Eefeesi i

Kugbɔŋu kun Pɔɔl ŋmàn̄ ki tīī

Eefeesi

yabee

Tibɔkilkaal

Yeesu nín dɔ́miń duulinyan abin imuŋku ili nì saalaa boonee, Kriisitoo nikitiŋ nìn bíi bùtī malaa malaa Asii tiŋkin. Kriisitoo nikitiŋ nìn tūǹ ditundi ki ŋàatī tɔb pu, ní dinikitil din nìn bí Eefeesi tiŋkinee nìn kútì bigaakaabi pu. Di sá yii Yeesu kpambal Pɔɔl nìn kāl̀ kitiŋ gbantin abin ata ŋyunti ŋun u nìn bíi yìiǹ ki sòoǹ Unimbɔti bɔti ntataatiimee (Atuun 19.1–20.1). Kí nóó nì Eef 3.1 nì 4.3, Pɔɔl nìn bí sarkan ŋyunti ŋun ní u ŋmàn̄ Eefeesi gbɔŋku nee ní. An pu ní bi dū-ku ki kútì tigbɔn tin bi yíì «kuyuŋu gbɔntee» pu. Tíǹ di sá Fiiliipi nì Fiileemɔn nì Kooloosi gbɔnti.

Tibɔti tin Pɔɔl sòon̄ dooyee yàntī tí dàkafì yii kugbɔŋu nee sá ki tīī kunipaau, kaa sá dinikitil dibaba. Kun pu ku tɔ́kɔ́ ki sòoǹee sá Unimbɔti nín bɔ́ntì tin dooooyee ki síiǹ kí ŋée ní. Tíǹ di sá : «Ú dāá kóoǹ tin bí yilpuee nì tin bí taapuee kɔkɔ kí kpāfì, Kriisitoo baba ń nīn sá ubɔti» (1.10).

Kugbɔŋu nee kíĺ nì tibɔkilkaal tin kaa fɔ̀kɔ̀ee (1.1-2) nì tibɔkuntikaal tin mun bí kúlkulee (1.10). Ku yākatì ajancukukpaan ali ní:

- Dijampeepeekaal poonee (1.3–3.21), Pɔɔl sòon̄ ki cántì yii tin Unimbɔti dī Yeesu Kriisitoo pu ki ŋá ki tīī-tee cáá maamaaci. Míǹ boonee ní u bɔ́bitì mpèé bɔti ki dàkā min ní Unimbɔti dū bin kaa sá Juuda yabee nì Juuda yab ki ŋá dinibubaantiil, an dàkà yii u-nibulee.

- Dijanliliitiil poonee (4.1–6.20), Pɔɔl bíi tùkù bin làá kàaǹ u-gbɔŋkuee bí nīn bí mpèé gbantin kí nóó nì dimaŋfapɔndi din bi cáá bi nín ŋá ubaanti nì Yeesu Kriisitooyee pu. An bɔtee máaǹ kí kpántí mpèé ŋun máaǹ kí nīn bí bi nì bin kíǹee kansikinee nì Kriisitoo nikitil din poon bi bée nì adican poon nì dinikitil din kansikin bi kóòyee.

Pɔɔl dū tibɔti tita ní ki dūu ŋá Unimbɔti nibul pèéŋu bɔŋmantikaati. Tíǹ di sá tiwun, an dàkà yii Kriisitoo nikitil ní Yeesu Kriisitoo sá diyil, nì kudii ní Yeesu Kriisitoo sá ditaŋkpatilkaalee, nì uninja nì unimpu cáatam, ní Kriisitoo nikitil di sá Kriisitoo nimpuu. Ti kāntí niin yii dikpafindi kaa ŋūǹ kí nīn bí ŋyunti ŋun Kriisitoo yab kaa dū bi-ba ki tīī bi-Dindaan mmɔm ki nákáǹ-uee.