Yoowaneesi 8

1 Ní Yeesu, úǹ nín jɔ́ḿ Ɔliifi sufii jool pu^a. 2 Ku wúntì kutaafaau pɔ̀lpɔlee, ní u fātìi nín gítiń kunimbɔtidiin, ní binib tikpil tí dɔ́miń u-cee. Niinee ní u kāl̀ ki bíi dàkà-bi Unimbɔti bɔti. 3 Ní bimaradakaliibi nì Fariisab cáań-u unimpu ubɔ, bi nìn cúú-u u bíi ŋáań tilaakpaal. Ní bi cáá-u ki yóoǹ kunipaau kansikin, 4 ní ki bí Yeesu yii: «Ukpil, unimpu nee bíi ŋáań tilaakpaal ní ti cúú-u. 5 Mooyiisi marab poonee, u bí-ti yii tí dū ataŋkpee kí yāŋkì an nimpoobee kí kpɔ̀^b. Mimmee, sii ká yii ba?»

6 Bi nìn píĺ Yeesu ki là ú sòoǹ kí kɔ́ bi-bɔtinee, ní bi cáań-u an bɔti. Ní Yeesu bōoǹ ki cáá u-ŋambiki ki ŋmà kitiŋ. 7 Bi gbíntìi bíi bàlifī-uee, ní Yeesu yáatì, ní ki bí-bi yii: «Ni-kansikin un di yaa kaa pée ŋá ikpiti ki kée ń péé péé kí dū ditaŋkpal kí yā unimpu nee!» 8 U lī mimmee ní ki fātìi tí bōoǹ ki bíi ŋmà kitiŋ. 9 Binibee nín gbìl̄ mimmee, ní bi kíǹ ki sútí ubɔ ubɔ ki wàatī unimpuee, ki kíliń bitikpilib ki dāa dūu kúntì ŋwaamu, ní an tin kíǹ Yeesu baba, ní unimpuee yú ki kɔ́ĺ-u. 10 Ní Yeesu yáatì ki bí yii: «Unimpuee, bin cáań-see bí la? Kéè, báà ubɔ kaa ŋá-si tibaa!» 11 Ní unimpuee kíí-u yii: «Aayee, ukpil, báà ubɔ kaa ŋá-mi tiba.» Ní Yeesu bí-u yii: «Ma mun kaa làá ŋá-si tiba. Á nīn cá kí taa ti ŋá ikpiti.»]

Yeesu di sá ŋwalifi

12 Yeesu fātìi yōoǹ dinyɔɔbundi ki bíi sòoǹ nì kunipaauee yii: «Man di sá ŋwalifi ki tīī duulinya^c. Un yaa nóó-mee làá ká ŋwalifi ŋun tìì dimaŋfalee, udaan kpá kí còom̀ dibɔmbɔndin.» 13 Ní Fariisab bí-u yii: «A nín bíi sòoǹ a-ba pu min nee, tin a sòoǹee kaa sá ibaamɔn.» 14 Ní Yeesu kíí-bi yii: «Nì min kamaa m bíi sòoǹ m-ba pu nee, an sá ibaamɔn ní, di sá m nyí laakin m nyánnée ki nyí laakin m cée mun. Ama nimbi kaa nyí laakin m nyánnéeyaaa, kaa nyí laakin m cée mun. 15 Nimbi sòoǹ tibɔti nniyaamin ní, man kaa sòoǹ báà ubɔ bɔti. 16 Báà m yaa bíi sòoǹ ubɔ bɔtaaa, m sòoǹ-tì nì ibaamɔn ní, kun puee maa bí m-baba, m-Baa un túnní-mee bí m-cee. 17 Ni-marab poonee, an ŋmàn̄ yii binib bili yaa sòon̄ tibɔti mbaantiiminee, an sá ibaamɔn ní^d. 18 Míǹ di sá m sòoǹ m-ba pu, ní m-Baa un túnní-mee mun lèekī m-pu seera.» 19 Ní bi bālifì Yeesu yii: «A-Baa bí la ní?» Ní u kíí-bi yii: «Naa nyí-maaa, kaa nyí m-Baa mun. Ni yaa bàà nyí-mi, ni bàà béetí m-Baa mun.»

20 Yeesu sòon̄ tibɔti nee ŋyunti ŋun u bíi dàkà samaa kunimbɔtidiin, laakin bi ŋáań saraa nimbiliŋee, ní báà ubɔ kaa tāntì u-ŋal ki gbēē-u, kun puee u-yuntiŋu kaa láá bāań.

Naa ŋūǹ kí cù laakin m cée

21 Ní Yeesu gíti bí-bi yii: «M làá nīn cá, boonee ni làá dāá nyàab̀-mi, kaa làá dāá ká-mi, ní kí dāá kpáàa kpú ni-kpitii poon. Naa làá ŋmā kí dāan̄ laakin m cée.» 22 Niinee ní Juuda yab bíi sòoǹ yii: «Mimmee, u làá kalin kpɔ̀ u-ba naaa? Ba pu ní u bí yii, naa ŋūǹ kí dāan̄ laakin m cée?» 23 Ní Yeesu kíí-bi yii: «Nimbi sá taapu doo yab ní, man nyánní yilpu ní. Ni sá duulinya yab ní, man kaa sá duulinya yɔu. 24 An pu ní m tùkū-ni yii ni làá kpú ni-kpitii poon. Ni yaa kaa fōō ki kíí yii <man di sá un m sée^e>, ni làá kpú ni-kpitii poon ní.» 25 Ní bi bālifì-u yii: «Sii di sá ŋma ní?» Ní u kíí-bi yii: «M nìn pée tùkū-ni doooo mpeekaam un m sée. 26 M cáá tibɔti tikpil kí sòoǹ ni-pu kí kpɔ̀ ni-bɔti. Un túnní-mee sá ibaamɔndaan, ní tin u tùkū-mee ní m cáa bíi sòoǹ ki tùkù nimbi taapu doo nib.»

27 Ama Juuda yab kaa nìn nyí yii Unimbɔti Ubaati pu ní u bíi sòoǹ nì bi. 28 Míǹ pu ní Yeesu nìn gíti tùkū-bi yii: «Ni yaa láa yōoǹ man Kinibiki yilpuee, ní ni dāa béetí m nín sá uŋyee. Maa ŋáań tiba m-ba pɔŋŋu pu, see tin m-Baa dàkà-mee ní m cáa sòoǹ. 29 Un túnní-mee bí m-cee, waa yàntī ḿ nīn bí m-baba, kun puee m pée ŋáań baabadal min fáatì-uee ní.» 30 Yeesu nín nìn bíi sòoǹ tibɔti gbantee, binib tikpil nìn fōō-u ki kíí.

Binib bin tɔ́ bi-bee nì iyumbu

31 Niinee ní Yeesu bí Juuda yab bin fōō-u ki kííyee yii: «Ni yaa ŋúb́ m-bɔti nee, ni làá nīn sá m-boonnooliibi tiŋman pu yab. 32 Ni làá béé ibaamɔn, ní ibaamɔnee ń yàntī ní tɔ̄ ni-ba.» 33 Ní bi kíí Yeesu yii: «Ti sá Abraam naantiibi ní^f, doooo nee ubɔ kaa pée cúú timbi kuyuŋu. Ba di yāntì ní a bí yii ti làá tɔ̄ ti-ba?» 34 Ní Yeesu kíí-bi yii: «Ibaamɔn, ibaamɔn ní m sòoǹ nì ni, un sá kamaa yaa ŋáań ikpitee sá ikpiti yumbuu ní. 35 Uyumbu kaa sá kudicaŋu poon niliu kí nīn cá, ama kudiidaan jipɔɔn úǹ làá nīn sá kudicaŋu poon niliu ní kí nīn pée cá jaanjaan. 36 Mimmee, man Ubaati Jipɔɔn yaa tīī-ni dibatɔlee, míǹ ní ni lafun tɔ́ ni-ba tiŋman pu. 37 M nyí yii ni sá Abraam naantiibi. Ama ni nyàab̀ kí kpɔ̀-mi. Di sá m-bɔti kaa ká mpaan ni-pɔbiliŋin. 38 Man sòoǹ tin m-Baa dàkā-mee, ní ni mun ŋáań tin ni-baa tùkū-nee.» 39 Ní bi fātìi kíí-u yii: «Timbi baa di sá Abraam!» Ní Yeesu bí-bi yii: «Ni yaa bàà sá Abraam biyaamuee, ni bàà ŋáań min Abraam nìn ŋáańee ní^g. 40 Ama, nì min kɔkɔwoooo m sòoǹ ibaamɔn in m gbìl̄ m-Baa ceeyee, nimbi nyàab̀ kí kpɔ̀-mi. Abraam kaa nìn ŋá míǹ dalba. 41 Ni-baa nín ŋáań puee, míǹ ní ni ŋáań!» Ní bi kíí-u yii: «Timbi kaa sá nnaayubiyaamu, ti-baa sá ubaanti ní, úǹ di sá Unimbɔti.» Ní Yeesu kíí-bi yii: 42 «Unimbɔti yaa bàà sá ni-Baayee, ni bàà néeń-mi ní, kun puee Unimbɔti cee ní m nyánní ki dɔ́miń, maa dɔ́miń m-ba pu, an sá úǹ di túnní-mi. 43 Ba pu ní naa gbìl̀ m-bɔti tin m sòoǹee taapu? Kun puee naa ŋūǹ kí pīlifì-tì. 44 Nimbi baa di sá Sitaan, min min ni-baayee lèe, an ní ni là ki ŋáań. U pée sá unikpɔl doooo ŋkilkaamin ní. Waa sí ibaamɔnni kun puee waa cáá ibaamɔn u-ni. U yaa bíi mɔ́ntée, míǹ di sá u-bimbim, kun puee u sá unyimɔndaan ní, úǹ di sá inyimɔn na nì i-baa. 45 Man nín sòoǹ nì ni ibaamɔn puee ní naa là kí fōō-mi kí kíí. 46 Ni-kansikin, ŋma di ŋūǹ kí dàkà diyìntil din m yīntèe? Mimmee, ni nín nyí yii tin m sòoǹee sá ibaamɔnee, ba ŋá ní naa làá fōō-mi kí kíí? 47 Un sá Unimbɔti yɔuee gbìl̀ Unimbɔti bɔti ní. Ni yaa kaa gbìl̀ Unimbɔti bɔtee, naa sá u-yab dee.»

Yeesu nì Abraam

48 Ní Juuda yab kpilib fātìi kíí-u yii: «Ti nín lī yii a sá usamaariija, arasinii mun kā a-puee, an kaa sá ibaamɔnaaa?» 49 Ní Yeesu kíí-bi yii: «Arasinii ubɔ kaa kā m-pu, m-Baa ní m bíi tìì tinyool, ní nimbi kpèé ki sìŋkīǹ-mi. 50 Man kaa nyàab̀ bí pàkà-mi. Ubɔ bí ki làá pàkà-mi, udaan di sá ubɔsoonli. 51 Ibaamɔn, ibaamɔn ní m sòoǹ nì ni, un ŋúb́ m-bɔtee kaa ti bí kí kpú jaanjaan.»

52 Niinee ní Juuda yab kpilib bí-u yii: «Kɔŋkɔnnee ti lafun béè yii arasinii ubɔ kā a-pu! Di sá Abraam kpíì, Unimbɔti bɔnaatiliibi mun kpíì, ní sii bí yii un yaa ŋúb́ a-bɔtee kaa ti kúù jaanjaanaaa? 53 Mimmee sii jítiǹ ti-baa Abraamaaa? Úǹ kpíì, ní Unimbɔti bɔnaatiliibi mun kpíì. Sii yíì a-ba ŋma ní?» 54 Ní Yeesu kíí-bi yii: «M yaa bíi tìì m-ba tinyoolee, mimmee m-nyootee kaa sá timɔntiil dee. Un tìì-mi tinyoolee di sá m-Baa un ni bí yii u sá ni-Nimbɔtiu, 55 ama ní kaa nyí-uee. Man nyí-u. M yaa néè yii maa nyí-u, m làá kpántí unyimɔndaan kii nimbee ní. Man nyí-u, ní ki ŋúb́ u-bɔti. 56 Ni-naanja Abraam nín béè yii m làá dāan̄ taapu dooyee, an mɔ́ɔkiǹ-u, ní u lafun ká ní u-pɔbil píil̀.» 57 Ní Juuda yab kpilib kíí-u yii: «Sii kaa láá bàn̄ abin imuŋku ili nì saalaa, a ká Abraam la?» 58 Ní Yeesu kíí-bi yii: «Ibaamɔn, ibaamɔn, man pée bí ní bi nín màl̄ Abraam!» 59 Niinee ní bi bíi píikí ataŋkpee kí yāŋkì-u, ní Yeesu nɔ̄ntì ki nyáń kunimbɔtidiin.