Yoowaneesi 9

Yeesu cáaǹ uninja un bi màl̄ nì ijɔfee

1 Dalba Yeesu jītée, ní ki ká ujɔfu ubɔ. Bi nìn pée màl̄-u nì ijɔfi ní. 2 Ní u-boonnooliibi bālifì-u yii: «Ukpil, ba pu ní bi màl̄ kijapaai nee nì ijɔfi ní? Úǹ u-ba di ŋá ikpiti naaa, u-baa nì u-na di ŋá ikpiti ní^a?» 3 Ní Yeesu kíí-bi yii: «An kaa sá úǹ di ŋá ikpitaaa, an kaa tí sá u-baa nì u-na di ŋá ikpiti, ama an sá Unimbɔti ń dī u-pu kí dàkà u-tundi, an pu ní bi màl̄-u míǹ. 4 Ŋwìiń nín dáá bí pu nee, tí tɔ̄ un túnní-mee tundi, kun puee kunyeeu làá mɔ́ ubɔ kaa dāa gíti ŋūǹ kí tɔ̄ ditundi. 5 M nín dáá bí duulinyan doo nee, man di sá ŋwalifi ki tīī duulinya.» 6 Yeesu lī mimmee, ní ki tíil̀ timɔtan^b kitiŋ ní ki dū u-ŋambiki ki mɔ́ǹ ntam ki dūu ŋmītì ujɔfuee nimbiliŋ, 7 ní ki bí-u yii: «Nín̄ cá Siiloowee nyimbɔbilin^c kí fíntí a-nimbiin.» - Siiloowee taapu di sá yii: «Bi túnní-u.» - Ujɔfuee nìn búntì kí fíntí u-nimbiin. U dāa fātìi gítìńee, u kíǹ ki wāĺ ní. 8 Ní u-kɔŋkɔnnaatɔb nì bin nìn kāntí u kàal̀ ki mèé animbilee bíi lì yii: «An kaa sá kijapaai nee di nìn kàal̀ doo ki mèé ki jīǹeeee?» 9 Ní biba bí yii: «Tiŋman, an sá úǹ!» Ní bin kíǹee bí yii: «An kaa sá úǹ, bi náań ní.» Niinee ní un nìn sá ujɔfuee bí yii: «Tiŋman, an sá man!» 10 Ní bi bālifì-u yii: «Kin, an ŋá mana ní a wál̀?» 11 Ní u kíí-bi yii: «Kijapaai kin bi yíì Yeesuee di sɔ̄ŋkì ntam ki ŋmītì m-nimbiliŋ ní ki bí yii ḿ nīn cá Siiloowee kí fíntí m-nimbiin. M nín cūtì ki fíntì m-nimbiinee, ní m wál̀.» 12 Ní bi bālifì-u yii: «Kijapaayee bí la?» Ní u kíí-bi yii: «Maa nyí u-laŋki.»

Fariisab bíi bàlifī ujɔfu un ká dicáaǹdee tibɔti

13 Ní bi yōoǹ kijapaai kin nìn sá ujɔfuee ki cáa cūnnì Fariisab cee. 14 An nìn sá ŋwiŋŋuŋfikaa dal ní Yeesu nìn sɔ̄ŋkì ntam ki ŋúbitì ujɔfuee nimbiliŋ. 15 Míǹ pu ní Fariisab mun bālifì kijapaayee yii: «An ŋá mana ní a wāĺ kɔŋkɔnnee ní?» Ní u kíí-bi yii: «U sɔ̄ŋkì ntam ki dūu ŋmītì m-nimbiliŋ, ní m cūtìi fíntì m-nimbiin ní ki kíǹ ki wāĺ kɔŋkɔnnee.» 16 Ní bi-kansikin biba bíi lì yii: «U nín kaa nyí ŋwiŋŋuŋfikaa nee, kijapaayee kaa sá Unimbɔti niliu.» Ní biba mun lī yii: «Unikpiti mun ŋūǹ kí ŋá maamaacib yéèee?» An di nìn cáań diyakatil bi-kansikin. 17 Niinee ní bi fātìi bālifì un nìn jɔ̀b̄ee yii: «Un ŋúbitì a-nimbiliŋee, sii nyí yii u sá ŋma ní?» - Ní u kíí-bi yii: «U sá Unimbɔti bɔnaatiliu ní.»

18 Juuda yab kpilibee kaa nìn fōō ki kíí yii kijapaayee nìn sá ujɔfu ní ki wál̀ kɔŋkɔnnee, an pu ní bi tú ki yíiń u-baa nì u-na 19 ki bālifì-bi yii: «Ni-jipɔɔn baasii sɔ̀ɔɔ? Ni lafun màl̄-u nì ijɔfaaa? Ní an ŋá mana ní u wāĺ kɔŋkɔnnee?» 20 Ní u-baa nì u-na kíí-bi yii: «Tiŋman, ti-jipɔɔn dee, ti lafun màl̄-uee u sá ujɔfu ní. 21 Ama taa nyí an nín ŋá pu ní u wāĺ kɔŋkɔnneeyee, kaa tí nyí un di yāntì u wál̀ee mun. Ní bàlifìmaan-u, kun puee u cíkitì ki ŋūǹ kí sòoǹ u-ba.» 22 Kun pu u-baa nì u-na nìn sòon̄ mimmee di sá bi nìn fāŋkì Juuda yab tindaŋkpilib, kun puee bi nìn sòon̄ ki yóoǹ yii un yaa pée lī yii Yeesu sá Meesiyayee, bí jà-u kukpafidiin ú taa ti nín̄ bí bi-kansikin. 23 Kun yì-tì u-baa nì u-na nìn bí yii u cíkitì ki ŋūǹ kí kíí u-ba, bí bàlifì-uee dee.

24 Niinee ní bi gíti tí yíiń kijapaai kin nìn jɔ̀b̄ee nliliitiim, ní ki bí-u yii: «Á pàkà Unimbɔti! Ama timbi nyí yii uninjee sá unikpiti ní.» 25 Ní u kíí-bi yii: «U yaa sá unikpitaaa, u yaa kaa sáaa, maa nyí, kun m nyée di sá m nìn sá ujɔfu ní kɔŋkɔnnee m wāĺ.» 26 Ní bi gíti bālifì-u yii: «U ŋá-si mana naaa? Mana ní u ŋúbitì a-nimbiliŋ ní?» 27 Ní u kíí-bi yii: «M pée tùkū-ni ní naa pílifiǹ-mi. Ba pu ní ni là ḿ gíti bùsì kí lì nliliitiim? Àá ni mun là kí kpántí u-boonnooliibi ní?» 28 Niinee ní bi bíi sìí-u yii: «Sii di sá kijapaai gbanti boonnooliu, ama timbi sá Mooyiisi boonnooliibi ní. 29 Kun puee, ti nyí yii Unimbɔti nìn sòon̄ nì Mooyiisi, ama un bí nee úŋ̀wuee, taa kpáàa nyí laakin gba ní u yaa nyánnée.» 30 Ní kijapaayee kíí-bi yii: «Tin sá maamaacee sɔ̀. Nimbi kaa nyí laakin u nyánnée, u mun di ŋúbitì man nimbiliŋ. 31 Ti nyí yii Unimbɔti kaa pílifíǹ binikpitib, ama un yaa tɔ́-u ki ŋáań min min ní u lèe, udaan ní u pílifíǹ^d. 32 Doooo nee, taa láá gbìl̄ dalba dalba yii ubɔ ŋúbitì unil un bi màl̄ nì ijɔfee nimbiliŋ. 33 An niliuee yaa kaa nyánní Unimbɔti cee, waa ŋūǹ kí ŋá míǹ.» 34 Ní bi kíí-u yii: «Sii pée sá unikpiti doooo a-na poon ní bi nín màl̄-si, ní sii là kí dàkà timbaa!» Niinee ní bi jìn̄-u ki nyántì.

Bin baasii jɔ̀b̄ee

35 Yeesu gbìl̄ yii bi jìn̄ un nìn sá ujɔfuee. U dāa ká-uee ní ki bí-u yii: «A fōō Kinibiki ki kííii?» 36 Ní u kíí-u yii: «Ukpil, úǹ di sá ŋma ní ḿ fōō-u kí kíí ní?» 37 Ní Yeesu bí yii: «A wāĺ-uaa! Úǹ di bíi sòoǹ nì si nee.» 38 Ní u bí yii: «M-Dindaan, m fōō-si ki kíí,» ní ki tātìi gbāaǹ Yeesu nimbiin ki jáam̀-u. 39 Ní Yeesu bí yii: «M dɔ́miń duulinya nee ni ibɔsoon ní. Bin yaa jɔ̀b̄ee ń wāl̀ ní bin wāĺee ń jɔ̀b̄.» 40 Fariisab biba nìn bí niin. Bi gbìl̄ an nyɔɔbuŋŋee, ní ki bālifì-u yii: «Mimmee, ti mun sá bijɔfub deeyaaa?» 41 Ní Yeesu kíí-bi yii: «Ni yaa bàà sá bijɔfubee, naa bàà cáá ikpiti. Ama ni nín bí yii ni wāĺee puee, ni-kpitii làá nīn pée dī-ni ní.»