Yoona 2

Yoona wimmeem

1 Bi dū Yoona ki tɔ́ tiŋkunee ní ti-Dindaan lēē ujɔŋkpaan ubɔ ki tú u dū Yoona ki náĺ, ní u kāl̀ ujɔmee poon iwiin ita, ŋwiimpu nì kunyeeu^a. 2 Yoona kā ujɔm poonee ní ki mēē ti-Dindaan u-Nimbɔtiu ŋwimmeem yii:

3 «M nìn bí dinimbinaamandin,

ki tíminsì ki yíiń sii ti-Dindaan

ní a kíí-mi.

M nìn sīntì taapu taŋkpiilin

ki kúuǹ ki yíiń-si á dāá jòoń-mi

ní a gbìl̄ m-timinsii.

4 A dū-mi ki tɔ́ tiŋku poon

m nín sìntī nnyimbuun taapu taapu

ní nnyim māntìi tú-mi an kɔkɔ pu,

ní a yāntì tinyiŋgban kɔkɔ nì nnyinjil

dòoń ki jītí m-pu.

5 Ní m lī m-neen yii:

<Man nì sii yākatì tɔbin ní nee,

m pée gíti kpá kí ká-si!

Nì míǹ kɔkɔee m gbíntìi bíi kpèé

a-circir kɔŋkooŋŋu watil pú>.

6 Nnyim jɔ́m̀ ki tin sāā m-neen,

m mɔ̄tìi nín sìntī tiŋku taapu taapu,

ní timool tin bí nnyiminee dūu lùl̄ m-yil.

7 M sīntì doooo taapu taapu

ki tin nyáń ajoon nyeel pu,

ditaŋkpiil dū di-punyɔmmu ki pīiǹ m-pu

kí nīn pée cá jaanjaan.

Ama ní sii ti-Dindaan m-Nimbɔtiu

fātìi nyántìń-mi

m dáá gbíntìi bí dimaŋfalin.

8 Ŋyunti ŋun m ká yii an dóò m-puee,

m-landɔkɔŋu fātìi gítì sii ti-Dindaan pu,

ní m yāntì m-wimmeem nín jɔ́ḿ a-watil pú

ki tin bàn̄-si a-circir kɔŋkooŋŋu poon.

9 Bin dū awaa ŋin kaa bí tibanee ki yíĺ bi-yilee,

bíǹ kaa ti cáá diyimɔɔl kí ká difiil dee!

10 An yaa kíǹ kii mamee,

man làá gāā ilan kí nyɔ̄ŋkì-si,

ki làá ŋá saraa kí tīī-si,

ki làá ŋá tin ní m pōoǹ yii

m làá ŋá kí tīī-see.

Sii ti-Dindaan cee ní difiil nyēeń!»

11 Míǹ boonee ní ti-Dindaan pú ujɔmee kinyɔkɔ u fātìi wūliŋkì Yoona ki bíl̀ tiŋku gbandi.