Ti-Dindaan làá kpántí kitiŋ kɔkɔ bɔtiu
14
1 Ti-Dindaan wiiŋŋua tóobiń.Jeerusaleem yab, ni-nimbilaaliyin
ní bi làá dāá yàkatī ni-gaajawanti.
2 Di sá yii ti-Dindaan làá dāá kóoǹ atimbun
kɔkɔ nib kí kpāfì bí já nì Jeerusaleem tiŋki.
Bi làá dāá já kí fōō kitiŋ, kí dāá fūkul̀ adiin,
ní kí cúú binimpoobi kí dòon̄ nì bi mpɔn.
Bí làá dāá cúú ki-nib dijandi kí cùnnì kuyuŋu,
ama dijandi din kíǹee làá gbíntí kí
nīn bí kitiŋin.
3 Niinee ti-Dindaan làá nyā
kí já nì atimbun gbanti.
U làá dāá já kii
u nín pée kpààa jáà pu njanjawiinee.
4 Ŋwiin gbantee, u làá dāá dāan̄
kí yūĺ Ɔliifi sufii jool pu,
Jeerusaleem caŋin ŋwìiń nyalaŋki pú.
Ɔliifi sufii jool làá dāá búkutí kansikin nì kansikin
ní ditantakakpaandi diba ń dòon̄
ŋwìiń nyalaŋki pú nì ŋwìiń jeetilaŋki pú.
Dijoolee dibukul diba làá búntí ŋgan pú,
ní din kíǹee ń búntí ŋgiil pú.
5 Ni làá dāá sāǹ kí dī
ditantakal din dɔ̄ ajoon kansikin nee,
di sá yii dì dāa dɔ̄ kí tin sāā Asaal tiŋki.
Ni làá dāá sāǹ kii Juuda bɔtiu Oosiyasi yuntiŋu,
kitiŋ nín nìn cīŋkì ni-naanjab nìn sáǹ puee ní.
Niinee ti-Dindaan m-Nimbɔtiu ń bàń,
u nì u-circir tuuŋyi kɔkɔ.
6 Ŋwiin gbantee unil kaa dāa gíti nyàab̀ ŋwalifi.
Tiwool dāa kpáaa, nsɔnsɔm mun dāa kpá.
7 Ŋwiin gbanti làá dāá nyā ŋu-ba,
ti-Dindaan baba di nyí ŋwiin gbanti.
An kaa dāa gíti cáá yii
ŋwiimpu sɔ̀ɔɔ, kunyeeu sɔ̀.
Báà kujoopɔŋ gba, an dāa wāĺ ní.
8 Ŋwiin gbantee nnyim min tìì dimaŋfalee
làá nyānní Jeerusaleem tiŋkin.
Nnyimee dijandi làá nīn pùub̀
ki cá Ŋyaam mɔɔlin,
ní dijandi din kíǹee ń nīn pùub̀
ki cá Meediiteeranee tiŋkuun.
Án làá nīn bí míǹ ní dipeel pu nì kuseeun kɔkɔ.
9 Ti-Dindaan di dāa sá kitiŋ kɔkɔ bɔtiu.
Ŋwiin gbantee ti-Dindaan baba
di làá nīn sá Unimbɔti,
ní u-yindi baba ní binib làá nīn nyí.
10 Kitiŋ nee kɔkɔ làá dāá kpántí kitimpiliŋ,
kí yòon̄ Geeba ŋgan pú
kí tin cáá sāā Riimɔn tiŋki ŋgiil pú.
Jeerusaleem tiŋki làá dāá nīn tɔ́kɔ́ yilpu,
kí wàan̄ kí kíĺ Beenjameen punyɔkɔki
kí tin sāā diguŋkpindi punyɔkɔki,
laakin kipunyɔɔkpikii nìn bée.
Kì làá nìkī kí kíĺ Ananeeyeel difɔkɔku
kí tin cáá sāā ubɔti kpaabun
laakin bi ŋmāam̀ ndamamee.
11 Binib làá dāá nīn kóò Jeerusaleem tiŋkin,
baa làá ti nàan̄-kì,
ní binib làá dāá nīn kóò ki-ni nì ŋgbansɔŋfi.
12 Ditafadaaldi din ti-Dindaan
làá dūú dáaĺ anibul ŋin kɔkɔ
jáń nì Jeerusaleemee sɔ̀.
Bi dáá kā ki wāĺ
ní bi-wunnanti ń sūū,
ní bi-nimbiliŋ ń sūū bi-nimbisɔntin,
ní bi-limbiliŋ ń sūū bi-nyɔmmun.
13 Ŋwiin gbantee, ti-Dindaan làá dāá dū
dinyoondi kí tɔ̄ bi-pu.
Bi làá dāá fàtīí nyā tɔb pu
ní kí kíĺ ki bíi jáà.
14 Juuda yab làá dāá já kí mɔ̄tì Jeerusaleem pu.
Bi làá dāá kóoǹ atimbun
ŋin māntìi tú-bee gaajawanti kɔkɔ.
Bi làá dāá kóoǹ sindaariya nì animbil
nì tiwampeeŋkaal tikpil kí kpúkuń.
15 Ditafadaaldi gbanti dibaantiil
di làá dāá jēetí itaamu nì imamboon
nì igutaamu nì mmamu nì
tiwaŋkuti tin kɔkɔ bí binannanliibi
janjanaapaal puee pu.
16 Niinee atimbun ŋin nìn jáń nì
Jeerusaleem tiŋki, ki bí kaa kpíìyee,
làá nīn jɔ́ḿ dibintil kamaa
kí gbàan̄ ubɔti, ti-Dindaan Mpɔŋkɔdaan nimbiin
kí jī tantib jiŋaaliu.
17 Ama kitiŋ pu nibul diba
yaa kaa dāa cūtì Jeerusaleem
kí gbàan̄ ubɔti ti-Dindaan Mpɔŋkɔdaan nimbiinee,
utaa kaa làá dāá nì di-tiŋki pu.
18 Eejipiti yab yaa yíì
kaa jɔ́m̀ Jeerusaleem kí jī tantib jiŋaaliuee,
nnaabu ŋubɔ làá jēetí bi-pu
kii atimbun ŋin yíì kaa cūtìi jíń jiŋaal gbantee.
19 Eejipiti yab nì atimbun ŋin kɔkɔ yíì
kaa cūtìi jíń tantib jiŋaaliuee
tafadaaldi nín dāa sá puee dee.
20 Ŋwiin gbantee bi dāa ŋmà
itaamu waŋkilimmu pu yii:
<Bi dūu sú ti-Dindaan>.
Míǹ ní akumboo ŋin yú ti-Dindaan diikunee
dāa sá circir wanti kii
asambil ŋin yú nsaraafan nimbiin
bi ŋáań fatiku poon ki cáa yàantí nsaraafan puee.
21 Bi làá dāá dū akumboo ŋin kɔkɔ bí Jeerusaleem
nì Juuda timmunee kí sú ti-Dindaan Mpɔŋkɔdaan.
Bin kɔkɔ dāa dòoń ki ŋáań saraabee
dāa cáa tɔ̄kɔntí saraabi nanti.
Ŋwiin gbanti yaa láa bāańee,
baa dāa gíti kāntí ubantil ubɔ
ti-Dindaan Mpɔŋkɔdaan diikun.