1 An bɔtee kaa mɔ́ɔkiǹ Yoona báà fiii ní u fōō mbum. 2 Ní Yoona mēē ti-Dindaan ki bí yii: «Áù, ti-Dindaan! Tibɔti tin m nìn lī ŋyunti ŋun m nìn bí m-tiŋkinee kaa sɔ̀ɔɔ? Kun pu m nìn yíkì ki bàà nìn sáń ki cá Taarsiisi tiŋkinee deeyaa! M pée nyí yii a sá Unimbɔti un poon mɔ̄, ki cáá disaasɔl nì kimɔtii tikpil ki ŋáań tiŋan ní unil yaa yīntiǹ-si ki bàà máaǹ á dáaĺ u-tafalee, á kpántí a-landɔkɔŋu malaa kí dūú pɔ̄ udaanee. 3 An puee, ti-Dindaan, m mèé-si yii kɔŋkɔnnee á fàtīí fōō m-maŋfal. M yaa pūtì kpíì an sɔ́ nì ḿ nīn bí dimaŋfalin!» 4 Ní ti-Dindaan bālifì-u yii: «A cáá nsan kí gíí diŋuulaaa?» 5 Ní Yoona yíkì ki nyáń Niiniifi tiŋkin ki cūtì ki kāl̀ ŋwìiń nyalaŋki pú. U gāā kibiŋ kiba niin ní ki kāl̀ ki-booŋŋu taapu ki cí kí kpèè tin làá jītí Niiniifi tiŋki poonee. 6 Ní ti-Dindaan Unimbɔti yāntì digbumbitiki subiki nyáń ki wíiǹ, ki-booŋŋu bīiǹ Yoona yil ŋwìiń, kí sɔ̀ŋkì u-pɔbil. Kisubiki gbanti bɔti mɔ́ɔkiǹ Yoona tikpil. 7 Ama kutaa wúntì an dáá bɔ̀ǹ gúuuyee, ní Unimbɔti lēē dikoosibil diba ki tú di ŋmɔ́ digbumbitiki subikee ní kì kūń. 8 Ŋyunti ŋun ŋwìiń jɔ́m̀ee ní Unimbɔti túnní kubuŋu, kù tùm̀ kpaŋkpam, ki nyánní ŋwìiń nyalaŋki pú ki jítì. Ŋwìiń wùn̄ Yoona yil ŋkpitim pu áli u bàà làá fìkī. Ní u mēē yii ŋkúm ń dāá dū-u ki lī yii: «M yaa pūtì kpíì an sɔ́ nì ḿ nīn bí dimaŋfalin.» 9 Niinee ní Unimbɔti bālifì Yoona yii: «A cáá nsan kí gíí diŋuul digbumbitiki subiki nee puɔɔɔ?» Ní u kíí yii: «Iiin, m cáá nsan kí gíí diŋuul tikpil áli kí tin nyàab̀ ŋkúm.» 10 Niinee ní ti-Dindaan bí yii: «Kpèè, sii bí ki sūǹ digbumbitiki subiki nee pu dee. Ama sii di kaa cóoǹ-kì, ní kaa tí kpēē-kì ní ki wíiǹ. Kunyeeu kubɔ ní kì nyáń ki wíiǹ, kunyeeu fātìi mɔ́ee ní kì kpíì. 11 Ní a bí yii man ń taa sɔ̄ Niiniifi, kitiŋkpaaŋŋi nee nib saayaa! Binib bin kóò kitiŋ gbantin kaa nyí tin ŋān̄ ki tīī-bee jítì binib kutukub dilaataal nì mmuŋku pu, ní kí nín kūtì tiwaŋkuti tikpil tikpil tin kpátìi gbí ki-poonee mun.»