Eefeesi 4

Tí ŋámaan ubaanti

1 An puee, man Pɔɔl un bí sarkan m nín nóó ti-Dindaanee puee, m mèé-ni yii ní nīn bí mbimbim min poon Unimbɔti yíiń-ni ní nīn bée. 2 Ní nīn sìntīǹ ni-ba taapu kí nīn mɔ̄, kí nīn cáá kimɔtii tɔb pu, kí nīn ŋúb́maan tɔb nì dineendi poon. 3 Ní pɔ́ɔǹ ni-ba kí nīn ŋúb́ nnyɔɔpee ŋun Unimbɔti Fam tìì-nee, ŋgbansɔŋfi ń nīn bí ni-kansikin ní ŋá ubaanti. 4 Yeesu wunti sá tibaantiil^a ní, ní Unimbɔti Fam mun sá mbaantiim. Míǹ ní ti-kɔkɔ máká kuwambaantiiu kun pu Unimbɔti yíiń-nee. 5 Ti-kɔkɔ Dindaan sá ubaanti, ní ti-fookiiu sá ubaanti, ní Unimbɔti nyim fàltam sá mbaantiim. 6 Unimbɔti sá ubaanti, ki sá tikɔkɔ Baa, ki tɔ́kɔ́ tikɔkɔ pu, ki dì tikɔkɔ pu ki tūǹ u-tundi ní ki bí tikɔkɔn.

7 Un sá kamaa fōō dipɔl kii Kriisitoo nín tīī-u puee. 8 Kii an nín ŋmàn̄ Unimbɔti gbɔŋku poon puee yii:

«U nín jɔ́ḿ yilpuee,

u kpáaǹ iyumbu

ní ki pú binib apɔl^b.»

9 Mimmee, dinyɔɔbundi din lī yii: «U jɔ́m̀ yilpuee» là kí lì yii ba dee? An taapu di sá yii u nìn dáá sīntìń taapu doo nee ní. 10 Yeesu Kriisitoo un sīntìń taapu dooyee, úǹ ubaantee di tí jɔ́m̀ yilpu fɔ́ŋŋŋ kí gbí duulinya kɔkɔn. 11 Úǹ di yākatì atuun ki tīī u-nib, biba ń nīn sá u-kpambaliŋ, biba ń nīn sá Unimbɔti bɔnaatiliibi, biba ń nīn yìiǹ ki sòoǹ Yeesu Bɔmɔntiiti, biba ń nīn sá u-nikitiŋ kpootiliibi ní biba mun ń nīn sá Unimbɔti bɔti dàkaliibi^c. 12 U yākatì atuun míǹ ki tīī Unimbɔti nib ń ŋmā kí tɔ̄ Unimbɔti tundi mmɔntiim án nín làá ŋá pu Kriisitoo wuntee ń nīn cá nyɔkɔpuee ní. 13 Míǹ di làá yàntī ti-kɔkɔ ń kpántí ubaanti ti nín fōō Unimbɔti Jipɔɔn Yeesu Kriisitoo ki kííyee pu, ní kí béé-u mbaamɔm. Mimmee, ti cíkití Unimbɔti bɔtin ní kí kpántí biniŋmambi, kii Kriisitoo u-ba nín bí puee. 14 Ŋyunti gbantee, taa ti sá kii campɔntibee biŋmatinliibi cáá bi-bɔti ki ŋmàtíǹ-ti kii nnyim nì kubuŋu nín téekí buŋalimbu pu bu yìiǹ ajan kɔkɔ puee. 15 Ama ti máaǹ kí nīn cáá dineendi ki sòoǹ Yeesu bɔti nì ibaamɔn, kí nīn wīintí kí tin ŋmàntīǹ Kriisitoo un sá u-nikitil yilee. 16 Úǹ di kpáfì u-nikitil din sá u-wuntee, bi ŋá ubaanti, kii unil wunti jaŋŋi nín kpáfì ki nɔ̀b̄ tɔb pu puee. Ajan kɔkɔ yaa tūǹ ŋi-tundi nín sá puee, tiwun wīintí ní tiŋan. Míǹ ní dineendi yaa bí Kriisitoo nikitil kansikinee, dì cá nyɔkɔpu ní tiŋan.

Kriisitoo yab bí dimaŋfapɔndin

17 Tibɔti tin m làá sòoǹ nì ni nee, ti-Dindaan nyɔkɔpu ní m làá sòoǹ-tì. Ni-bimbim ń taa nín̄ bí kii bin kaa nyí Unimbɔtee nín bí puee. Bíǹ nóó bi-landɔkɔkulimii ní. 18 Bi-pɔbiliŋ nín gbìfì baa nyí nnimbɔtisanee pu ní bi dáá bí dibɔmbɔndin ki lántì dimaŋfal din Unimbɔti tīīyee. 19 Baa nyí icoo, ki dū bi-ba ki tīī atuŋkpiti ní ki ŋáań tijɔkɔndi kɔkɔ nì ti-bulifi ki cá, kaa gbèentí.

20 Nimbee, kaa sá míǹ ní bi dàkā-ni ní béé Kriisitoo. 21 Ni lafun gbìl̄ tikɔkɔ u-pu, ní bi dàkā-ni ni béè ibaamɔn in bí Yeesunee. 22 An puee, fámaan ni-bimbim min kaa ŋān̄ee, min cāabìń-ni nnimbitaataam ki bíiĺ-nee. 23 Ní yàntī Unimbɔti ń kpántí ni-pɔbiliŋ nì ni-landɔkɔi mpɔm. 24 Ní nīn nóómaan mbimbipɔm min Unimbɔti náań ki nántiǹ u-yam^d min sá deedee nì circir ki nyánní ibaamɔnnee.

25 An puee, ní fá inyimɔn. Báà ŋma ń sòoǹ u-juti ibaamɔn^e, kun puee ti-kɔkɔ kpáfì ki ŋá tiwumbaantiil ní. 26 Ni yaa fōō diŋuulee, ní nīn nyí nì ni-ba kí taa kɔ́ ikpitin^f, kí taa nín̄ díkí diŋuul míǹ áli kunyeeu ń tin mɔ́. 27 Ní taa pɔ̄maan Sitaan nsan. 28 Un nìn sá unaayuuyee ń taa ti yɔ̀. Ú pɔ́ɔǹ u-ba kí tɔ̄ ditundi min máaǹee kí kpíiǹ u-ba kí ká kí tūtuǹ uwɔfi. 29 Tibɔkpitil ń taa nín̄ nyēē ni-nyɔmmun, ama ni yaa làá sòoǹee, nín̄ sòom̀maan tin làá tūtuǹ bin fōō Yeesu ki kííyee ń cù nyɔkɔpu, kí kèetī bin bí ki pílifée mun. 30 Ní taa kɔ́ǹ Unimbɔti Fam kunimbaau^g, u-Famee ní u dūu dáań-ni ki síiǹ yii ŋwiin ŋubɔ dòoń u làá dāá fīī-ni kí líí kɔkɔ. 31 Ní nyāntímaan ni-kansikin ntuntun nì kináŋ nì diŋuul tɔb pu, nì kujaau, nì tɔb boon disambiil, kí kúntímaan ntoom nì mi-yalii kɔkɔ. 32 Ama nín̄ sámaan binimɔntiibi, kí nīn sūǹ tɔb saai, kí nīn pūǹ tɔb kpitii, kii Kriisitoo puee, Unimbɔti nín dū ni mun kpitii ki pú-ni puee^h.