipiin kí lɔ̀kɔ̄-ni,
kí dáaĺ-ni kí kpáàá búntí
kii njɔmpiin nín cútí ujɔm puee ní.
3 Kitiŋ guŋŋi laakin bátì bátìi lítèe
ní bi làá dī kí cáá-ni kí nyāntí,
báà ŋma ń nīn kpèé u-nimbiin.
Bi làá dāá cáá-ni kí tɔ̄ ŋgan pú.»
Ti-Dindaan di lī míǹ!
Inyimɔn nimbɔtinool
4 «Ní cùmaan Beeteel tiŋkin
kí já nì mi,
kí cù Giilgaal tiŋkin
kí mɔ̀tīí já nì mi tikpil.
Ni yaa bàn̄ kutaafaauee,
ní cáań kuwaŋkuluu kí ŋá-mi saraa,
ní ŋwintataatee ní cáań ni-saalaatiiti.
5 Ní wà kpɔnɔb bin bi ŋá ŋkpɔnɔnyɔkɔee
nsaraafan pu kí ŋá ijaam saraabia.
Ní bāakì kí tùkù báà ŋma
nlammɔntiim saraabi bin ni ŋá ki tīī-mee,
kun puee nimbi Isirayeel yab nín là puee dee!»
Ti-Dindaan Unimbɔti di lī míǹ.
Ti-Dindaan kpáafì Isirayeel yab ki gīī
6 «Ni-tiŋkpaammu kɔkɔnee,
m yāntì ŋkùm cúú-ni,
ki ŋmīntì-ni tijin ni-timbilimmun,
ama ní naa fātìi gítìń m-cee.»
Ti-Dindaan di lī míǹ.
7 «Maa yāntì utaa jōō ni-satin
ki tin sāā iŋmal ita kudiceeu ń bàń.
M yāntì utaa nìn̄ kitiŋ kiban
kaa yāntì u nìn̄ kin kíǹee poon,
ki yāntì utaa nìn̄ bukpaa bubɔn,
ní bun ni u nìn̄ee kpaajinti kūń.»
8 «Ntimu tikpil nib
yíkì ki cūtì kitiŋ kiban ki kpìntī
ki nyàab̀ nnyim kí nyɔ̀,
ama kaa ká ki nyùn̄ ki bál̀,
nì míǹ kɔkɔee, naa fātìi gítìń m-cee.»
Ti-Dindaan di lī míǹ.
9 «M dū iween ki tɔ́ ni-kpaajinti,
di sá tì dáá yú tisatin kaa láá bīń
ní ki bíi kōō àá ki bíi sù.
M yāntì inaakitoon ŋmɔ́ ki bíil̀
ni-kuŋfaati nì fiinyi sufii kpaaŋŋi,
nì ni-fiigi sufii nì ni-ɔliifi sufii,
ama ní naa fātìi gítìń m-cee.»
Ti-Dindaan di lī míǹ.
10 «M dū bìlbil kúm ki tɔ́ ni-waŋkuti pu
kii m nín nìn ŋá pu Eejipiti tiŋkineeb.
M yāntì binannanliibi kūū ni-nipɔmbi,
ki cútì ni-taamui ki cáa búntì.
M yāntì ni-nikpiliŋ sūū ki núukì
ki kɔ́-ni fíŋfiŋ ni-naapaal pu,
ama ní naa fātìi gítìń m-cee.»
Ti-Dindaan di lī míǹ.
11 «M nāaǹ ni-kansikin biba,
a lì kii m nín nìn nāaǹ
Soodoom nì Goomoora timmu pueec.
Ni-kansikin bin ŋmátèe sá kii
kisanteei kin bi tātèe ní,
ama ní naa fātìi gítìń m-cee.»
Ti-Dindaan di lī míǹ.
12 «An puee Isirayeel,
kpèè m nín làá ŋá-si puee sɔ̀.
Kii tin m làá ŋá-see puee,
á bɔ́ntí a-ba kí cīití man a-Nimbɔtiu.»
13 Di sá yii úǹ di náań ajoon,
ki náań kubuŋu,
ki lèekī tin u làá ŋée ki dàkà unil.
U dù ŋwiimpu kí kpántí kunyeeu
ní ki tɔ́kɔ́ kitiŋ kɔkɔ yilpu ki còom̄.
Úǹ ní bi yíì yii: <Ti-Dindaan,
Unimbɔti Mpɔŋkɔdaan>.