Bi kpáafì bisaraaŋaliibi tibɔti
2
1 Kɔŋkɔnnee nimbi bisaraaŋaliibi ní m kpáafí tibɔti nee: 2 «Ni yaa kaa pílifì-tì, ki lēē ni-pɔbilin kí tīī m-yindi tinyoolee, m làá tɔ̄-ni mbusu, ní kí yàntī ni-biindi ń kpántí-ni mbusu. Tiŋman, m làá ŋá míǹ, di sá yii ni-kansikin ubɔ kaa bí ki yōoǹ tibɔti nee kii tì sá tiŋmanee. Man ni-Dindaan Mpɔŋkɔdaan di lī míǹ. 3 M làá tāā kí bīikì ni-naantiibi pu. M làá dū tibin kí yàaǹ ni-nimbiin, an dàkà yii ni-jiŋaalib yuntiŋu tiwaŋkuti tin ni kù ki ŋáań-mi saraayee binti. M làá dāá ŋàtī tibin gbanti kí kpáaǹ-ni kí fá. 4 Niin ní ni dāa béetí yii m nìn kpáafì-ni, án nín làá ŋá pu dipoondi din m pōoǹ Leefii yabee ń nīn bí ki cée. Ti-Dindaan Mpɔŋkɔdaan di lī míǹ. 5 M-poondi gbanti puee, m nìn tīī-bi dimaŋfal nì ŋgbansɔŋfi. M nìn tīī-bi míǹ bí nīn fàŋkí-mi, ní bi nìn fàŋkí-mi ki jìkì m-nimbiin tɔ́kɔ́ tɔkɔ. 6 Bi nìn dàkà mara un sá ibaamɔnee, baa nìn mɔ́ntí. Bi nìn nóó-mi deedee nì dipɔbil diba, ní ki yāntì binib tikpil fá ikpiti. 7 Tiŋman, usaraaŋal tundi di sá ú dàkà binib bí béé Unimbɔti. Úǹ cee ní binib tí cá kí béé marab. Di sá yii úǹ di sá ti-Dindaan Mpɔŋkɔdaan tuuŋŋu. 8 Ama nimbee, ni dū nsan gbanti ki fá, ní ni-dàkatam yāntì binib tikpil gáatì. Ni bíil̀ dipoondi din bí man nì Leefii yab kansikinee. Ti-Dindaan Mpɔŋkɔdaan di lī míǹ. 9 Too, ma mun làá yàntī Isirayeel nibul kɔkɔ ń kpèè-ni fám kí sìntīǹ-ni taapu taapu, di sá yii naa ŋúb́ m-marab ní ki pɔ̀ gandi.»Isan ili pu ní Juuda yab dī ki bíil̀ dipoondi
10 Ti-kɔkɔ baa kaa sá ubaantaaa? Unimbɔtibaanti di kaa náań-taaa? Kin ba pu ní ti nyēē tɔb booŋyi ki bíiĺ dipoondi din nìn bí Unimbɔti nì ti-naanjab kansikinee? 11 Juuda yab kaa yúl̀ deedee. Bi túń ntimbiil tuuŋŋi Jeerusaleem tiŋkin nì Isirayeel timmu kɔkɔ poon. Di sá yii bi kpēē ki sīŋkiǹ circir kɔŋkooŋŋu ŋun ti-Dindaan néeń tikpilee. Bi cáá binimpoobi bin nóó awaayee. 12 Ti-Dindaan ń nyāntí unil un ŋáań mimmee nì u-dicaŋku kɔkɔ Isirayeel nibul kansikin. Ú nyāntí kí kpáaǹ un cāabìń saraabi u-yindi pu ki tìì ti-Dindaan Mpɔŋkɔdaanee.
13 Tin ni gíti ŋáańee sèé: «Ni-nyinnyim gbéè ti-Dindaan saraafaŋŋu pu, ni sūǹ ki yáliŋkí, di sá yii waa ti fàtīí tɔ̄ ni-saraabi, kaa tí fòol̄-bi. 14 Ní ni bàlifī yii ba pu ní an bí míǹ? Kun puee ni nìn pōoǹ u-nimbiin yii ni làá yūĺ nì ni-taafaanimpuu deedee. Ama ní ni nyáń u-boon. Unimpu gbanti mun di nìn sá ni-ŋàliŋu ní ni nìn pōoǹ-u dipoondi. 15 Ti-Dindaan kaa yāntì ni nì u kpántì unibaanti ki cáá tiwumbaantiil nì kufoou kubaantiiuaaa? Ní unibaantee nyàab̀ ba? U nyàab̀ mmaabùti ŋun Unimbɔti tììyee. Ní nīn nyíǹ ni-ba tiŋan. Ubɔ ń taa nyā u-taafaanimpuu boon. 16 Ti-Dindaan Isirayeel Nimbɔtiu di lī yii, unil un jìn̄ u-nimpuu kináŋee, udaan ŋá tipɔmbɔti dee, ti-Dindaan Mpɔŋkɔdaan di lī míǹ. Ní nīn nyí nì ni-ba kí taa nyā ni-pooŋyi boon.»
Ti-Dindaan làá tɔ̄ń u-tuuŋŋu
17 Ni nín sòoǹ puee, ni kɔ̄ntí ti-Dindaan digìńdi. Ni lì yii: «Nì mana ní ti kɔ̄ntí-u digìńdi?» An sá ni nín lì yii: <Bin ŋáań ikpitee ŋān̄ ti-Dindaan cee, ní bi-bɔti fáatì-u.> Ni gíti lì mun yii: <Unimbɔti un sòoǹ tibɔti deedeeyee bí la?>