Maatiiu 10

Yeesu kpambaliŋ saalaa nì ali yiŋŋi

1 Yeesu yíiń u-boonnooliibi saalaa nì bilee, ní ki tīī-bi mpɔn bí jà arasiniibi kí cáaǹ iween kɔkɔ nì bin wɔ̀b̄ee kɔkɔ. 2 Yeesu kpambaliŋ saalaa nì alee yiŋŋi sɔ̀. Mbaayee, Siimɔn un bi gíti yíì Peetroo (an taapu sá yii: Ditaŋkpal), nì u-naal Andree, nì Seebeedee jipɔmbi Yakubu nì u-naal Yoowaneesi, 3 nì Fiiliipi nì Baateeleemii, nì Toomasi nì Maatiiu un sá ufɔtilee, nì Yakubu Alfee jipɔɔn, nì Tadee, 4 nì Siimɔn un nìn là kí jáǹ Room yabee, nì Juudasi Isikaariyɔti un dāa dū Yeesu ki nyáfiǹ u-nannanliibee.

Yeesu tú u-kpambaliŋ

(Kpèè Maar 6.7-13, Luuki 9.1-6)

5 Yeesu nìn tú u-kpambaliŋ saalaa nì alee, ní ki kpáafì-bi yii: «Ní taa cù bin kaa sá Juuda yabee cee, kí taa kɔ́ Samaarii yab timmun. 6 Túĺmaan Isirayeel yab bin bí kii ipii in wáŋkèe cee. 7 Cùú sòom̀maan Unimbɔti bɔti yii: <Unimbɔti Beel sútì ki pìlīń-ni.> 8 Cáam̀maan bibunliibi kí fìkitī bitaŋkpiibi kí ŋāŋkì binyaŋgbantiibi wunti, kí jà arasiniibi. Kii ni nín fōō faalaa puee, ni mun tīīmaan faalaa. 9 Ní taa nyàab̀ sindaariya nì animbil nì tikúman nimbiliŋ kí fúuń ni-tɔkɔliŋin. 10 Ní taa nyàab̀ tilɔti ni-saŋkindi pu, nì abɔkuti ali, nì anaataka nì ŋkpandɔ, kun puee bin kansikin ni bí ki tūǹ ditundee di máaǹ kí kpèè-ni^a.

11 «Ni yaa bàn̄ ki kɔ́ kitiŋkpaaŋŋin àá kitiŋwaai poonee, nyàab̀maan kí béé un kítì kí fōō-nee. Ni yaa kɔ́ udaan ceeyee, ní kàl̄maan niin kí tin sāā ŋyunti ŋun ni làá dāá yīkì kitiŋ gbantinee. 12 Ni yaa kɔ́ kudicaŋuee nee, ní péé kí jāam̀-bi, yii: <Unimbɔti ń tīī-ni ŋgbansɔŋfi^b!> 13 Bin bí kudicaŋu gbantinee yaa kítèe, ní ni nín jáam̀ ki tīī-bi ŋgbansɔŋfi ŋuŋyee làá nīn bí bi-pu. Ama bi yaa kaa kítì kí fōō ŋgbansɔŋfi gbantee, ŋú fàtīí gítiń ni-cee. 14 Ni yaa kɔ́ dicindi diban, àá kitiŋ kiban ní bi yaa yíì kaa fōō-ni, kaa là kí pīlifiǹ-nee, ní nyāmaan niin kí gbāfì ni-taaŋi kpɔŋkpɔm^c. 15 Ibaamɔn ní m tùkù-ni, ibɔsoon dalee, Unimbɔti nín nìn dáaĺ Soodoom nì Goomoora^d timmu tafal ki yāntì ŋŋmi nyánní yilpu ki wùn̄-mu puee dāa sɔ́ nì kitiŋ gbanti yab nín làá ká ditafadaaldi diŋyee.»

Bi làá sàaǹ Yeesu boonnooliibi

(Kpèè Maar 13.9-13, Luuki 21.12-17)

16 Ní Yeesu bí-bi yii: «Ní pīlifì. M dū-ni ki tú kii ipiiyee isaakpan kansikin. An puee ní nīn nyíǹ ni-ba kii ikoobuee kí nīn bímaan soooo kii abeenanjilee. 17 Ama ní nīn nyíǹ ni-ba nì binib, kun puee bi làá nīn cútí-ni ki cáǹ ibɔsoon, kí nīn gbáà-ni anaalab bi-kpafidiiŋŋin. 18 Bi làá nīn cáǹ-ni biyidambi nì bibɔtiibi cee man pu, án nín làá ŋá pu ní sòoǹ tin ni nyí man puee Juuda yab nì bin kaa sá Juuda yabee nimbiinee. 19 Bi yaa láa cáǹ-ni bibɔsoonliibi nimbiinee, ní taa nín̄ yáliŋkí min ní ni làá tin sòoǹee nì tin ni làá lèe pu. Ŋyunti gbantee ní Unimbɔti làá tīī-ni tibɔti tin sá ní lèe. 20 An kaa sá nimbi ni-ba di làá sòoǹ, ni-Baa Unimbɔti Fam di làá dī ni-pu kí sòoǹ. 21 Unil dāa cútí u-nabiki kí tīī bí kpɔ̀, ní ubaati ń dāá cúú u-biki kí tīī bí kpɔ̀, ní mbiyaamu mun dāa yíkí kí jáǹ bibaatiibi nì binaatiibi kí yàntī bí kpɔ̀-bi. 22 Báà ŋma làá nīn ná-ni kun puee ni fōō-mi ki kíí. Ama un yaa pɔ́ɔǹ ki tin kátì-kuee dāa kāntí difiil. 23 Bi yaa láa bíi páb̀-ni kitiŋ kibanee, ní sāǹ kí póotí kiban. Ibaamɔn ní m tùkù-ni, naa làá yìiǹ kí dóó Isirayeel timmu kɔkɔ ní man Kinibiki ń bàń.

24 Utumbifil ubɔ kaa bí ki jítiǹ un dàkà-uee, míǹ ní utɔntɔnli ubɔ mun kaa bí ki jítiǹ u-kpiliu. 25 An ŋmāntì utumbifil ń nīn kíǹ ki bí kii un dàkà-uee, ní utɔntɔnli mun ń nīn kíǹ ki bí kii u-kpiliuee. Bi yaa yíiń kudiidaan yii Beelseebuul, arasiniibi bɔtiuee, mana ní baa dāa ŋūǹ kí yíiń u-dicaŋku yab bíǹ míǹ?»

Un unil máaǹ kí fàŋkèe

(Kpèè Luuki 12.2-7)

26 An puee, ní taa fàŋkìmaan binib. Tin kɔkɔ bí dibalinee làá dāá nyā mpaampiin pu ní tin pu baa nyée, bi làá dāá béé-tì. 27 Tin ní m tùkū-ni dibɔmbɔndinee, sòom̀maan-tì ŋwiimpu, ní tin ní m lɔ́kɔfì-ni dibalinee, dū-tì kí bāakìmaan. 28 Taa fàŋkìmaan bin ŋūǹ kí kpɔ̀-ni ama ní kaa ŋūǹ kí kpɔ̀ ni-naŋkee. Ama fàŋkìmaan Unimbɔti un ŋūǹ kí dū ni nì ni-naŋki kɔkɔ kí tɔ̄ ŋŋmin kí nàan̄ee^e. 29 Baa nyáfí seerib bili gbòooo? Nì míǹ kɔkɔee, ni-Baa Unimbɔti yaa kaa pú nsan, seer ubɔ kaa lítiń kitiŋ. 30 Nimbee, Unimbɔti kàan̄ ni-yikpiti kɔkɔ ní. 31 An puee, ní taa fàŋkì: ni pɔ̄ɔ̄ kudaau ki jítiǹ kuseerpaau.

Yeesu nyí un nyí-uee

(Kpèè Luuki 12.8-9)

32 Un kamaa yaa lī binib nimbiin yii u sá man yɔuee, ma mun dāa lì m-Baa un bí yilpuee nimbiin yii u sá m-yɔu ní. 33 Ama un di yaa néè binib nimbiin yii waa nyí-mee^f, ma mun làá néé m-Baa un bí yilpuee nimbiin yii maa nyí-u.

An sá kujaau ní, kaa sá ŋgbansɔŋfi

(Kpèè Luuki 12.51-53, 14.26-27)

34 «Ní taa dàkafì yii m cáań ŋgbansɔŋfi kitiŋ pu, maa cáań ŋgbansɔŋfi, kitàataajiki ní m cáań. 35 M dɔ́miń kí yàkatī unil nì u-baa, usapɔɔn nì u-na, unimpu nì u-beel ní. 36 Unil nannanliibi di dāa sá u-dicaŋkun yab^g. 37 «Un néeń u-baa àá u-na ki jítiǹ mamee kaa kítì kí nīn sá man yɔu, ní un néeń u-jipɔɔn àá u-bisal ki jítiǹ mamee kaa kítì kí nīn sá man yɔu. 38 Un yaa kaa yōoǹ u-dɔpuntikaaŋu ki túǹ kí nīn nóó-mee, kaa kítì kí nīn sá man boonnooliu. 39 Un di nyàab̀ kí fīī u-maŋfalee làá fá-dì. Un di yaa dū u-maŋfal ki fá man puee di dāa kāntí u-maŋfal.»

Tipaal dɔ̄ ki cí bin ŋáań tiŋanee

(Kpèè Maar 9.41)

40 «Un yaa fōō-nee, fōō man dee, ní un yaa fōō-mee fōō un túnní-mee dee. 41 Un yaa fōō Unimbɔti bɔnaatiliu yii u nín sá Unimbɔti bɔnaatiliuee puee, udaan làá dāá fōō tipaal tin Unimbɔti bɔnaatiliuee làá dāá fōōyee ní. Ní un yaa fōō un yú deedee Unimbɔti nimbiinee, yii u nín yú deedee Unimbɔti nimbiinee puee, udaan làá dāá fōō tipaal tin un yú deedee Unimbɔti nimbiinee làá dāá fōōyee ní. 42 Un di yaa pú ŋwaamu nee kansikin kiba nnyinsɔm kpaŋkpam kì nyùn̄ yii kì nín sá man boonnooliuee puee, ibaamɔn ní m tùkù-ni, udaan làá ká u-paati.»