Fiiliipi sá Eerɔpi tiŋki kiba ní. Kíǹ di sá kitimpeepeekaai kin poon Yeesu kpambal Pɔɔl sòon̄ Tibɔmɔntiilee. Kì nìn bí Room yab tinjandi din bí Maseeduwaanee ní (Greesi tiŋki ŋgan pú). Pɔɔl nín nìn yìin̄ ki sòon̄ Tibɔmɔntiil nliliitiimee ní u náań niin Kriisitoo nikitil (kpèè Atuun 16.12-40). Abiŋkaaŋkaa boon, ŋyunti ŋun u dáá bí sarkanee ní u ŋmàn̄ Fiiliipi yab kugbɔŋu nee. Biba ceeyee, u nìn bí Eefeesi tiŋkin ní sarka, ní biba mun ceeyee, Seesaaree àá Room tiŋkin ní u nìn bí. U nìn là kí jāam̀-bi tiwan tin bi nìn dī Eepafroodiiti pu ki pú-u ŋyunti ŋun úǹ u-ba nìn bí agìń poonee. U nìn gíti là kí tīī-bi kunyannyaau bí yūĺ nì Kriisitoo deedee kí taa yàntī nnyimɔn bɔti dàkatam min nìn bí bi-nikitil kansikinee ń ŋmàtiǹ-bi.

Pɔɔl kíĺ ki sòon̄ mmɔn nì dipɔɔpindi din gbéè-u ŋyunti ŋun u yaa bíi dàkafī Kriisitoo yab bin bí Fiiliipi tiŋkinee puee (1.1-11). Míǹ boonee ní u máafì-bi tin poon úǹ u-ba bée. Waa nìn nyí tin làá bàń-u foolboonee, ama dikpafindi din bí u nì Yeesu Kriisitoo kansikinee nín tìì dimákal diŋyee pu ní u sòoǹ (1.12-26). U nìn tīī Fiiliipi yab kunyannyaau bí nīn ŋúb́ fookii an píkí, ní kí nyàab̀ digbilindi ń nīn bí bi-kansikin. Bí dàkà dibasintindi kí nīn tūǹ ditundi ki tìì tɔb kii Yeesu Kriisitoo nín nìn ŋá puee (1.27–2.18). Kí nīn cí ŋyunti ŋun u làá fàtīí ká-bee, Eepafroodiiti un sá Fiiliipi yab tuuŋŋu nì Pɔɔl tɔntɔnjuti Tiimootee di làá nīn bí Fiiliipi nikitil nì Pɔɔl kansikin (2.19-30).

Míǹ boonee ní Pɔɔl kpáafì bin u bíi ŋmà kugbɔŋu kí tīīyee nì u-pɔŋŋu kɔkɔ bí nīn nyíǹ bi-ba nì bin kaa ŋúb́ Tibɔmɔntiil nì ibaamɔnee. Fiiliipi yab máaǹ kí nóó úǹ Pɔɔl tabɔbiliŋ, kí nīn còom̄ ki cá nyɔkɔpu bi-nimbikpeeŋu bá kun pu Kriisitoo yíiń-bee pu, an dàkà yii bí kpántí kii Kriisitooyee (ayil 3). Nì kunyannyaau nyɔɔbuŋŋi nì ijaam ní Pɔɔl dūu kúntì kugbɔŋu nee (ayil 4).

Bi yíiń kugbɔŋu nee «dipɔɔpindi gbɔŋku», di sá yii ku-kíltam kí tin cáá kátí-kuee, an pu ní an sòoǹ. Unil yaa yú nì Kriisitoo deedeeyee ní u kāntí dipɔɔpindi gbanti. U gāā nlan ki pàkā di-tuuŋŋi (2.6-11). Ni mun ŋūǹ kí ká dipɔɔpindi gbanti jutaaa?