Abakuuki i

Kugbɔŋu kun sòoǹ

Abakuuki

puee

Tibɔkilkaal

Abakuuki gbɔŋku dàkà-ti Unimbɔti bɔnaatiliu un bí digìńdinee nín bí puee ní. An sá unil un di jīǹ falaa bin kíǹee gìŋ́ŋi pu, ki wòoǹ binib bi-kpitii pu, ki yíì Unimbɔti ní u yaa kíí-uee u fàal̀ee ní. Bi ŋmàn̄ kugbɔŋu nee ŋyunti ŋun ní Babiloon yab nìn bí ki kpòotī ntimu mun bí Isirayeel tiŋki ŋgan púee ní. Ŋyunti gbantee, Isirayeel yab nìn bí ki bàlifī nì kunimbaau bi-foolbooŋwu pu, nì bi nì Unimbɔti kansikin bítam pu.

Unimbɔti nìn kíí u-bɔnaatiliu ní ki tīī-u dinyɔɔbundi ú dūú nàatī u-yuntiŋu yab nì iyunti kɔkɔ nib. Unil ń nīn yú deedee nì Unimbɔtee di yàntī ú nīn bí dimaŋfalin (2.4), ní kí nīn cí nì dimákal poon yii Unimbɔti làá tɔ̄ u-tundi (ayil 3).

Binib yaa bí iyunti in pɔ̄ɔ̄yee poonee, Abakuuki gbɔŋku ní bi kàaǹ ní kí ká dimákal. Pɔɔl nín nìn bíi sòoǹ nì Kriisitoo nikitiŋ apeepeekaa Unimbɔti bɔtee, u nìn bí yii unil ń nīn yú deedee nì Unimbɔtee dàkà yii ú nīn cáá Yeesu Kriisitoo Nimbɔtiu pu fookii (Room 1.17, Gala 3.11, kpèè Eebru 10.38 mun).