Maatiiu 11

Yoowaneesi tú u-boonnooliibi Yeesu cee

1 Yeesu nín tīī u-boonnooliibi saalaa nì bilee isansaŋki ki dóòyee, ní u yíkì ki nín nìkì ntimu mun kíǹee ni ki sòoǹ Unimbɔti bɔti ki dàkà binib.

2 Ní Yoowaneesi un fùul̀ binib Unimbɔti nyimee kāl̀ kusarkadiinee ki gbìl̄ Kriisitoo tuuŋŋi ŋin u tūǹee pu. Niinee ní u lēē u-boonnooliibi biba ki tú bí cùú bàlifì-u yii: 3 «Sii di sá un ti nyí yii u dòońeeyaaa, tí nīn kā ki cí ubɔ ní?» 4 Ní Yeesu kíí-bi yii: «Nín̄ cámaan kí māafì Yoowaneesi tin ni kée nì tin ni gbìl̄ee: 5 Bijɔfub nimbiliŋ ŋúbitì, bideembi cōom̀, binyaŋgbantiibi wunti ŋáŋkì, bitafakpaafub kíǹ ki gbìl̀, bitaŋkpiibi fīkitì, m sòon̄ tibɔmɔntiil ki tīī binandambi^a. 6 Unil un fōō-mi ki kíí kaa gùgufēe bí mmɔnneeee!»

7 Yoowaneesi boonnooliibi búntèe ní Yeesu bíi sòoǹ Yoowaneesi pu samaayee cee ki bí yii: «Ni nín cūtì kuteeun ki kpēē Yoowaneesee, dinicil dilal ní u sá? U sá kii dikaliŋgbaandi din kubuŋu fīintéeee? 8 Ba ní ni cūtì ki kpēē ní? Unil un pēē agaajabɔkuteeee? Bin pēē agaajabɔkutee, bi kāntí bíǹ abeecinni ní! 9 Kin, ba ní ni baasii cūtì niin ki kpēē ní? Ni cūtì ki kpēē Unimbɔti bɔnaatiliu níii? Iiin tiŋman, m tùkù-ni yii, un ní ni ká niinee jítiǹ Unimbɔti bɔnaatiliu pu gba. 10 Kun puee Yoowaneesi sá un pu Unimbɔti gbɔŋku poon sòon̄ yii: Unimbɔti bí yii: <M làá tɔ̄ń m-tɔntɔnliu ú lìntīń a-nyɔkɔpu kí bɔ́ntí-si nsan.> Ní Yeesu gíti bí-bi yii: 11 Ibaamɔn ní m sòoǹ, bin kɔkɔ unimpu núuĺ ki màl̄ee kansikinee, ubɔ kaa bí ki jítiǹ Yoowaneesi. Ama un sá kiwaai Unimbɔti Beelinee jítiǹ Yoowaneesi. 12 Kí yòon̄ ŋyunti ŋun Yoowaneesi un fùul̀ binib Unimbɔti nyimee sòon̄ Unimbɔti bɔti ki dāa sāā díǹee, Unimbɔti Beel dɔ́miń nì mpɔn ní, bin nimbiliŋ máǹ di-puee di kóò. 13 Unimbɔti bɔnaatiliibi kɔkɔ nì Mooyiisi marab sòon̄ Unimbɔti Beel pu bɔti ní ki dāa dūu sāā Yoowaneesi yuntiŋu. 14 Ni yaa là kí gbìlīǹ-mee, Yoowaneesi di sá Eelii un bi nìn sòon̄ yii u làá gítińee. 15 Un yaa cáá ditafalee ń gbìl̄.»

16 Ní Yeesu gíti bí yii: «Ba ní m làá dū waanee nib kí ŋmàntīǹ dee? Bi náań nì mbiyaamu mun kā sampaan puee ní, mubɔ kūuntí ki lì mu-jutiibi yii: 17 <Ti búń-ni awul, naa ŋɔ́ń, ki gāā-ni ikpiisilan, naa súń.> 18 Di sá yii Yoowaneesi un fùul̀ binib Unimbɔti nyimee dɔ́miń ní kaa là tijinaaa, kaa là ndaam, ní ni bí yii: <Arasinii di bí u-pu.> 19 Ní man Kinibiki dɔ́miń ki jīǹ ki nyù, ní ni bí yii: <Uninja nee sá upoofu, ki sá udanyɔl, ní ki bɔ́ɔtí bifɔtiliibi nì binikpitib bin kɔ kíǹee.> Ama bin fōō Unimbɔti ciiŋyi ki kííyee dàkà yii i sá deedee.»

Mbusu dɔ̄ ki cí ntiŋkpitimu

(Kpèè Luuki 10.13-15)

20 Niinee ní Yeesu bíi wòoǹ ntimu mun poon u nìn ŋá maamaacib tikpilee nib, kun puee baa kpántì bi-bimbim. 21 U bí yii: «Mbusu dɔ̄ ki cí nimbi Koorasin tiŋki nib, mbusu dɔ̄ ki cí ni mun Beetisayida tiŋki nib. Kun puee, maamaacib bin m ŋá ni-cee nee di yaa bàà nìn ŋámaan Tiir nì Siidɔn timmun, niin yab bàà nìn kpántìmaan bi-bimbim malaa, ki pēeǹ kpɔsatab ki dū ŋfantam ki pùkū bi-ba^b. 22 An puee m tùkù-ni yii, ibɔsoon dalee, nimbi tafadaaldi dāa jítiǹ Tiir nì Siidɔn nib yal. 23 Kin, nimbi Kapeernayum tiŋki nib, ni nyí yii ni làá yīkì yilpu kí tin tūū kutagbɔŋu níii? Ni làá sìntī kí bà taapu taŋkpiibi ní, kun puee maamaacib bin m ŋá ni-cee nee di yaa bàà nìn ŋámaan Soodoom tiŋkinee, bíǹ bàà nìn kpántìmaan bi-bimbim ki bàà dáá gbíntìi bí díǹ^c. 24 An puee ní m tùkù-ni yii, ibɔsoon dalee, Soodoom tiŋki tafadaaldi dāa sɔ́ǹ nimbi yal.»

Dāam̄maan m-cee kí ká diŋuŋfil

(Kpèè Luuki 10.21-22)

25 Ŋyunti gbantee ní Yeesu bí yii: «Óooo, m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi, ki dū-tì ki dàkā bin sá ŋwaamuee^d. 26 M-Baa, tiŋman a ŋá míǹ kun puee míǹ di ŋān̄ a-cee ní ki fáatì-si.

27 «M-Baa dū tikɔkɔ ki ŋúbiǹ-mi, ní báà ubɔ kaa nyí man u-Jipɔɔn, asee m-Baa baba. Míǹ ní ubɔ mun kaa tí nyí m-Baa asee man u-Jipɔɔn baba, nì bin man u-Jipɔɔnee yaa là kí dū-u kí dàkèe.

28 «Nimbi bin tú awaŋgul ki gīīyee, dāam̄maan man cee ḿ túutí-ni ní ŋùŋfì, 29 kí yòom̄maan man kpaambooku kí fōōmaan m-bɔti. Kun puee m-poon mɔ̄, ní m-bɔti kaa pɔ̄ɔ̄, ni làá ká diŋuŋfil^e. 30 Man kpaambooku pɔ̀fì ní m-waŋgul mun bí fúku fuku.»