Galaati 4

1 M làá tí yòon̄ tibɔŋmantikaal tiba. Di sá yii un làá fōō u-baa gaajawantee yaa dáá sá kibikee, baa ŋūǹ kí gàntī u nì uyumbu, ama u mun di yì tikɔkɔ. 2 U dáá bí binib bin ŋúb́-u ki kpèé u-wantee taapu ní ki cí ŋyunti ŋun u-baa yóoǹee ń dāá bàń. 3 Míǹ mbaantiim, ŋyunti ŋun taa láá béè Kriisitoo saŋŋuee, ti nìn sá duulinya marab yumbui ní. 4 An sāā ŋyunti bāańee, ní Unimbɔti túnní u-Jipɔɔn ní ki yāntì unimpu màl̄-u, ní u mun bí Juuda yab marab taapu, 5 án nín làá ŋá pu ú fīī timbi bin bí mara taapuee kí dū-ti kí kpántí Unimbɔti biyaamuee.

6 Kun dàkà yii ni lafun sá u-biyaamuee di sá Unimbɔti túnní u-Jipɔɔn Fam ti-pɔbiliŋin. Ŋfamee di yì-tì ti yíì-u yii: «Ti-Baa^a.» 7 Míǹ puee, aa ti sá uyumbu, a kíǹ ki sá u-biki ní. A nín sá u-bikee puee, ní u tìì-si u-gaajawanti.

Pɔɔl bíi sáŋkí Galaati yab

8 Dooooyee, naa nìn nyí Unimbɔti ní ki nìn sá awaa yumbui, awaa ŋin kaa sá Unimbɔti, kaa máaǹ bí nóó-ŋee^b. 9 Kɔŋkɔnnee, ni béè Unimbɔti, an dàkà yii Unimbɔti di béè-ni. Ba ŋá ní ni gíti là kí gítí duulinya marab bin kaa cáá mpɔn, kaa bí tibanee taapu kí nīn sá bi-yumbui kii dooooyee ní? 10 Ni gàntī iwiin iba yii i sá ikpaan, ki gàntī iŋmal nì iyunti nì abin mbaantiim^c. 11 An puee, m fàŋkí yii digìńdi din m gīī ni-puee ń taa ŋá fám.

12 Nnabiyaamu, m mèé-ni yii ní nīn bímaan kii mamee, a lì kii ma mun nín nìn gíiǹ m-ba kii nimbee. Ama naa ŋá-mi tibeeee! 13 Ni nyí yii m-weeŋyi di nìn yāntì m sòon̄ nì ni Tibɔmɔntiil mpeepeekaam. 14 Nì min kamaa m-weeŋyee bàà nìn ŋūǹ kí yàntī ní gīiǹ-mee, naa kpēē-mi fámaaa, kaa núutiǹ-mi. Áli gba, ni nìn gíti fōō-mi kii Unimbɔti tuuŋŋuaaa, Yeesu Kriisitoo u-bee ní. 15 Ba ŋá ní an kaa ti mɔ̄ǹ-ni kii dooooyee? Di sá yii m ŋūǹ kí sòoǹ ni-pu yii, ni yaan ŋūǹ, ni bàà lèekī ni-nimbiliŋ kí tīī-mi. 16 Ibaamɔn in m sòoǹ nì nee puee ní naa ti là m-bɔtaaa?

17 Binib nee nín cáá bi-ba ki nākantíǹ-ni dinakándi diŋyee, dàa sá dimɔntiil, bi là kí yàkatī man nì ni kansikin ní, kí dáaliń-ni kí nákáǹ bi-ba. 18 An máaǹ tin ŋān̄ee pu ní unil ń dū u-ba kí nákáǹ-si kí nīn cá jaanjaan, kaa sá m yaa bí ni-kansikinee baba. 19 M-bineeŋkaamu, an tí wù-mi tikpil kii imatiŋweenee kí nīn cí ŋyunti ŋun ni làá dāá kpántí kii Kriisitoo nín bí puee. 20 M yaan bímaan ni-kansikin ŋyunti nee kí ŋmā kí béé m nín làá sòoǹ-ni puee! Kɔŋkɔnnee, m bíi yáliŋkí ni-pu.

Agaar nì Saara bɔti

21 Nimbi bin là kí nīn bí Mooyiisi marab taapuee, tùkùmaan-mi, naa gbìl̀ marab gbɔŋku poon bɔtaaa? 22 Di sá yii an ŋmàn̄ yii Abraam nìn màl̄ mbininjabiyaamu muli, kiba sá unimpuyumbu biki ní kin kíǹee sá unimpu un yì u-bee biki. 23 U màl̄ uyumbu biki nniyaamin, ama ní unimpu un yì u-bee biki màaltam sá Unimbɔti pòontam^d. 24 Tibɔti nee ŋūǹ kí nīn sá-ti tibɔŋmantikaal: binimpoobi bili gbanti ŋūǹ kí dàkà min ní Unimbɔti nìn bóob́ u nì binib kansikinee. Bi nín nìn bóob́ tin Siinaayi jool puee di sá Agaar ní ki màal̀ ŋyumbubiyaamu. 25 Agaar gbanti sá Siinaayi jool din bí Bilaalibub tiŋkinee, ní ki sá Jeerusaleem nì u-biyaamu mun bí kuyuŋun díǹ pu nan ní^e. 26 Ama Jeerusaleem un bí yilpuee sá un yì u-bee, úǹ di sá timbi na. 27 Kun puee an ŋmàn̄ yii:

«Unimpuŋmaŋŋmanti un kaa ŋúń ki màl̄ ki kée,

án nīn mɔ̄ǹ-si!

Sii un kaa nìn nyí imatiŋween ki kée,

á nīn kūuntí nì dipɔɔpindi!

Kun puee unimpu un bi cāntèe màl̄ mbiyaamu ki jítiǹ unimpu un cáá calee^f.»

28 Nnabiyaamu, míǹ ní nimbi sá Unimbɔti pòontam biyaamu, kii Isaaki nín nìn sá puee. 29 Dooooyee, kibiki kin bi màl̄ nniyaaminee nìn páb̀ kibiki kin Unimbɔti Fam yāntì bi màl̄ee. Ní áli nìn díǹ an gbíntìi sá míǹ ní. 30 An ŋmàn̄ Unimbɔti gbɔŋku poon yii ba ní? An ŋmàn̄ yii: «Jà unimpuyumbu nì u-jipɔɔn. U-jipɔɔn nì unimpu un yì u-bee jipɔɔn kaa máaǹ kí yàkatī bi-baa gaajawanti^g.» 31 Míǹ puee, m-nabiyaamu, timbi sá unimpu un yì u-bee biyaamu ní, taa sá unimpuyumbu biyaamu.