2 Ti-Dindaan bí u-nibul yii: «M néeń-ni.» Ní bi bí-u yii: «Ba di dàkà yii a néeń-ti?» Ní ti-Dindaan kíí-bi yii: «Eesayuu naal di kaa sá Jaakɔbaaa^a? Nì míǹ kɔkɔee, m néeń Jaakɔb 3 ama ní kaa là Eesayuu^b. M yāntì ajoon ŋin pu u kóòyee kpántì kuteeu, ní ki dū u-tiŋki ki tīī jiiŋkpaaibi bin bí kuteeunee. 4 Eedoom yab naantiibi yaa bí yii: <Bi nāaǹ ti-timmu, ama ti làá fātìi mā-mu.> Man ni-Dindaan Mpɔŋkɔdaan nín lī puee sèé: <Bi ŋūǹ kí fàtīí mā-mu, ama man làá kpìtī-mu. Bi làá dāá páań-bi diyindi yii: <Ikpiti tiŋki> nì <Dinibul din pu ti-Dindaan gífí diŋuul an kaa kúntée.> 5 Nimbi Isirayeel yab, ni làá dāá nīn kíǹ ki lì yii: <Ti-Dindaan sá ukpaan ní u-kpaanti lákatì Isirayeel tiŋki pu.>»

6 Man ni-Dindaan Mpɔŋkɔdaan nín sòon̄ nì bisaraaŋaliibi puee sèé: «Ujipɔnti tìì u-baa tinyool, ní utɔntɔnli tɔ́ u-kpiliu. M yaa sá ni-baa, ni tìì-mi tinyoolaaa? M yaa sá ni-kpiliu, ni tɔ́-maaa? Ni kpèé ki sìŋkīǹ m-yindi ní ki bàlifī-mi yii: <Mana ní ti kpèé ki sìŋkīǹ a-yindi?> 7 Ni cāabìń tijin tin kaa bí circiree m-saraafaŋŋu pu ki ŋáań saraa^c, ní ki lì yii: <Nì mana ní ti kɔ̄ntí-si tijɔkɔndi?> An sá ni nín lì yii: <Ti-Dindaan saraafaŋŋu kaa bí tibanee^d! 8 Ni nín cāabìń kuwaŋkuluu kun jɔ̀b̄ee kí ŋá-mi saraayee, an ŋān̄aaa? Ni nín cāabìń kuwaŋkuluu kun taal wɔ̀b̄ àá kun būǹee kí ŋá-mi saraayee, an ŋān̄aaa? Ní cáá-kù kí pɔ̄ ni-gɔminau kí kpèè ni-bɔti yaa làá mɔ̄ɔkiǹ-u. U làá fōō-ni tiŋanaaa? Man ni-Dindaan Mpɔŋkɔdaan di bàlifī-ni míǹ. 9 Ni yaa ŋá míǹ ki dóòyee ní ni dòoń ki gbàam̄ man Unimbɔti yii ḿ sɔ̄ ni-saai! Ni dàkafī yii m làá fōō-ni tiŋanaaa?> Ti-Dindaan Mpɔŋkɔdaan di bàlifī-ni míǹ. 10 An sɔ́ ni-kansikin ubɔ ń bàà cù kí pìin̄ m-diiku punyɔmmu ní taa ti kɔ́ kí tūū ŋŋmi m-saraafaŋŋu pu fám. Di sá yii ni-bɔti tiba kaa ti mɔ̄ǹ-mi ní ni-saraabi kaa ti fáatiǹ-mi. Man ni-Dindaan Mpɔŋkɔdaan di lī míǹ. 11 Di sá yii kí yòon̄ ŋwìiń nyalaŋki kí cáá sāā ŋu-jeetilaŋkee, man yindi di sá diyiŋkpaandi atimbun kɔkɔ poon. Ijaan kɔkɔ poonee, bi tùutī talaalub ki ŋáań saraabi bin bí circiree ki tìì m-yindi. Di sá m-yindi sá diyiŋkpaandi atimbun kɔkɔ poon ní. Ti-Dindaan Mpɔŋkɔdaan di lī míǹ. 12 Ama nimbi di kpèé diyindi gbanti fám ŋyunti ŋun ní ni lì yii: <Ti-Dindaan saraafaŋŋu kɔ́ tijɔkɔndi, ní tijin tin bi pāantí ŋu-puee kaa náaǹ.> 13 Ni lì gba yii: <An ŋman sá faalaa tundi ní!> Ni kpèé ki sìŋkīǹ man ni-Dindaan Mpɔŋkɔdaan. Ni cāabìń tiwaŋkuti tin ni yùn̄ee nì tin laaba wɔ̀b̄ee nì tin būǹee ki ŋáań-mi saraa. Mana ní m ŋūǹ kí fōō an saraabee? 14 An sá mbusu ní ki tīī umùuldi un di cáá upìjamɔnti u-picaŋkpuŋkun, ama ní ki dū upii un kaa bí tibanee ki ŋá-mi saraa kí pà ipoon in u pōoǹee puee. Di sá yii m sá ubɔtikpaan ní, man yindi ní atimbun kɔkɔ fàŋkí. Man ni-Dindaan Mpɔŋkɔdaan di lī míǹ.»